ຫາລືປົກປັກຮັກສາມໍລະດົກໂລກຫຼວງພະບາງ

ຂ່າວ: ສີສຸວັນ 

  ພະແນກຖະແຫຼງຂ່າວ, ວັດທະນະທໍາ ແລະທ່ອງທ່ຽວ (ຖວທ) ແຂວງຫຼວງພະບາງ ກັບອົງການໄຈກ້າ (JICA) ໄດ້ຈັດກອງປະຊຸມຫາລືວຽກງານກັບຄະນະກໍາມະການປະສານງານຮ່ວມຄັ້ງທີ IV ໃນການຈັດຕັ້ງປະຕິບັດໂຄງການສ້າງຄວາມສາມາດໃນດ້ານການຄຸ້ມຄອງ ແລະປົກປັກຮັກສາມໍລະດົກໂລກຫຼວງພະບາງຜ່ານອອນລາຍຂຶ້ນໃນວັນທີ 27 ສິງຫາ 2021 ທີ່ໂຮງແຮມຫຼວງພະບາງວິວໂດຍການເປັນປະທານຮ່ວມຂອງທ່ານ ປອ ສຸດາພອນ ຄົມທະວົງ ຫົວໜ້າພະແນກ ຖວທ ແຂວງ, ທ່ານ ນາງ ອະກິໂກະ ຊະນະດະ ຕາງໜ້າອົງການໄຈກ້າປະຈໍາລາວພ້ອມດ້ວຍໜ່ວຍງານທີ່ກ່ຽວຂ້ອງເຂົ້າຮ່ວມ.

 ທ່ານ ປອ ສຸດາພອນ ຄົມທະວົງ ຫົວໜ້າພະແນກ ຖວທ ແຂວງກ່າວວ່າ: ກອງປະຊຸມຄັ້ງນີ້ແມ່ນມີຄວາມໝາຍສໍາຄັນຫຼາຍຈຸດປະສົງຫຼັກກໍ່ແມ່ນເພື່ອສະຫຼຸບລາຍງານວຽກງານການຈັດຕັ້ງປະຕິບັດຂອງໂຄງການ, ອະທິບາຍແຜນການຈັດຕັ້ງປະຕິກິດຈະກໍາຂອງໂຄງການ, ປັບປຸງ ແລະກໍານົດຄືນບັນດາວຽກງານຂອງໂຄງການ, ການນໍາສະເໜີການຂໍອະນຸມັດສຶບຕໍ່ການປະຕິບັດຂອງໂຄງການ, ພ້ອມນີ້ຜູ້ເຂົ້າຮ່ວມຍັງໄດ້ປຶກສາຫາລືຮູບແບບການປັບປຸງປ່ຽນແປງການຈັດຕັ້ງປະຕິບັດກິດຈະກໍາຂອງໂຄງການຕື່ມອີກ, ຈາກນັ້ນ ທ່ານ ນາງ ອາຊຸກະ ທິຊຸ ໂບອິເກະ ຫົວໜ້າທິມງານ 2, ກຸ່ມພັດ ທະນາຕົວເມືອງ ແລະ ພາກພື້ນ, ພະແນກພື້ນຖານໂຄງລ່າງ ແລະການສ້າງສັນຕິພາບຈາກສູນໃຫຍ່ໄຈກ້າປະຈໍາຍີ່ປຸ່ນໄດ້ມີຄໍາເຫັນຕໍ່ພິທີໂດຍມີຫຼາຍດ້ານທີ່ຍົກໃຫ້ເຫັນເຖິງຄວາມສໍາເລັດໃນການຮ່ວມມືກັນພັດທະນາໂຄງການສ້າງຄວາມ ສາມາດໃນດ້ານການຄຸ້ມຄອງ ແລະປົກປັກຮັກສາມໍລະດົກໂລກຫຼວງພະບາງລະຫວ່າງແຂວງຫຼວງພະບາງກໍ່ຄືພະແນກ ຖວທ ແຂວງກັບອົງການໄຈກ້າຍີ່ປຸ່ນໂດຍເປົ້າ ໝາຍລວມກໍ່ແມ່ນເພື່ອການຄຸ້ມຄອງຮັກສາພື້ນທີ່ມໍລະດົກໂລກຫຼວງພະບາງ ແລະການພັດທະນາຂອບເຂດພື້ນທີ່ທົ່ວແຂວງຫຼວງພະບາງໄດ້ມີການດໍາເນີນຢ່າງຕໍ່ເນື່ອງລວມເຖິງວຽກງານປິ່ນອ້ອມຂອງໂຄງການໄດ້ຮັບການພັດທະນາດີຂຶ້ນເທື່ອລະກ້າວ.

 ສໍາລັບໂຄງການສ້າງຄວາມອາດສາມາດດ້ານການຄຸ້ມຄອງ ແລະປົກປັກຮັກສາມໍລະດົກໂລກຫຼວງພະບາງແບບຍືນຍົງເພື່ອການທ່ອງທ່ຽວໄລຍະການຈັດຕັ້ງປະຕິບັດເລີ່ມແຕ່ວັນທີ 1 ສິງຫາ 2018- 31 ມີນາ 2022.

แชร์