ນາຍ ແລະພົນທະຫານທີ່ຊ່ວຍເຫຼືອຜູ້ປະສົບໄພນໍ້າຖ້ວມໄດ້ຮັບໃບສັນລະເສີນ

  ໃນວັນທີ 27 ຕຸລາ 2020, ທີ່ສະໂມສອນກອງບັນຊາການ ປກຊ ເມືອງຊົນນະບູລີ ແຂວງສະຫວັນນະເຂດ ໄດ້ຈັດພິທີມອບ-ຮັບໃບສັນລະເສີນໃຫ້ນາຍ ແລະພົນທະ ຫານກອງຮ້ອຍຄໍ 35 ແລະກອງພັນ 588 ໃນການປະຕິບັດໜ້າທີ່ຊ່ວຍເຫຼືອຜູ້ປະສົບໄພພິບັດນໍ້າຖ້ວມໂດຍການເຂົ້າຮ່ວມເປັນປະທານຂອງທ່ານ ບົວຜັນ ສຸວັນນະແສງຮອງເລຂາພັກເມືອງຜູ້ຊີ້ນໍາວຽກພັກ-ພະນັກງານ, ທ່ານ ພັທ ສາຍສະໝອນ ໂສພັກດີ ຄະນະປະຈໍາພັກເມືອງຫົວໜ້າກອງບັນຊາການ ປກຊ ເມືອງພ້ອມດ້ວຍຄະນະ ພັກ-ຄະນະບັນຊາກອງຮ້ອຍຄໍ 35 ແລະກອງພັນ 588 ຕະຫຼອດຮອດນາຍ ແລະພົນທະຫານກອງບັນຊາການ ປກຊ ເມືອງເຂົ້າຮ່ວມ.

  ໃນພິທີ, ທ່ານ ຮທ ບຸນທະວີ ວິໄລວົງ ເສນາທິການກອງຮ້ອຍຄໍ 35 ໄດ້ຕາງໜ້າຂຶ້ນຜ່ານບົດລາຍງານການຈັດຕັ້ງປະຕິບັດພາລະກິດຊ່ວຍເຫຼືອພໍ່ແມ່ປະຊາຊົນຊາວ ເມືອງຊົນນະບູລີ ທີ່ກໍາລັງປະສົບກັບໄພພິບັດນໍ້າຖ້ວມໂດຍ ໃຫ້ຮູ້ວ່າ: ກອງຮ້ອຍຄໍ 35 ໄດ້ ເລີ່ມລົງປະຕິບັດວຽກງານຊ່ວຍຜູ້ປະສົບໄພນໍ້າຖ້ວມແຕ່ວັນທີ 14-26 ຕຸລາ 2020, ໃຊ້ເວລາ 14 ວັນ ຈຶ່ງສໍາເລັດ, ກອງຮ້ອຍຄໍ 35 ປະກອບມີ 28 ສະຫາຍ, ໃນການລົງຊ່ວຍເຫຼືອປະຊາຊົນແມ່ນໄດ້ແບ່ງເປັນ 3 ຈຸ, ຈຸລະ 7 ສະຫາຍ ຊຶ່ງໄດ້ຜັດປ່ຽນກັນໃນແຕ່ລະວັນ, ໃນນັ້ນສາມາດຊ່ວຍເຫຼືອເກັບກ່ຽວເຂົ້າ, ມັດເຂົ້າ, ຂົນເຂົ້າທີ່ກໍາລັງຈົມນໍ້າໄດ້ 40 ໄຮ່, ຊ່ວຍປະຊາຊົນປັ່ນເຂົ້າໄດ້ 250 ສອບ,ຊ່ວຍປະຊາຊົນຂົນເຄື່ອງອົບພະຍົບປະຊາຊົນອອກຈາກບ້ານທີ່ຖືກນໍ້າຖ້ວມໄດ້ 23 ຄັ້ງ,ຂົນເຄື່ອງຊ່ວຍເຫຼືອລົງແຈກຢາຍໃຫ້ປະຊາຊົນທີ່ໄດ້ຮັບຜົນກະທົບຕາມຈຸດພັກເຊົາຊົ່ວຄາວໄດ້ 15 ຄັ້ງ, ໄດ້ລົງຊ່ວຍປະຊາຊົນຂົນເຂົ້າອອກຈາກບ້ານທີ່ຖືກນໍ້າຖ້ວມໄດ້ 100 ສອບ ແລະ ລົງຍ້າຍເຮືອໄດ້ 2  ຄັ້ງ, ມາຮອດປະຈຸບັນນີ້, ການປະຕິບັດໜ້າທີ່ລົງຊ່ວຍເຫຼືອຜູ້ປະສົບໄພນໍ້າຖ້ວມແມ່ນໄດ້ຮັບຜົນສໍາເລັດ.

  ຕໍ່ກັບຜົນງານດັ່ງກ່າວນີ້, ກອງບັນຊາການ ປກຊ ເມືອງຊົນນະບູລີຈຶ່ງໄດ້ຈັດພິທີມອບ-ຮັບໃບສັນລະເສີນໃຫ້ກັບກອງຮ້ອຍຄໍ 35 ແລະກອງພັນ 588 ທີ່ມີຜົນງານດີເດັ່ນຈໍານວນ 28 ສະຫາຍ ໂດຍທ່ານ ພັທ ສາຍສະໝອນ ໂສພັກດີ ມອບໃຫ້ຢ່າງສົມກຽດ.

------------

ຂຽນໂດຍ:  ຂ່າວສະຫວັນ

ຮູບພາບ: ໜັງສືພິມເສດຖະກິດ-ສັງຄົມ

แชร์