ເມືອງຕົ້ນເຜິ້ງ ສໍາເລັດການປະກວດນັກຮ້ອງສຽງດີ

  ການປະກວດນັກຮ້ອງສຽງດີ ແລະສະແດງສິລະປະວັນນະຄະດີຂອງເມືອງຕົ້ນເຜິ້ງແຂວງບໍ່ແກ້ວເພື່ອຂໍ່ານັບຮັບຕ້ອນວັນຊາດໄດ້ສໍາເລັດລົງໃນຄໍ່າຄືນວັນທີ 1 ທັນວາ 2020 ທີ່ເດີ່ນຕະຫຼາດນັດທາງເຂົ້າເທສະບານເມືອງດັ່ງກ່າວໃຫ້ກຽດເຂົ້າຮ່ວມມີຄະນະການນໍາຂອງເມືອງ, ຄະນະພະແນກ ຖວທ, ບັນດາຫ້ອງການອ້ອມຂ້າງເມືອງ, ອຳນາດການປົກຄອງບ້ານ, ນັກຮ້ອງສຽງດີ, ແຂກຖືກເຊີນ ແລະພາກສ່ວນຕ່າງໆພາຍໃນເມືອງ.

   ພາຍໃນງານນັກຮ້ອງສຽງດີທີ່ຜ່ານເຂົ້າຮອບ 10 ຄົນສຸດທ້າຍໄດ້ຜັດປ່ຽນກັນຂຶ້ນຮ້ອງເພງ ແລະຊົມການສະແດງສິລະປະວັນນະຄະດີຂອງບັນດານ້ອງນັກຮຽນຊາວ ໜຸ່ມ, ເຍົາວະຊົນ-ອະນຸຊົນຈາກໂຮງຮຽນປະຖົມ, ມັດທະຍົມ ແລະ ບັນດາບ້ານພາຍໃນເມືອງ ແລະ ຊົມການປະກອບສ່ວນສຽງເພງຂອງນັກຮ້ອງຮັບເຊີນກິດຕິມະສັກຈາກພາກສ່ວນຂອງເມືອງ, ຂອງ ແຂວງດ້ວຍບັນຍາກາດອັນຄຶກຄື້ນມ່ວນຊື່ໄປດ້ວຍສຽງຊົມສຽງເຊຍຂອງຜູ້ເຂົ້າຮ່ວມຊົມຮ່ວມເຊຍຜ່ານ ການແຂ່ງຂັນ ແລະໃຫ້ຄະແນນຈາກຄະນະກຳມະການຕັດສິນນັກຮ້ອງສຽງດີທີ່ຊະນະການປະກວດອັນດັບ 1 ໄດ້ແກ່ທ້າວ ຄໍາຄ່ອງຈາກກອງບັນຊາການທະຫານເມືອງຕົ້ນເຜິ້ງ, ອັນດັບ 2 ນາງ ນັດທະລິກາຜົນເດດນັກຮ້ອງສຽງດີຈາກໂຮງຮຽນ ມສ ຕົ້ນເຜິ້ງ, ອັນດັບ 3 ນາງ ວັນໄຊ ແສງວິໄລພອນ ນັກຮ້ອງສຽງດີຈາກໂຮງຮຽນ ມສ ນໍ້າເກິ່ງ.

 ຈາກນັ້ນກໍ່ໄດ້ມອບຂັນ, ເງິນລາງວັນໃຫ້ແກ່ຜູ້ຊະນະການປະກວດທັງ 3 ອັນດັບ,ມອບລາງວັນຊົມເຊີຍໃຫ້ແກ່ນັກຮ້ອງສຽງດີທີ່ຜ່ານເຂົ້າຮອບ 10 ຄົນ,ມອບໃບຍ້ອງຍໍ, ມອບຂັນ ແລະເງິນລາງວັນໃຫ້ແກ່ທີມນັກກີລາເປຕັງ ແລະບານເຕະທີ່ເມືອງ ແລະບ້ານໃຫຍ່ຕົ້ນເຜິ້ງຈັດຂຶ້ນເພື່ອຂໍ່ານັບຮັບຕ້ອນວັນຊາດ, ມອບໃບກຽດຕິຄຸນໃຫ້ແກ່ຜູ້ທີ່ໄດ້ປະກອບສ່ວນທຶນຮອນເຂົ້າໃນການຈັດງານຄັ້ງນີ້ຊຶ່ງໃຫ້ກຽດມອບໂດຍຄະນະການນໍາຂອງເມືອງ, ຄະນະພະແນກ ຖວທ, ຄະນະພັກ-ອຳນາດການປົກຄອງບ້ານ.

 

แชร์