ຈັບກຸ່ມລັກສາຍໄຟຕາມທາງລົດໄຟ

ວັນທີ່ 21 ທັນວາ 2021, ພັນໂທ ສົມບູນ ທະນາວັນ ຮອງຫົວໜ້າກອງບັນຊາການປ້ອງກັນຄວາມສະຫງົບແຂວງຫຼວງພະບາງຫົວໜ້າຫ້ອງຕໍ່າຫຼວດໄດ້ຖະແຫຼງຂ່າວກ່ຽວກັບການຈັບກຸມຜູ້ກະທຳຜິດລັກສາຍໄຟຟ້າຕາມແລວທາງລົດໄຟເຂດບ້ານຊຽງລ້ອມ ນະຄອນຫຼວງພະບາງ.
ທ່ານກ່າວວ່າ: ວັນທີ 11 ທັນວາ 2021 ເຈົ້າໜ້າທີ່ພະແນກສືບສວນ-ສອບສວນຄະດີອາຍາຂັ້ນແຂວງໄດ້ກັກຕົວຜູ້ກະທຳຜິດທີ່ລົງມືລັກຊັບປະເພດສາຍໄຟຟ້າຕາມແລວທາງລົດໄຟຢູ່ສະຖານີລົດ ໄຟລາວ-ຈີນ ບ້ານຊຽງລ້ອມ ນະຄອນຫຼວງພະບາງ ລວມ 9 ຄົນ ແລະອີກ 1 ຄົນ ຍັງເອົາຕົວລົບໜີ, ຜ່ານການສືບສວນ-ສອບສວນພວກກ່ຽວໄດ້ຮັບສາລະພາບວ່າໄດ້ກະທຳຜິດລັກຊັບ ແລະໄດ້ຂະຫຍາຍຜົນໄປຫາຜູ້ຊື້ຂອງກາງ, ທັງຍຶດໄດ້ຂອງກາງປະເພດເຫຼັກເສດ ແລະສາຍໄຟຟ້າເປັນທ່ອນແຕ່ລະທ່ອນ ຍາວປະມານ 120 ຊັງຕີແມັດ ລວມ 28 ທ່ອນ ແລະສາຍໄຟທີ່ປອກແລ້ວອີກເກືອບ 200 ກິໂລ ເຊີ່ງປັດຈຸບັນພວມສຳນວນຄຳດີສົ່ງໃຫ້ອົງການໄອຍາການປະຊາຊົນແຂວງ ແລະສານປະຊາຊົນແຂວງສືບຕໍ່ດຳເນີນ ແລະຄະດີຕາມຂັ້ນຕອນ, ສ່ວນຜູ້ກະທຳຜິດທີ່ຍັງເອົາຕົວລົບໜີຈະສືບຕໍ່ດຳເນີນການຈັບກຸມໃຫ້ໄດ້, ໂອກາດນີ້ ພັນໂທ ສົມບູນ ທະນາວັນ ໄດ້ຮຽກຮ້ອງໃຫ້ທຸກຄົນໃນສັງຄົມ ຈົ່ງເປັນເຈົ້າການໃນການສະກັດກັ້ນປະກົດການຫຍໍ້ທໍ້ໂດຍສະເພາະແມ່ນເປັນເຈົ້າການປະ ກອບສ່ວນ ຮັກສາຄວາມສະຫງົບຕາມເສັ້ນທາງລົດໄຟເພາະເສັ້ນທາງລົດ ໄຟລາວ-ຈີນຄືຊັບສົມບັດຂອງຊາດ.
ສຳລັບຜູ້ກະທຳຜິດທີ່ຖືກຈັບກຸມໃນຄັ້ງນີ້ຜູ້ຖືກຂໍ້ກ່າວຫາລັກຊັບປະກອບມີ: ທ້າວ ຈັນສະໝອນ ແກ້ວວົງສາ ອາຍຸ 23 ປີ ຢູ່ບ້ານກີ່ວໝາກນາວ 2 ເມືອງຊຽງເງີນ, ທ້າວ ເຊີນ ປັນຍາສິດ ອາຍຸ 19 ປີ ຢູ່ບ້ານກີ່ວໝາກນາວ 2 ເມືອງຊຽງເງີນ, ທ້າວ ບີ່ງ ອາຍຸ 22 ປີ ຢູ່ບ້ານກີ່ວໝາກນາວ 2 ເມືອງຊຽງເງີນ, ທ້າວ ວັນ ອາຍຸ 35 ປີ ຢູ່ບ້ານກີ່ວໝາກນາວ 2 ເມືອງ ຊຽງເງີນ, ທ້າວ ຫອນ ອາຍຸ 25 ປີ ຢູ່ບ້ານກີ່ວໝາກ ນາວ 2 ເມືອງຊຽງເງີນ, ນາງ ທອງ ຈັນ ອາຍຸ 31 ປີ ຢູ່ບ້ານຊຽງລ້ອມ ນະ ຄອນ ຫຼວງພະບາງ ແລະ ນາງ ແກ້ວ ອີນທະຈັກ ອາຍຸ 37 ປີ ຢູ່ບ້ານຜາວຽງ ນະຄອນຫຼວງພະບາງ. ສ່ວນຜູ້ຖືກຂໍ້ກ່າວຫາການຊື້-ຂາຍຊັບ ຢ່າງຜິດກົດໝາຍ ປະກອບມີ: ທ້າວ ພູຂາວ ສີພັນດອນ ອາຍຸ 60 ປີ ຢູ່ບ້ານໂຄມຂວາງ ນະຄອນຫຼວງພະບາງ, ນາງ ທອງຈັນ ອາຍຸ 31 ປີ ຢູ່ບ້ານຊຽງລ້ອມ ນະຄອນຫຼວງພະບາງ ແລະ ທ້າວ ເວີນວັນທາວ ອາຍຸ 39 ປີ ສັນຊາດຫວຽດນາມປັດຈຸບັນຢູ່ບ້ານນູນສະຫວາດ ນະຄອນຫຼວງພະບາງ. ສຳລັບຜູ້ທີ່ຍັງເອົາຕົວລົບໜີແມ່ນ ທ້າວ ສົມດາວ ຈັນສຸດາ ອາຍຸ 31 ປີ ຢູ່ ບ້ານຜາວຽງນະຄອນຫຼວງພະບາງ ເຊີ່ງເຈົ້າໜ້າທີ່ກຳລັງດຳເນີນການຈັບກຸມມາດຳເນີນຄະດີຕາມລະບຽບກົດໝາຍ.

แชร์