ຄຳມ່ວນ ຈະສູ້ຊົນໃຫ້ລາຍຮັບຕໍ່ຫົວຄົນບັນລຸໄດ້ 30 ລ້ານກວ່າກີບ

 ແຂວງຄຳມ່ວນ ໄດ້ກໍານົດວິໄສທັດ “ເປັນແຫຼ່ງຜະລິດສະບຽງອາຫານ, ເປັນຖານພັດທະນາອຸດສາຫະກຳ, ການບໍລິການ ແລະທ່ອງທ່ຽວ” ເພື່ອຍູ້ແຮງເຮັດໃຫ້ເສດຖະກິດຂອງແຂວງຂະຫຍາຍຕົວຢ່າງໝັ້ນທ່ຽງ, ຕໍ່ເນື່ອງ ແລະ ຍືນຍົງຊຶ່ງຮອດປີ 2025 ແຂວງຄຳມ່ວນຈະສ້າງລາຍຮັບສະເລ່ຍໃຫ້ໄດ້ 30 ລ້ານກວ່າກີບ ຫຼື ປະມານ 3.335 ໂດລາສະຫະລັດຕໍ່ຄົນຕໍ່ປີ, ລວມຍອດຜະລິດຕະພັນພາຍໃນລວມ 5 ປີ ໃຫ້ບັນລຸ 57.435 ຕື້ກີບ, ລະດົມທຶນໃຫ້ໄດ້ 24-28% ຂອງ GDP ຫຼືເທົ່າກັບ 15.314 ຕື້ກວ່າກີບ, ຮອດປີ 2025 ຄາດຄະເນເສດຖະກິດຂະຫຍາຍຕົວໃນລະດັບ 6-7%.

  ທ່ານ ບຸນມີ ພິມມະສອນ ຮອງເຈົ້າແຂວງຄຳມ່ວນລາຍງານໃນກອງປະຊຸມໃຫຍ່ຜູ້ແທນຄັ້ງທີ X ຂອງອົງຄະນະພັກແຂວງຄຳມ່ວນເມື່ອບໍ່ດົນມານີ້ວ່າ: ເພື່ອໃຫ້ສາມາດ ບັນລຸຈຸດໝາຍ ແລະທິດທາງໜ້າທີ່ລວມຂອງແຜນການ 5 ປີຄັ້ງທີ IX (2021-2025) ແຂວງຄຳມ່ວນຈະສຸມໃສ່ເຮັດໃຫ້ເສດຖະກິດຂະຫຍາຍຕົວຢ່າງຕໍ່ເນື່ອງ, ມີຄຸນນະພາບ, ໜັ້ນທ່ຽງ ແລະຍືນຍົງ; ຊັບພະຍາກອນມະນຸດມີຄຸນນະພາບສູງຂຶ້ນ, ສາມາດຕອບສະໜອງຄວາມຕ້ອງການຂອງການພັດທະນາ, ຊີວິດການເປັນຢູ່ທາງ ດ້ານວັດຖຸ ແລະຈິດໃຈຂອງປະຊາຊົນໄດ້ຮັບການຍົກລະດັບໃຫ້ດີຂຶ້ນເທື່ອລະກ້າວ, ສ້າງພື້ນຖານເສດຖະກິດໃຫ້ມີຄວາມເຂັ້ມແຂງ, ຄາດຄະເນເສດຖະກິດຂະຫຍາຍຕົວໃນລະດັບ 6-7%, ລາຍຮັບງົບປະມານລວມສູນກາງ ແລະທ້ອງຖີ່ນ 4.6 33 ຕື້ກວ່າກີບ, ໃນນັ້ນທູດສູນກາງ 2.791 ຕື້ກວ່າກີບ, ທ້ອງຖີ່ນ 1.8 41 ຕື້ກວ່າກີບ; ດ້ານລາຍຈ່າຍສູ້ຊົນບໍ່ໃຫ້ເກີນ 3.222 ຕື້ກວ່າກີບ,ການຂາດດຸນງົບປະມານໃຫ້ຢູ່ໃນລະດັບ 1.380 ຕື້ກີບ ຫຼືສະເລ່ຍ 5 ປີ ບໍ່ໃຫ້ເກີນ 2-3% ຂອງ GDP; ສູ້ຊົນລະດົມແຫລ່ງທຶນເພື່ອການພັດທະນາໃນ 5 ປີ ໃຫ້ໄດ້ປະມານ 24-28% ຂອງ GDP ເທົ່າກັບ 15.314 ຕື້ກວ່າກີບ, ຊຸກຍູ້ສົ່ງເສີມເຮັດໃຫ້ຈຳນວນຜູ້ປະກອບກິດຈະ ການ SME ໃຫ້ເພີ່ມຂຶ້ນຢ່າງໜ້ອຍ 120 ຫົວໜ່ວຍ,ປັບປຸງລະບົບການຄຸ້ມຄອງ ແລະບໍລິຫານລັດວິສາຫະກິດຂອງແຂວງໃຫ້ມີປະສິດທິຜົນສູງໃຫ້ບັນດາລັດວິສາຫະ ກິດພາຍໃນແຂວງມອບພັນທະເຂົ້າງົບປະມານລັດໃຫ້ໄດ້  2,50 ຕື້ກີບ.

  ຮອດປີ 2025 ຈະຜະລິດກະແສໄຟຟ້າໃຫ້ໄດ້ 46.015 GWh, ໃນນີ້ສົ່ງຂາຍຕ່າງປະເທດໃຫ້ໄດ້ 42.793 GWh, ສືບຕໍ່ຊຸກຍູ້ການກໍ່ສ້າງເຂື່ອນຫີນບູນຕອນ ລຸ່ມ (ບ້ານຄຳແກ້ວ) ໃຫ້ສຳເລັດ 100% ໃນ ປີ 2021, ເຂື່ອນນໍ້າຫີນບູນຕອນເທິງ (ບ້ານທົ່ງລົມ) ໃຫ້ສໍາເລັດໃນປີ 2025, ສູ້ຊົນຊຸກຍູ້ສົ່ງເສີມຜະລິດເກືອໂປຣຕັສ ຂອງບັນດາບໍລິສັດທີ່ໄດ້ຮັບອະນຸຍາດໃຫ້ເພີ້ມເປັນ 2,5 ລ້ານໂຕນ ຕໍ່ປີ, ສູ້ຊົນຜະລິດເຂົ້າເປືອກລວມໃຫ້ໄດ້436.787 ໂຕນ, ສະເລ່ຍຕໍ່ຫົວຄົນໃຫ້ໄດ້ 945 ກິໂລຕໍ່ຄົນ (ຄາດຄະເນພົນລະເມືອງ 462. 374 ຄົນ), ປູກພືດໃຫ້ໄດ້ 153. 593 ໂຕນ, ຜະລິດຊີ້ນ-ປາລວມ ໃຫ້ໄດ້ 29.940 ໂຕນ, ອັດຕາສະເລ່ຍໃຫ້ໄດ້ 64,75 ກິໂລຕໍ່ຄົນ, ພັດທະນາການສຶກສາໃຫ້ມີຄຸນນະພາບສູງຂຶ້ນເພື່ອສ້າງຊັບພະຍາກອນມະນຸດ, ສຸມໃສ່ສູ້ຊົນຈັດຕັ້ງປະຕິບັດ 15 ໂຕຊີ້ວັດໃຫ້ບັນລຸຕາມຄາດໝາຍເພື່ອໃຫ້ຄຽງຄູ່ກັບການພັດທະນາໃນອະນາຄົດ.

แชร์