ມູນນິທິສົ່ງເສີມການສຶກສາສົງ ອຸປະຖໍາໂຄງການຝຶກອົບຮົມຄຣູວິປັດສະນາ

ໃນອາທິດຜ່ານມາພະຍອດຄຳບຸນທະວີປະສິດທິສັກຫົວໜ້າກັມມາທິການສາທາລະນູປະການ ແລະຜູ້ເຕົ້າໂຮມມູນນິທິສົ່ງເສີມການສຶກສາສົງພ້ອມດ້ວຍຄະນະກຳມະການ ແລະສັດທາສາທຸຊົນຮ່ວມມອບຖວາຍເງິນອຸປະຖັມໂຄງການຝຶກອົບຮົມຄຣູວິປັດສະນາຂອງກັມມາທິການເຜີຍແຜ່ສີລະທັມ ແລະປະຕິບັດກັມມະຖານສູນກາງຈຳນວນ 83 ລ້ານກີບ ທີ່ວັດທາດຫຼວງເໜືອ ເມືອງໄຊເສດຖາ ນະຄອນຫຼວງວຽງຈັນ,ໂດຍມີພະຫຼັກແກ້ວມະຫາເຫວດມະເສໄນຮອງປະທານ ອພສ ແຫ່ງ ສປປ ລາວ ອົງຊີ້ນຳລວມວຽກງານເຜີຍແຜ່ສີລະທັມ ແລະປະຕິບັດກັມມມະຖານທົ່ວປະເທດ, ພ້ອມດ້ວຍຄະນະສົງໃຫ້ການຕ້ອນຮັບ ແລະຮ່ວມອະນຸໂມທະນາ.

  ພະຍອດຄຳບຸນທະວີປະສິດທິສັກກ່າວວ່າ “ມູນນິທິນີ້ສ້າງຕັ້ງຂຶ້ນເພື່ອສົ່ງເສີມການສຶກສາໃຫ້ແກ່ພະສົງສາມະເນນ ແລະເຜີຍແຜ່ສີລະທັມວັດທະນະທຳປະເພນີຂອງຊາດຊຶ່ງໃນປີນີ້ນອກຈາກມູນນິທິສົ່ງເສີມການສຶກສາສົງໄດ້ຊ່ວຍເຫຼືອກິດຈະກຳຝຶກອົບຮົມພະນັກງານສົງທີ່ວັດສີສະເກດໄປແລ້ວຮອບໜຶ່ງການມອບຖວາຍເງິນໃຫ້ແກ່ໂຄງການນີ້ເປັນຮອບທີ່ສອງ“

  ຫຼັງຈາກນັ້ນ ພະຫຼັກແກ້ວ ມະຫາເຫວດ ມະເສໄນ ໄດ້ກ່າວຂອບໃຈ ອະນຸໂມທະນາວ່າ: “ຮູ້ສຶກດີໃຈທີ່ ມູນນິທິການສຶກສາສົງໄດ້ນຳເງິນມາມອບຖວາຍເພື່ອບູຊາຄຸນຂອງຍາທ່ານໃຫຍ່ ຊາລີ ກັນຕະສີໂລ ແລະເພື່ອບູຊາຄຣູວິປັດສະນາກັມມະຖານຄຣູເປັນຜູ້ມີບົດບາດສຳຄັນເປັນຜູ້ພັດທະນາຄົນພັດທະນາສັງຄົມພັດທະນາໂລກການທີ່ມູນນິທິເອົາປັດໄຈມາຖວາຍຖືວ່າຖືກ ຫຼືຖືກຍອດບຸນມາສົ່ງເສີມສ້າງບຸກຄະລາກອນມາສ້າງຊັບພະຍາກອນຂອງຊາດ”.

 ນອກຈາກນັ້ນພະຍອດ ຄຳບຸນ ທະວີ ປະສິດທິສັກ ຍັງໄດ້ກ່າວເຊີນຊວນອອກຕົນຍາດໂຍມຜູ້ມີຈິດສັດທາຮ່ວມສົມທົບທຶນເຂົ້າມູນນິທິສົ່ງເສີມການສຶກສາສົງໃຫ້ເຂັ້ມແຂງ ແລະທົ່ວເຖິງເຂດຫ່າງໄກ່ຊອກຫຼີກຍັງມີພະສົງສາມະເນນທີ່ຂາດເຂີນທຶນການສຶກສາ ແລະສິ່ງອຳນວຍຄວາມສະດວກອື່ນໆ.

• 01/12/2020