ໄຕ໋ບ້ານ ເປີດກ້ອງຮູບເງົາເລື່ອງ “ສະບາຍດີຊຳເໜືອ”

  ວັນທີ 3 ທັນວາ ຜ່ານມາ ໄຕ໋ບ້ານ ຈັດພິທີງານບວງສວາມເປີດກ້ອງຮູບເງົາເລື່ອງ: “ສະບາຍດີຊຳເໜືອ” ໂດຍມີ ທ່ານ ອານຸລັກ ລໍມະນີຈັນຫົວໜ້າທີມງານໄຕ໋ບ້ານທັງເປັນຜູ້ກຳກັບລວມເຖິງນັກສະແດງໝູ່ຄູ່ເຂົ້າຮ່ວມ.

  ທ່ານ ອານຸລັກ ລໍມະນີຈັນ ຫົວໜ້າທີມງານໄຕ໋ບ້ານໃຫ້ສຳພາດວ່າ: ສຳລັບບົດເນື້ອໃນຮູບເງົາໂດຍ ລວມແລ້ວສ່ອງແສງເຖິງການໃຊ້ຊີວິດໃຫ້ມີຄວາມສຸກບໍ່ຈຳເປັນຕ້ອງຂຶ້ນກັບເງິນທອງ ຫຼື ວ່າສັງຄົມທີ່ສີວິໄລສະເໝີໄປ ແລະສື່ໃຫ້ເຫັນເຖິງການໃຊ້ຊີວິດແບບບ້ານໆຂອງປະຊາຊົນບາງເຂດໃນແຂວງຫົວພັນ ໂດຍຈະສື່ໃຫ້ເຫັນວິຖີຊີວິດການເປັນຢູ່ວັດທະນະທຳການປາກເວົ້າ ແລະສຳນຽງທີ່ເປັນເອກະລັກທັງສະຖານທີ່ ແລະຄວາມເປັນເອກະລັກຫຼາຍໆດ້ານຂອງປະຊາຊົນໃນ ຂອງແຂວງຫົວພັນ.

  ເພື່ອເປັນການເຜີຍແຜ່ໃຫ້ຄົນລາວທັງປະເທດໄດ້ຮູ້ຈັກວັດທະນະທຳຂອງພາກເໜືອຫຼາຍຂຶ້ນໃນອີກມູມໜຶ່ງຍັງສ່ອງແສງເຖິງການທີ່ຄົນເຮົາຮຽນຮູ້ກັບຊີວິດໂຕຈິງໂດຍການອອກໄປຄົ້ນພົບສິ່ງໃໝ່ໆດ້ວຍຕົນເອງເພື່ອປ່ຽນແປງແນວຄິດ ຫຼື ທັດສະນະຄະຕິຂອງເຮົາເອງໃຫ້ເປີດກວ້າງຫຼາຍຂຶ້ນ.

  ສຳລັບຕົວຮູບເງົາຫຼັກແມ່ນມີ 5  ຄົນ ສ່ວນນັກສະແດງຮັບເຊີນແມ່ນ 12 ແລະຍັງມີຫຼາຍໆຄົນຮູບເງົາທີ່ເປັນນັກສະແດງສົມທົບຊຶ່ງຜູ້ກຳກັບແມ່ນ ທ່ານ ອານຸລັກ ລໍມະນີຈັນ ຫຼື ອານຸລັກໄຕ໋ບ້ານ ແລະຜູ້ຂຽນບົດ ແລະຮຽບຮຽງແມ່ນ ທ່ານ ດາວພະຫັດ ພັນທະລາວົງ (ຈອນນີ້)ຊຶ່ງຈະເລີ່ມເປີດກອງແມ່ນວັນທີ 20 ທັນວາ 2020 ຢູ່ນະຄອນຫຼວງວຽງຈັນ ແລະວັນທີ 5 ມັງກອງ 2020 ແມ່ນຖ່າຍທຳຢູ່ແຂວງຫົວພັນ (ຊຳ ເໜືອ ) ລວມທັງໝົດໃນການຖ່າຍທຳແມ່ນ 30 ມື້.

 ໃນໂອກາດດັ່ງກ່າວ ອານຸລັກ ໄຕ໋ບ້ານ ໄດ້ຂໍຝາກໃຫ້ທຸກທ່ານຕິດຕາມຮູບເງົາເລື່ອງນີ້ ແລະເປັນກຳລັງໃຈໃຫ້ທີມງານທຸກຄົນໄດ້ດຳເນີນການໄປຢ່າງລາບເລື່ອນ ແລະໄດ້ສ້າງສັນມັນອອກມາດ້ວຍຄວາມຕັ້ງໃຈຮູບເງົາເລື່ອງນີ້ສ້າງເປັນຮູບເງົາທີ່ຄົບລົດຊາດເລີຍກໍ່ວ່າໄດ້ມີຫຼາກຫຼາຍອາລົມ ແລະມີຫຼາຍແງ່ຄິດສະນັ້ນທີມງານ ແລະນັກສະແດງທຸກຄົນຂອງພວກເຮົາຈະເຮັດໃຫ້ເຕັມທີ່ໆສຸດ ແລະປັບປຸງພັດທະນາຂຶ້ນໄປເລື່ອຍໆ.

----

ໂດຍ:ບຸນນິກ

แชร์