ເມືອງເງິນ ຮັບຮອງເອົາກົມກອງວັດທະນະທຳ

 ເມືອງເງິນ ແຂວງໄຊຍະບູລີ ໄດ້ຈັດປະກາດຮັບຮອງເອົາກົມກອງວັດທະນະທຳຈຳນວນ 12 ຫ້ອງການ 1 ກົມກອງ, 3 ບ້ານ ພັດທະນາດ້ານແຮງງານ ແລະສະຫວັດດີການສັງຄົມ ແລະ 9 ບ້ານ ຢຸດຕິການຖ່າຍຊະຊາຍ, ພິທີດັ່ງກ່າວໄດ້ຈັດຂິ້ນເມື່ອວັນທີ 30 ພະຈິກຜ່ານມາຢູ່ຫ້ອງປະຊຸມໃຫຍ່ເມືອງເງິນໂດຍມີທ່ານ ຄຳແພງ ຕັດສະຫວັດ ເຈົ້າເມືອງເງິນ, ມີຄະນະປະຈຳພັກເມືອງ,ກຳມະການພັກເມືອງ,ຫົວໜ້າຫ້ອງການ,ກົມກອງ,ອຳນວຍການໂຮງຮຽນ, ລັດວິສາຫະກິດ ແລະນາຍບ້ານເຂົ້າຮ່ວມ.

  ທ່ານ ອຸດອນ ສະກຸນທອງ ຫົວໜ້າຫ້ອງການແຮງງານສະຫວັດດີການ ແລະສັງຄົມເມືອງເງິນຊີ້ໃຫ້ເຫັນວ່າ: ໃນການສ້າງບັນດາເປົ້າໝາຍດັ່ງກ່າວຜ່ານມາ, ຫ້ອງ ການ ຖວທ ເມືອງເງິນ, ຫ້ອງການ ຮສສ ເມືອງ ແລະຫ້ອງການສາທາລະນະສຸກເມືອງໄດ້ລົງຊຸກຍູ້ໂດຍເລັ່ງໃສ່ສ້າງບັນດາມາດຖານທີ່ຍັງຄ້າງໃນປີ 2019 ແລະ ມາ ຮອດກາງເດືອນສິງຫາ 2020 ພະນັກງານທັງ 3 ຫ້ອງການໄດ້ລົງປະເມີນຮອບ 2 ແລະ ເຫັນວ່າບັນລຸຕາມມາດຖານເງື່ອນໄຂທີ່ຂັ້ນເທິງວາງອອກກໍຄືເງື່ອນໄຂຄົບ ຖ້ວນຕາມ 4 ມາດຖານຂອງການສ້າງກົມກອງວັດທະນະທໍາ, 6 ມາດຖານຂອງການສ້າງບ້ານພັດທະນາດ້ານແຮງານ ແລະສະຫວັດດີການສັງຄົມ ແລະ 8 ມາດຖານຂອງການສ້າງບ້ານຢຸດຕິການຖ່າຍຊະຊາຍ.

ສຳລັບກົມກອງວັດທະນະທໍາປະກອບມີພະນັກງານ-ລັດຖະກອນ ແລະພົນທະຫານທັງໝົດ 188 ຄົນ, ຍິງ 36 ຄົນ; ສ່ວນ 3 ບ້ານເປົ້າໝາຍຂອງການສ້າງເປັນບ້ານພັດທະນາດ້ານແຮງງານ ແລະສະຫວັດດີການສັງຄົມປະກອບມີ 550 ຄອບຄົວ, ປະເມີນໄດ້ 493 ຄອບຄົວເທົ່າກັບ 89,63% ແລະມີ 9 ບ້ານເປົ້າໝາຍຂອງການສ້າງເປັນບ້ານຢຸດຕິການຖ່າຍຊະຊາຍປະກອບມີ 1.959 ຄອບຄົວ, ມີວິດຖ່າຍ 1.983 ໜ່ວຍ.   

 

แชร์