ສຳເລັດໂຄງການຕ້ານເຈື່ອນແຄມຂອງ ແລະຮ່ອງລະບາຍນໍ້າຫ້ວຍລົງກົງແຂວງສະຫວັນນະເຂດ

 ວັນທີ 18 ທັນວາ 2020 ທີ່ບໍລິເວນແຄມຂອງນະຄອນໄກສອນ ພົມວິຫານ ແຂວງສະຫວັນນະເຂດ ໄດ້ຈັດພິທີມອບ-ຮັບ ແລະເປີດນຳໃຊ້ຢ່າງເປັນທາງການໂຄງການກໍ່ສ້າງຕ້ານເຈື່ອນແຄມນໍ້າຂອງ ແລະໂຄງການກໍ່ສ້າງຮ່ອງລະບາຍນໍ້າເປື້ອນຫ້ວຍລົງກົງພາຍຫຼັງທີ່ໄດ້ກໍ່ສ້າງສຳເລັດຕາມແຜນການລະດັບຄາດໝາຍເປັນກຽດເຂົ້າຮ່ວມໃນພິທີມີ ທ່ານ ສັນຕິພາບ ພົມວິຫານ ເຈົ້າແຂວງ ສະຫວັນນະເຂດ, ທ່ານ ນາງ ວິໄລຄຳ ໂພສາລາດ ຮອງລັດຖະມົນຕີກະຊວງໂຍທາທິການ ແລະຂົນສົ່ງ,ມີບັນດາທ່ານຄະນະການນຳຂອງແຂວງສະຫວັນນະເຂດ, ຮອງເຈົ້າແຂວງຄຳມ່ວນ,ຄະນະກົມ,ຄະນະພະແນກການກ່ຽວຂ້ອງ, ຄະນະນໍານະຄອນໄກສອນ ພົມວິຫານ,ອຳນາດການປົກຄອງບ້ານ ແລະແຂກທີ່ມາຈາກສູນກາງ ແລະທ້ອງຖິ່ນເຂົ້າຮ່ວມ.

   ໃນພິທີ, ທ່ານ ໄຊຍະເສນ ແກ້ວວິໄລສັກ ຫົວໜ້າພະແນກ ຍທຂ ແຂວງໄດ້ກ່າວລາຍງານໂດຍສັງເຂບວ່າ: ຄືດັ່ງພວກເຮົາຮູ້ນໍາກັນແລ້ວວ່າ, ໂຄງການພັດທະນາຕົວເມືອງເປັນໂຄງການເງິນກູ້ຢືມ ແລະຊ່ວຍເຫຼືອລ້າຈາກທະນາຄານພັດທະນາອາຊີມີມູນຄ່າທັງໝົດ 47,7 ລ້ານໂດລາ, ໜ້າວຽກທີ່ປະຕິບັດລວມມີ 7 ໜ້າວຽກ, ກວມເອົາໃນ 3 ຕົວເມືອງຂອງແຂວງສະຫວັນນະເຂດຄື: ນະຄອນໄກສອນ ພົມວິຫານ, ເທສະບານເມືອງພີນ ແລະບ້ານແດນສະຫວັນ ເມືອງເຊໂປນ ໃນນີ້ສຳລັບໂຄງການກໍ່ສ້າງກັນເຈື່ອນນະຄອນໄກສອນ ພົມວິຫານ ກໍ່ແມ່ນໜຶ່ງໃນໂຄງການທີ່ຈັດຕັ້ງປະຕິບັດສຸດທ້າຍມີຄວາມຍາວ 980 ແມັດ ຍື່ນອອກໄປຈາກຂອບທາງຖະໜົນທ່າແຮ່ 50 ແມັດ, ມູນຄ່າການກໍ່ສ້າງລວມມີກັນເຈື່ອນ ແລະ ເສັ້ນທາງ 4,5 ລ້ານໂດລານອກນັ້ນຍັງມີໜ້າວຽກເພີ່ມເສັ້ນທາງຄອນກີດແຕ່ທ່າບັກຫາສວນສາທາລະນະໜູຮັກພູມສະຫວັນ ແລະເສັ້ນທາງສຸຂາວະດີ (ເສັ້ນດອນຫໍ) ເພີ່ມເຂົ້າຕື່ມໄລຍະຄວາມຍາວ 751 ແມັດ, ມີມູນຄ່າ 6,09 ແສນໂດລາ, ລວມມູນຄ່າທັງໝົດ 5,1 ລ້ານໂດລາ ໂດຍແມ່ນບໍລິສັດລາວມີໄຊກໍ່ສ້າງເປັນຜູ້ຮັບເໝົາການກໍ່ສ້າງ, ຊຶ່ງມີອົງປະກອບຈັດສັນເປັນສາມສ່ວນຫຼັກໆຄື: ເຂດຂຽວແຕ່ທ່າບັກເກົ່າຫາດ່ານນ້ອຍ, ເຂດບໍລິການແຕ່ດ່ານນ້ອຍຫາຫ້ອງຂາຍເຄື່ອງ 20 ຫ້ອງ ແລະເຂດກິດຈະກໍາແມ່ນຮອດຈຸດສຸດທ້າຍຊຶ່ງປະກອບມີເຄື່ອງຫັດກາຍບໍລິຫານອື່ນໆປະກອບຢູ່, ນອກນັ້ນທາງໂຄງການກໍ່ໄດ້ມີການຈັດສັນສິ່ງອໍານວຍຄວາມສະດວກອື່ນໆເຂົ້າຕື່ມອີກ, ທັງໝົດນີ້ມີໄລຍະເວລາການກໍ່ສ້າງ 2 ປີ ຕາມແຜນຈະໃຫ້ສຳເລັດໃນວັນທີ 19 ມິຖຸນາ 2021 ແຕ່ເນື່ອງຈາກວ່າທ່າແຮງຂອງບໍລິສັດມີຄວາມພ້ອມທຸກຢ່າງຈຶ່ງເຮັດໃຫ້ໂຄງການກໍ່ສ້າງນີ້ສໍາເລັດກ່ອນສັນຍາ 6 ເດືອນ, ສໍາລັບການມອບ-ຮັບໃນວັນນີ້.

  ນອກຈາກກັນເຈື່ອນແລ້ວທາງໂຄງການກໍ່ໄດ້ມອບ-ຮັບພ້ອມດຽວກັນກັບໂຄງການກໍ່ສ້າງຮ່ອງລະບາຍນໍ້າຫ້ວຍລົງກົງ ແລະໂຄງການບໍ່ບັດນໍ້າເສຍອອກຈາກຕົວເມືອງກ່ອນໄຫຼລົງສູ່ແມ່ນໍ້າຂອງຊຶ່ງເປັນວຽກເພີ່ມໃໝ່ທີ່ໂຄງການໄດ້ປະຫຍັດເງິນຈໍານວນໜຶ່ງທີ່ເຫຼືອຈາກການປະມູນວຽກກັນເຈື່ອນພ້ອມນັ້ນກໍ່ມີການຕິດຕັ້ງລະບົບປະຕູນໍ້າປິດ-ເປີດຕິດຕັ້ງຈັກສູບນໍ້າສໍາລັບການປ້ອງກັນນໍ້າຖ້ວມຕົວເມືອງນຳອີກ.

   ໂດຍມີລາຍລະອຽດດັ່ງນີ້: ການກໍ່ສ້າງຮ່ອງລະບາຍນໍ້າຫ້ວຍລົງກົງມີຄວາມຍາວທັງໝົດ 800 ກວ່າແມັດຍາວ, ມີຂົວເຮັດດ້ວຍເຫຼັກຂ້າມຄອງສອງຈຸດ, ຕິດຕັ້ງປະຕູນໍ້າປິດ-ເປີດໜຶ່ງແຫ່ງ, ຕິດຕັ້ງຈັກສູບນໍ້າສອງໜ່ວຍໆລະ 630 ກິໂລວັດອຳຕໍ່ໜ່ວຍ, ມີກໍາລັງສູບນໍ້າ  1,3 ພັນລິດຕໍ່ວິນາທີຕໍ່ໜ່ວຍ, ໝາຍວ່າ ສອງປໍ້າ 2,6 ພັນລິດຕໍ່ວິນາທີຊຶ່ງສາມາດຮອງຮັບປະລິມານນໍ້າໃນຕົວເມືອງທີ່ໄຫລລົງສູ່ຫ້ວຍລົງກົງຈະບໍ່ຖ້ວມຂັງອີກຕໍ່ໄປໝາຍວ່າເວລານໍ້າຂອງຂຶ້ນສູງນໍ້າຫວ້ຍລົງກົງຍູ້ໄຫຼເຂົ້າຖ້ວມຕົວເມືອງລະບົບປິດ-ເປີດປະຕູຈະອັດເຂົ້າເຮັດໃຫ້ນໍ້າຂອງບໍ່ສາມາດເຂົ້າມາໄດ້ຈາກນັ້ນ, ເມື່ອນໍ້າຂຶ້ນຮອດລະດັບຂອງລະບົບປໍ້າທີ່ກໍານົດໄວ້, ປໍ້ານໍ້າຈະເຮັດວຽກແບບອັດຕະ ໂນມັດເລີຍ, ມູນຄ່າການກໍ່ສ້າງສໍາລັບຮ່ອງລະບາຍນໍ້າແມ່ນ 1,6 ລ້ານໂດລາ.

  ສໍາລັບລະບົບບໍາບັດນໍ້າເປື້ອນແມ່ນມີເນື້ອທີ່ທັງໝົດ 1,9 ເຮັກຕາ, ປະກອບມີ 4 ຫນອງ ຊຶ່ງບໍາບັດແບບທໍາມະຊາດໂດຍການປູກພືດທີ່ສາມາດດູດຊຶມສານພິດ ແລະສີ່ງປະຕິກູນອື່ນໆໄດ້ສາມາດບໍາບັດນໍ້າເປື້ອນໄປຕາມຂັ້ນຕອນໃນແຕ່ລະໜອງຈຶ່ງປ່ອຍລົງຮ່ອງລົງສູ່ນໍ້າຂອງໂດຍລະບົບດັ່ງກ່າວແມ່ນເປັນລະບົບດີຫວັດ (DEWAT) ທີ່ອອກແບບໂດຍອົງການບໍດາປະຈໍາລາວເປັນຜູ້ສະໜອງແບບໃນການກໍ່ສ້າງໃຫ້, ການບໍາບັດນີ້, ແມ່ນໃຊ້ສະເພາະລະດູແລ້ງທີ່ມີກົດເຂັ້ມຂຸ້ນເທົ່ານັ້ນສ່ວນລະດູຝົນແມ່ນປ່ອຍໄປຕາມທໍາມະຊາດເພາະມີນໍ້າຫຼາຍກົດຈະຖືກເຈືອຈາງໄປ,ພ້ອມນັ້ນກໍ່ມີຮົ້ວອ້ອມປູກຕົ້ນໄມ້ເສີມສອງຟາກຄອງອີກດ້ວຍຊຶ່ງການກໍ່ສ້າງລະບົບດັ່ງກ່າວມີມູນຄ່າ 8,6 ແສນໂດລາ, ລວມມູນຄ່າຂອງສັນຍາທັງໝົດຈຳນວນ 2,5 ລ້ານໂດລາ, ໂດຍແມ່ນບໍລິສັດເລກ 8 ຮ່ວມກັບບໍລິສັດໄຕເຈືອງເຊິນເປັນຜູ້ຮັບເໝົາການກໍ່ສ້າງ.

แชร์