ລົດຂົນສົ່ງສິນຄ້າໄປ ສປ ຈີນ ຕົກຄ້າງຍ້ອນ 4 ສາເຫດ

ບັນຫາການຂົນສົ່ງສິນຄ້າອອກໄປ ສປ ຈີນ ຜ່ານດ່ານສາກົນບໍ່ເຕ່ນ-ບໍ່ຫານ ຊຶ່ງມີລົດຂົນສົ່ງສິນຄ້າຕົກຄ້າງເປັນຈໍານວນຫຼວງຫຼາຍເຮັດໃຫ້ການສັນຈອນໄປມາຕາມເສັ້ນທາງແຕ່ບ້ານນາເຕີຍມາຫາດ່ານພາສີສາກົນບໍ່ເຕ່ນມີຄວາມຫຍຸ້ງຍາກມາຈາກ 4 ສາເຫດ ຊຶ່ງສາເຫດຫຼັກໆກໍ່ແມ່ນພົບໂຊເຟີລາວທີ່ມາຈາກຕ່າງແຂວງລໍຖ້າຂົນສົ່ງສິນຄ້າອອກໄປຈີນມີເຊື້ອໂຄວິດ-19 ໃນວັນທີ 4/10/ 2021.

ທ່ານ ຄຳແພງ ໄຊສົມແພງ ລັດຖະມົນຕີກະຊວງອຸດສາຫະກຳ ແລະການຄ້າ (ອຄ) ພ້ອມດ້ວຍບັນດາຮອງລັດຖະມົນຕີຈາກກະຊວງກ່ຽວຂ້ອງ ແລະ ຄະນະໄດ້ລົງເກັບກໍາສະພາບຫຍຸ້ງຍາກຂອງການສົ່ງອອກສິນຄ້າໄປ ສປ ຈີນ ຕົວຈິງທີ່ດ່ານສາກົນບໍ່ເຕ່ນຢູ່ແຂວງຫຼວງ ນໍ້າທາ ໃນວັນທີ 26 ທັນວານີ້ ໂດຍມີທ່ານ ຄຳໄຫຼ ສີປະເສີດ ເຈົ້າແຂວງຫຼວງນໍ້າທາພ້ອມຄະນະໃຫ້ການຕ້ອນຮັບ ແລະພ້ອມກັນລົງເກັບກຳສະພາບການຕົວຈິງທີ່ຊ່ອງທາງຂົນສົ່ງສະເພາະ (ເສັ້ນທາງໃໝ່), ດ່ານສາກົຍບໍ່ເຕ່ນ (ຫຼັກໝາຍ 29), ສໍາຫຼວດສະພາບລົດຂົນສົ່ງສິນຄ້າຕິດຈົນຮອດສາງພັກສິນຄ້າຂອງບໍລິສັດ LICD ແລະສາງ LS.

ການລົງເກັບກຳສະພາບຕົວຈິງຄັ້ງນີ້, ຄະນະໄດ້ພ້ອມກັນສະຫຼຸບສັງລວມຂໍ້ຫຍຸ້ງຍາກຊຶ່ງທ່ານເຈົ້າແຂວງຫຼວງນໍ້າທາກໍ່ໄດ້ລາຍງານວ່າ: ພາຍຫຼັງເກີດມີຈາກລະບາດຂອງພະຍາດໂຄວິດ-19 ທາງຝ່າຍຈີນໄດ້ເພີ່ມມາດຕະການເຂັ້ມງວດ ແລະມາເຖິງວັນທີ 4/10/2021 ກວດພົບໂຊເຟີລາວທີ່ມາຈາກຕ່າງແຂວງລໍຖ້າຂົນສົ່ງສິນຄ້າອອກໄປຈີນມີເຊື້ອໂຄວິດ, ນັບແຕ່ວັນທີ5/10/2021 ຝ່າຍຈີນໄດ້ປິດດ່ານສາກົນບໍ່ຫານເຮັດໃຫ້ລົດສິນຄ້າບໍ່ສາມາດເຂົ້າໄປເບື້ອງຈີນໄດ້ຕໍ່ກັບສະພາບການດັ່ງກ່າວໃນໄລຍະຜ່ານມາຄະ ນະພັກ, ອົງການປົກຄອງແຂວງຫຼວງນໍ້າທາໄດ້ພະຍາຍາມປະສານພົວພັນນໍາຝ່າຍຈີນເພື່ອເຈລະຈາຕໍ່ລອງທັງຜ່ານກອງປະຊຸມລະຫວ່າງອົງການປົກຄອງ ແຂວງກັບສິບສອງພັນນາ ແລະຄະນະສະເພາະກິດຂັ້ນແຂວງກັບຄະນະສະເພາະກິດເມືອງລ້າ ສປ ຈີນ ຫຼາຍຄັ້ງຈິ່ງໄດ້ຕົກລົງເປັນເອກະພາບກັນເປີດດ່ານຄືນໃໝ່ເປັນການທົດລອງຊຶ່ງເລີ່ມແຕ່ວັນທີ 15/11/2021 ເປັນຕົ້ນມາໂດຍເລັ່ງໃສ່ແກ້ໄຂສະເພາະລົດຂົນສົ່ງສິນຄ້າແຕ່ບໍ່ອະນຸຍາດໃຫ້ບຸກຄົນທົ່ວໄປເຂົ້າ-ອອກໄດ້ເທື່ອ (ຍົກເວັ້ນຄົນຈີນທີຈະກັບຄືນປະເທດສະເລ່ຍ 100-150 ຄົນຕໍ່ມື້, ແຕ່ກ່ອນການສົ່ງອອກຕ້ອງໄດ້ຜ່ານການກັກກັນຢູ່ເຂດຢ່າງໜ້ອຍ 7 ວັນ ແລະກວດເຊື້ອພະຍາດ 4 ຄັ້ງ ຜົນອອກມາເປັນລົບຈິ່ງສາມາດເຂົ້າໄປປະເທດຈີນ ໄດ້).

ຮອດປະຈຸບັນ, ແຕ່ລະມື້ສະເລ່ຍລົດຂົນສົ່ງສິນຄ້າເຂົ້າໄປຈີນພຽງແຕ່ 150 ຄັນຕໍ່ມື້ ແລະລົດເປົ່າອອກມາ 50 ຄັນຕໍ່ ມື້, ແຕ່ລົດຂົນສົ່ງສິນຄ້າເຂົ້າມາລໍຖ້າເພື່ອຂົນສົ່ງສິນຄ້າອອກໄປຈີນປະມານ 350 ຄັນຕໍ່ມື້ ເຮັດໃຫ້ມີລົດຕົກຄ້າງເປັນຈໍານວນຫຼວງຫຼາຍ, ເຮັດໃຫ້ການສັນຈອນໄປມາພົບຄວາມຫຍຸ້ງຍາກ ແລະນີ້ກໍ່ເປັນອີກສາເຫດກໍ່ຄືຍ້ອນຈໍານວນການສົ່ງອອກສິນຄ້າໃນແຕ່ລະວັນຈໍາກັດ, ແຕ່ບໍລິມາດສິນຄ້າຕ້ອງການສົ່ງອອກມີຫຼາຍຈຶ່ງເຮັດໃຫ້ມີສິນຄ້າຕົກຄ້າງຈໍານວນຫຼວງຫຼາຍ, ຂະນະທີ່ໂຊເຟີລົດຊຸດຂາວເບື້ອງຈີນມີຈໍານວນຈໍາກັດມີພຽງແຕ່ປະມານ 80 ຄົນ; ຢູ່ຈຸດພັດປ່ຽນໂຊເຟີກ່ອນເຂົ້າໄປ ສປ ຈີນ ແມ່ນໃຊ້ເວລາສິດຢາຂ້າເຊື້ອດົນປະມານ 15-20 ນາທີຕໍ່ຄັ້ງຕໍ່ຄັນ ແລະຕ້ອງສິດຢາຂ້າເຊື້ອ 3 ຄັ້ງຕໍ່ຄັນ ຈຶ່ງສາມາດປ່ອຍເຂົ້າໄປ ສປ ຈີນ ໄດ້; ເວລາເຮັດວຽກຂອງຈີນມີຈຳກັດເປີດດ່ານແຕ່ 8 ໂມງເຊົ້າ ຫາ 16 ໂມງ ແລງມີບາງມື້ກໍ່ປິດຮັບກ່ອນ 16 ໂມງ ຫຼືສາງສິນຄ້າຢູ່ເບື້ອງຈີນ (ສາງນົກຍຸງ) ຖ້າສິນຄ້າລະບາຍອອກສາງບໍ່ທັນສິນຄ້າເຕັມຈີນຈະປິດບໍ່ຮັບສິນຄ້າກະສິກໍາຈາກລາວເຂົ້າໃນມື້ນັ້ນທັນທີ, ອີກສາເຫດທີ່ສຳຄັນກໍຍ້ອນສິນຄ້າປະເພດເຂົ້າ, ຢາງພາລາ, ສາລີ ແລະໝາກເດືອຍໂກຕ້າການນຳເຂົ້າຢູ່ເບື້ອງ ສປ ຈີນ ແມ່ນຈະໝົດໃນວັນທີ 31/12/2021 ນີ້ ຈຶ່ງເຮັດໃຫ້ສິນຄ້າຫຼັ່ງໄຫຼກັນມາເພື່ອລໍຖ້າສົ່ງອອກ.

ທ່ານເຈົ້າແຂວງຫຼວງນໍ້າທາກ່າວຕື່ມວ່າ: ເພື່ອແກ້ໄຂລົດຕົກຄ້າງທີ່ມີຢູ່ຕາມເສັ້ນທາງດັ່ງກ່າວກໍ່ຄືເພື່ອແກ້ໄຂຄວາມແອອັດຕາມເສັ້ນທາງ ແລະເຮັດໃຫ້ການສັນຈອນໄປມາໄດ້ປົກກະຕິນັ້ນ, ໃນໄລຍະນີ້ທາງແຂວງກໍ່ໄດ້ອອກແຈ້ງການໃຫ້ຜູ້ປະກອບການທົ່ວປະເທດໂຈະການສັນຈອນລົດບັນທຸກຂົນສົ່ງສິນຄ້າເຂົ້າມາເຂດບໍ່ເຕ່ນເປັນການຊົ່ວຄາວ (ແຕ່ວັນທີ 19-26 ທັນວາ 2021 ແລະຈະໄດ້ຂໍສືບຕໍ່ແກ້ໄຂໃຫ້ໝົດຈຶ່ງຈະອະນຸຍາດໃຫ້ລົດເຂົ້າມາໄດ້) ແລະນໍາໃຊ້ເຈົ້າໜ້າທີ່ຕໍາຫຼວດມາປະຈໍາການເພື່ອຈັດສັນ ແລະລະບາຍລົດໃນແຕ່ລະວັນເຮັດໃຫ້ສະພາບຄ່ອຍຜ່ອຍຄາຍລົງ ແລະໄປມາໄດ້ເປັນປົກກະຕິ.

ໂອກາດດຽວກັນ, ທ່ານ ຄຳແພງ ໄຊສົມແພງ ກໍ່ໄດ້ສະເໜີໃຫ້ບັນດາກະຊວງ, ຂະແໜງການທີ່ກ່ຽວຂ້ອງຮີບຮ້ອນສືບຕໍ່ສົມທົບກັນ ເພື່ອຄົ້ນຄວ້າ ແລະແກ້ໄຂບັນຫາລົດຕິດໃຫ້ຫຼຸດລົງເທື່ອລະກ້າວ ແລະໃຫ້ໄປໃນລວງດຽວ ແລະຄຽງຄູ່ກັນຫຼາຍຂຶ້ນເນື່ອງຈາກນີ້ແມ່ນໄລຍະເກັບກ່ຽວຜົນຜະລິດສິນຄ້າກະສິກໍາເພື່ອສົ່ງອອກເປັນຈໍານວນຫຼາຍ.

แชร์