ຈຳປາສັກມອບ-ຮັບຂໍ້ມູນຖານລາຍຮັບ

ວັນທີ 6 ມັງກອນຜ່ານມາທີ່ ແຂວງຈຳປາສັກໄດ້ຈັດພິທີມອບ-ຮັບຂໍ້ມູນຖານລາຍຮັບລະຫວ່າງຂະແໜງຄຸ້ມຄອງຊັບສິນແຫ່ງລັດກັບສ່ວຍສາອາກອນປະຈໍາແຂວງ, ຕາງໜ້າມອບຂອງທ່ານ ຖາວອນ ສຸລາດທາທອນ ຮັກສາການຫົວໜ້າຂະແໜງຄຸ້ມຄອງຊັບສິນແຫ່ງລັດ ແລະຕາງໜ້າຮັບຂອງທ່ານ ສຸກສະໄໝ ແກ້ວອອ່ນສີ ຮອງຫົວໜ້າສ່ວຍສາອາກອນ ປະຈໍາແຂວງຈໍາປາສັກ, ໂດຍການ ເຂົ້າຮ່ວມເປັນປະທານຂອງທ່ານ ນາງ ບຸນ ມິງ ເທບພະໄກສອນ ຮອງຫົວໜ້າພະແນກການເງິນແຂວງຈໍາປາສັກ, ແລະ ພາກສ່ວນກ່ຽວຂ້ອງເຂົ້າຮ່ວມ. 

ອີງຕາມບົດບັນທຶກການມອບ-ຮັບຂໍ້ມູນຖານລາຍຮັບລະຫວ່າງຂະແໜງຄຸ້ມຄອງຊັບສິນແຫ່ງລັດກັບສ່ວຍສາອາກອນປະຈໍາແຂວງຈໍາປາສັກ ແລະບັນດານິຕິກຳຕ່າງໆທີ່ຕິດພັນກັບການມອບຂໍ້ມູນຖານລາຍຮັບ, ການມອບຖານຂໍ້ມູນການເກັບລາຍຮັບຈາກຄ່າເຊົ່າທີ່ດິນຂອງລັດ, ເພື່ອໃຫ້ຂະແໜງສ່ວຍສາອາກອນສືບຕໍ່ຕິດຕາມເກັບລາຍຮັບເຊັ່ນ: ສັນຍາຄ່າເຊົ່າ, ສັນຍາສໍາປະທານ, ແຜນພັດທະນາເກັບລາຍຮັບແຕ່ປີ 2021-2025, ການສ້າງແຜນລາຍຮັບປະຈຳປີ 2022, ສະຖິຕິຫົວໜ່ວຍທີ່ຢູ່ໃນການຄຸ້ມຄອງຂອງແຂວງ, ຂໍ້ມູນການຈັດຕັ້ງປະຕິບັດເກັບລາຍຮັບໃນ 5 ປີຜ່ານມາ ແລະແຜນການເກັບລາຍຮັບປີ 2021 ສະເພາະແຂວງຄຸ້ມຄອງ ແລະເອກະສານທີ່ກ່ຽວ ຂ້ອງໃຫ້ແກ່ສ່ວຍສາອາກອນປະຈຳແຂວງເພື່ອເປັນຂໍ້ມູນໃນການຄຸ້ມຄອງ, ຕິດຕາມໃນລະບົບ TaxRIS.

ທັງນີ້, ເພື່ອໃຫ້ສອດຄ່ອງກັບພາລະບົດບາດຂອງຂະແໜງຄຸ້ມຄອງຊັບສິນແຫ່ງລັດໃຫ້ສໍາເລັດຕາມກໍານົດ, ປັບປຸງບັນດາໜ້າທີ່ວຽກງານຢ່າງແທ້ຈິງ, ປັບປຸງວຽກງານຈັດເກັບລາຍຮັບໃຫ້ມີຄວາມຮັດກຸມ,ຄຽງຄູ່ກັບການປະສານສົມທົບລະຫວ່າງສູນກາງ ແລະທ້ອງຖິ່ນລວມທັງສ່ວຍສາອາກອນປະຈຳແຂວງເພື່ອເຮັດໃຫ້ວຽກງານຄຸ້ມຄອງຊັບສິນແຫ່ງລັດມີຄວາມລະອຽດ, ຮັດກຸມ ແລະຫັນຄຸ້ມຄອງເກັບລາຍຮັບໄປສູ່ລະບົບທັນສະໄໝ (TaxRis) ເທື່ອລະກ້າວ.

แชร์