ເຂື່ອນໄຟຟ້າຫ້ວຍລໍາພັນໃຫຍ່ ຈັດກິດຈະກຳສ້າງຄວາມສາມາດໃຫ້ນັກຮຽນ

  ໃນກາງເດືອນຕຸລາຜ່ານມາເຂື່ອນໄຟຟ້າຫ້ວຍລໍາພັນໃຫຍ່ໄດ້ຈັດກິດຈະກໍາສ້າງຄວາມສາມາດໃຫ້ນັກຮຽນມັດທະຍົມຕອນຕົ້ນບ້ານຫ້ວຍດຳໃໝ່ດ້ວຍການຖາມ-ຕອບຄວາມຮູ້ກ່ຽວກັບສິ່ງແວດລ້ອມຢູ່ທີ່ໂຮງຮຽນມັດທະຍົມຕອນຕົ້ນຂອງບ້ານດັ່ງກ່າວໂດຍໃຫ້ກຽດເຂົ້າຮ່ວມຂອງທ່ານ ສັນຕິສຸກ ສີພັນດອນຮອງຜູ້ອໍານວຍການເຂື່ອນໄຟຟ້າຫ້ວຍລໍາພັນໃຫ່ຍ, ມີທ່ານ ສົມພັນ ແດນອາເສ້ຍນາຍບ້ານ-ບ້ານຫ້ວຍດໍາໃໝ່, ທ່ານ ຄໍາພາ ປູລີຄໍາ ຜູ້ອໍານວຍການໂຮງຮຽນມັດທະຍົມຕົ້ນບ້ານຫ້ວຍດໍາໃໝ່, ພະນັກງານວິຊາການ, ຄູ-ອາຈານ ແລະນ້ອງນັກຮຽນ 90 ກວ່າຄົນເຂົ້າຮ່ວມ.

  ທ່ານ ສັນຕິສຸກ ສີພັນດອນຮອງຜູ້ອໍານວຍການເຂື່ອນໄຟຟ້າຫ້ວຍລໍາພັນໃຫ່ຍກ່າວວ່າ: ການຈັດກິດຈະກຳຄັ້ງນີ້ເພື່ອເຮັດໃຫ້ນ້ອງນັກ ຮຽນມີຄວາມຮັບຮູ້, ມີທັດສະນະຄະຕິທີ່ດີຕໍ່ສິ່ງແວດລ້ອມ ແລະຮູ້ຄຸນຄ່າຂອງສິ່ງແວດລ້ອມຫຼາຍຂຶ້ນ, ທັງເປັນເວທີ່ສະແດງຄວາມສາມາດ, ກ້າຄິດ, ກ້າສະແດງອອກຂອງນ້ອງນັກຮຽນອີກດ້ວຍ, ທັງນີ້ກໍເພື່ອເລັ່ງໃສ່ໂຄສະນາເຜີຍແຜ່ ແລະປູກຈິດສຳນຶກກ່ຽວກັບບັນຫາ ສິ່ງແວດ ລ້ອມໃຫ້ທົ່ວສັງຄົມຮັບຮູ້ ແລະເຂົ້າໃຈໂດຍສະເພາະແມ່ນການຫ້າມຖິ້ມຂີ້ເຫຍື້ອຊະຊາຍ, ຈູດຂີ້ເຫຍື້ອທີ່ເປັນມົນລະພິດ, ການຕັດໄມ້ທຳລາຍປ່າ ແລະບັນຫາອື່ນໆທີ່ສົ່ງຜົນກະທົບທາງກົງ ແລະທາງອ້ອມຕໍ່ສິ່ງແວດລ້ອມ, ເຮັດໃຫ້ໂຮງຮຽນມັດທະຍົມຕອນຕົ້ນບ້ານຫ້ວຍດໍາໃໝ່ເມືອງທ່າແຕງ ແຂວງເຊກອງ ກາຍເປັນໂຮງຮຽນສີຂຽວ, ໃນພິທີຄັ້ງນີ້ຍັງໄດ້ມອບອຸປະກອນກີລາປະເພດບານເຕະຈໍານວນ 2 ໜ່ວຍ, ບານສົ່ງ 2 ໜ່ວຍ, ກະຕໍ້ ຫວາຍ 2 ໜ່ວຍ, ໂມງຈັບເວລາ 1 ໜ່ວຍ, ໝາກຫວີດ 2 ໜ່ວຍ, ຕາໜ່າງ (ກະຕໍ້ຫວາຍ/ບານສົ່ງ) ຈໍານວນ 1 ໜ່າງ, ເປຕັງບັດເຫຼືອງ/ ບັດແດງຈໍານວນ 1 ຊຸດ, ເປຕັງ 4 ຊຸດ ແລະຊຸດກີລາຄູ-ອາຈານ-ນັກຮຽນຈໍານວນ 15 ຊຸດ ລວມມູນຄ່າທັງໝົດ 4 ລ້ານກວ່າກີບ.

  ທ່ານ ສົມພັນ ແດນອາເສ້ຍເລຂາພັກບ້ານຫ້ວຍດໍາໃໝ່ພ້ອມດ້ວຍຄູ-ອາຈານໄດ້ມອບໃບກຽດຕິຄຸນ ແລະສະແດງຄວາມຂອບໃຈຕໍ່ເຂື່ອນໄຟຟ້າຫ້ວຍລໍາພັນໃຫຍ່, ກໍ່ຄືບໍລິສັດຜະລິດໄຟຟ້າລາວມະຫາຊົນທີ່ໄດ້ຈັດກິດຈະກໍາຄັ້ງນີ້ໃຫ້ນ້ອງນັກຮຽນຮູ້ເຖິງຄວາມສຳຄັນກ່ຽວກັບສິ່ງ ແວດລ້ອມ ແລະມອບອຸປະກອນກີລາຈໍານວນໜຶ່ງໃຫ້ກັບໂຮງຮຽນມັດທະຍົມຕົ້ນບ້ານຫ້ວຍດໍາໃໝ່ຢ່າງມີຄວາມໜັກແໜ້ນ, ທັງນີ້ກໍ່ເພື່ອສົ່ງເສີມໃຫ້ນັກຮຽນຫັນມາຫຼິ້ນກີລາໃຫ້ຫຼາຍຂຶ້ນໂດຍປະສະຈາກໄກຈາກສິ່ງເສບຕິດອື່ນໆ.

----

ໂດຍ: ພອນ ບຸນອຸທິດ

แชร์