2 ພາກສ່ວນມອບຊຸດກີລາໃຫ້ພະແນກ ຖວທ ແຂວງສາລະວັນ

  ເພື່ອສ້າງຜົນງານສ້າງຂະບວນການຂໍ່ານັບຮັບຕ້ອນວັນສຳຄັນຕ່າງໆຂອງພັກຂອງຊາດເວົ້າລວມເວົ້າສະເພາະກໍ່ຄືວັນສື່ມວນລາວ ແລະການພິມຈຳໜ່າຍທີ່ໝູນວຽນມາຄົບຮອບ 70 ປີ (ວັນທີ 13 ສິງຫາ 1950-13 ສິງຫາ 2020), ມາໃນວັນທີ 13 ສິງຫາ 2020 ບໍລິສັດ ສັນຕິການໄຟຟ້າ ຈຳກັດ ແລະທີມລວມເພື່ອນ 95 ໄດ້ນຳເອົາເຄື່ອງກີລາຈຳນວນ 35 ຊຸດ ມູນຄ່າ 1 ລ້ານກວ່າກີບ,ມອບໃຫ້ພະແນກຖະແຫຼງຂ່າວ-ວັດທະນະທຳ ແລະທ່ອງທ່ຽວແຂວງສາລະວັນ,ໃຫ້ກຽດຮັບໂດຍທ່ານ ມະໄລວອນ ສີປະເສີດ ຮັກສາການຫົວໜ້າພະແນກຖວທແຂວງ, ພ້ອມດ້ວຍພະນັກງານການນຳຂອງພະແນກ ແລະພະນັກງານຫຼັກແຫຼ່ງເຂົ້າຮ່ວມ.

  ຊຸດກີລາທີ່ນຳມາມອບໃນຄັ້ງນີ້ແມ່ນໄດ້ມາຈາກການອຸປະຖໍາຂອງ ທ່ານ ນາງ ດາວມະນີ ປະສານສອນ ຕ່າງໜ້າບໍລິສັດສັນຕິການໄຟຟ້າຈໍາກັດມອບເສື້ອກີລາຈຳນວນ 15 ຊຸດມູນຄ່າ 7,5 ແສນກີບ ແລະຕາງໜ້າຂອງທ່ານ ອຸດົມສັກ ກັນລະຍາ, ທ່ານ ຄໍາລານ ນັດດາວົງ ທີມລວມເພື່ອນ 95 ມອບ ຊຸດກີລາ 20 ຊຸດ ມູນຄ່າ 8 ແສນກີບ.

 ຈາກນັ້ນທ່ານ ມະໄລວອນ ສີປະເສີດ ກໍ່ໄດ້ກ່າວສະແດງຄວາມຂອບໃຈ ແລະຍ້ອງຍໍຊົມເຊີຍມາຍັງພາກສ່ວນທີ່ໃຫ້ການອຸປະຖໍາເສື້ອກີລາເພື່ອສະເຫຼີມສະຫຼອງວັນສື່ມວນຊົນລາວ ແລະການພິມຈໍາໜ່າຍໃຫ້ເປັນຂະບວນການຟົດຟື້ນ.

--------------

ຂຽນໂດຍ: ທິດລານີ ໂຄດໂຍທາ

ຮູບພາບ: #ຫນັງສືພິມເສດຖະກິດສັງຄົມ

แชร์