ລາວຖືກຳມະສິດທ່າເຮືອຫວຸງອາງຢູ່ຫວຽດນາມຈາກ 20% ເປັນ 60%

ລັດຖະບານລາວ ແລະ ຫວຽດນາມ ໄດ້ຮ່ວມລົງນາມ ແລະ ມອບ-ຮັບເອກະສານຮ່ວມມືຂອງບັນດາກະຊວງ ແລະ ພາກທຸລະກິດສອງປະເທດຈຳນວນ ທັງຫມົດ 9 ສະບັບ, ໃນນີ້ພາກລັດວິສາຫະກິດ 1 ສະບັບ ຄື: ມອບ-ຮັບໃບຢັ້ງຢືນຂໍ້ຜູກພັນກ່ຽວກັບການເພີ່ມອັດຕາສ່ວນກຳມະສິດຂອງລັດຖະບານລາວຈາກ 20% ຂຶ້ນເປັນ 60% ຂອງທ່າເຮືອຫວຸງອາງ 1,2,3 ທຶນຈົດທະບຽນ ໃນບໍລິສັດ ຫຸ້ນສ່ວນທ່າເຮືອສາກົນ ລາວ-ຫວຽດນາມ ຂະນະທີ່ໃນປີ 2022 ລັດຖະບານລາວ ແລະ ຫວຽດນາມໄດ້ຕົກລົງເຫັນດີເປັນເອກະພາບຈະສູ້ຊົນຊຸກຍູ້ມູນຄ່າການຄ້າສອງຝ່າຍໃຫ້ເພີ່ມຂຶ້ນ 10-15% ທຽບໃສ່ປີກ່ອນ. 

ໂອກາດເດີນທາງຢ້ຽມຢາມ ສສ ຫວຽດນາມ ເຊົ້າວັນທີ 10 ມັງກອນ 2022 ທີ່ຫ້ອງປະຊຸມຫ້ອງການລັດຖະບານແຫ່ງ ສສ ຫວຽດນາມ, ທ່ານນາຍົກລັດຖະມົນຕີ ພັນຄຳ ວິພາວັນ ແລະທ່ານນາຍົກລັດຖະມົນຕີ ຟ້າມ ມິງ ຈິງ ໄດ້ເປັນປະທານຮ່ວມ ຊີ້ນຳກອງປະຊຸມ ຄັ້ງທີ 44 ຂອງຄະນະກໍາມະການຮ່ວມມືທະວິພາຄີລະຫວ່າງ ລັດຖະບານ ແຫ່ງ ສປປ ລາວ ແລະ ລັດຖະບານ ແຫ່ງ ສສ ຫວຽດນາມ ປະຈໍາປີ 2022.

ໃນກອງປະຊຸມສອງຝ່າຍໄດ້ຮ່ວມກັນຕີລາຄາຜົນຂອງການຈັດຕັ້ງປະຕິບັດບົດບັນທຶກກອງປະຊຸມ ຄັ້ງທີ 43 ກໍຄືຂໍ້ ຕົກລົງວ່າດ້ວຍການຮ່ວມມືປະຈໍາປີ 2021 ແລະ ພ້ອມກັນປຶກສາຫາລືທິດທາງແຜນການຮ່ວມມືໃນປີ 2022, ສອງຝ່າຍໄດ້ຕີລາຄາສູງຕໍ່ບັນດາຜົນສຳເລັດຂອງການຈັດຕັ້ງປະຕິບັດຂໍ້ຕົກລົງວ່າດ້ວຍການຮ່ວມມືໃນປີ 2021 ທີ່ຜ່ານມາ ຊຶ່ງສາມາດບັນລຸຜົນສຳເລັດໃນຫຼາຍດ້ານເປັນຕົ້ນແມ່ນການຮ່ວມມືດ້ານການເມືອງ-ການຕ່າງປະເທດ; ດ້ານປ້ອງກັນຊາດ-ປ້ອງກັນຄວາມສະຫງົບ ແມ່ນສືບຕໍ່ໄດ້ຮັບການຈັດຕັ້ງປະຕິບັດເປັນຢ່າງດີ, ມີການເຄື່ອນໄຫວແລກປ່ຽນ ຄະນະຜູ້ແທນຂັ້ນສູງຂອງສອງພັກ, ສອງ ລັດ ຢ່າງເປັນປົກກະຕິ; ການຮ່ວມມືໃນຂົງ ເຂດການສຶກສາ-ບຳລຸງສ້າງກໍ່ໄດ້ຮັບເປີດກວ້າງດ້ວຍຫຼາຍຮູບການ,ປັດຈຸບັນຈໍານວນນັກສຶກສາລາວທີ່ກໍາລັງຄົ້ນຄວ້າຮໍ່າຮຽນຢູ່ ສສ ຫວຽດນາມ ມີຫຼາຍກວ່າ 14.000 ຄົນ.

ສຳລັບທິດທາງແຜນການຮ່ວມມືໃນ ປີ 2022 ສອງຝ່າຍ ໄດ້ຕົກລົງເຫັນດີເປັນເອກະພາບສືບຕໍ່ຈັດຕັ້ງຜັນຂະຫຍາຍບັນດາເນື້ອໃນຖະແຫຼງການຮ່ວມ ແລະຂໍ້ຕົກລົງ ລະຫວ່າງການນໍາຂັ້ນສູງຂອງສອງປະເທດໃຫ້ເປັນຮູບປະທຳ, ສືບຕໍ່ຮ່ວມມືຢ່າງແໜ້ນແຟ້ນ ໃນການຮັກສາສະຖຽນລະພາບທາງດ້ານການເມືອງ, ການປ້ອງກັນຊາດ-ປ້ອງກັນຄວາມສະຫງົບ ແລະຄວາມເປັນລະບຽບຮຽບຮ້ອຍໃນສັງຄົມຂອງແຕ່ລະປະເທດ; ສ້າງເສັ້ນຊາຍແດນລາວ-ຫວຽດນາມ ໃຫ້ເປັນຊາຍແດນແຫ່ງສັນຕິພາບ, ສະຖຽນລະພາບ, ການຮ່ວມມື ແລະພັດທະນາຮອບດ້ານ, ສະໜັບສະໜູນ ແລະສ້າງຄວາມເຊື່ອໝັ້ນເຊິ່ງກັນ ແລະກັນໃນເວທີພາກພື້ນ ແລະສາກົນ. 

ສອງຝ່າຍສູ້ຊົນຊຸກຍູ້ມູນຄ່າການຄ້າສອງຝ່າຍໃຫ້ເພີ່ມຂຶ້ນ 10-15% ທຽບໃສ່ປີຜ່ານມາ; ສືບຕໍ່ຜັນຂະຫຍາຍບົດບັນທຶກຄວາມເຂົ້າໃຈກ່ຽວກັບການຮ່ວມມືດ້ານຄົມມະນາຄົມ ແລະ ຂົນສົ່ງ, ການຮ່ວມມືພັດທະນາບັນດາໂຄງການໄຟຟ້າຢູ່ລາວ, ເຊື່ອມຕໍ່ລະບົບສາຍສົ່ງໄຟຟ້າ ແລະ ການຊື້-ຂາຍໄຟຟ້າ. ຄຽງຄູ່ກັນນີ້ສອງຝ່າຍກໍ່ຈະພ້ອມກັນສືບຕໍ່ເພີ່ມທະວີການຮ່ວມມື ແລະສ້າງເງື່ອນໄຂເພື່ອເອື້ອອໍານວຍຄວາມສະດວກໃຫ້ແກ່ການຮ່ວມມືດ້ານການຄ້າ, ການລົງທຶນ, ການສຶກສາກໍ່ຄືການພັດທະນາຊັບພະຍາກອນມະນຸດຂອງສອງປະເທດ ແລະການຮ່ວມມືໃນບັນດາຂົງເຂດທີ່ສອງຝ່າຍມີທ່າແຮງບົ່ມຊ້ອນ.

ພາຍຫຼັງສຳເລັດກອງປະຊຸມສອງນາຍົກລັດຖະມົນຕີໄດ້ຮ່ວມເປັນສັກຂີພິຍານໃນການລົງນາມ ແລະມອບ-ຮັບເອກະສານຮ່ວມມືຂອງບັນດາກະຊວງ ແລະພາກທຸລະກິດ ສອງປະເທດຈຳນວນ ທັງຫມົດ 9 ສະບັບ, ໃນນີ້ພາກລັດວິສາຫະກິດ 1 ສະບັບ ຄື: ມອບ-ຮັບໃບຢັ້ງຢືນຂໍ້ຜູກພັນກ່ຽວກັບການເພີ່ມອັດຕາສ່ວນກຳມະສິດຂອງລັດຖະບານລາວຈາກ 20% ຂຶ້ນເປັນ 60% ຂອງທ່າເຮືອຫວຸງອາງ 1,2,3 ທຶນຈົດທະບຽນໃນບໍລິສັດຮຸ້ນສ່ວນທ່າເຮືອສາກົນລາວ-ຫວຽດນາມ.

ຂ່າວ: ກະຊວງການຕ່າງປະເທດ 

แชร์