ສນຮ ຊຽງຂວາງ ຈັດກອງປະຊຸມສຳຫຼວດຄວາມພ້ອມ ແລະຝຶກອົບຮົມວຽກງານຂໍ້ມູນຂ່າວສານ

 ເມື່ອບໍ່ດົນມານີ້ສູນການສຶກສານອກໂຮງຮຽນ (ສນຮ) ແຂວງຊຽງຂວາງ ໄດ້ຈັດຝຶກອົບຮົມວຽກງານຂ່າວສານຂຶ້ນຢ່າງເປັນທາງການທີ່ຫ້ອງປະຊຸມຂອງສູນດັ່ງກ່າວໂດຍການເປັນປະທານຂອງ ທ່ານ ທອງເພັດ ອິນທະໄຊ ຮອງຫົວໜ້າພະແນກສຶກສາທິການ ແລະກີລາແຂວງເປັນກຽດເຂົ້າຮ່ວມຂອງທ່ານ ກົງພັດ ສີລາວົງເພັດ ຫົວໜ້າຂະແໜງລຶບລ້າງຄວາມບໍ່ຮູ້ໜັງສື ແລະບຳລຸງຍົກລະດັບການສຶກສາ, ທ່ານ ຈັນທະວົງ ມະນີພອນ ຮອງອຳນວຍການສູນການສຶກສານອກໂຮງຮຽນພາກເໜືອ, ມີຫົວ ໜ້າຂະແໜງການສຶກສານອກໂຮງຮຽນ (ກສນ) ພະແນກ ສກຂ ແຂວງພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ.

   ທ່ານ ທອງເພັດ ອິນທະໄຊ ໄດ້ກ່າວເປີດພິທີເປັນທາງການພ້ອມທັງໄດ້ເນັ້ນໜັກໃຫ້ຄະນະຮັບຜິດຊອບໃນຊຸດຝຶກອົບຮົມຄັ້ງນີ້ຈົ່ງພ້ອມກັນເພີ່ມທະວີຄວາມຮັບຜິດຊອບໃນການຊຸກຍູ້ສົ່ງເສີມວຽກງານການຂ່າວສານຢູ່ພາຍໃນການສຶກສາໃຫ້ກ້າວໄກທັງໄດ້ຮັບຄຸນນະພາບເວົ້າລວມເວົ້າສະເພາະແມ່ນຢູ່ພາຍໃນສູນ ສນຮ ແຂວງໃຫ້ມີຄວາມເຕີບໃຫຍ່ເຂັ້ມແຂງຂຶ້ນເລື້ອຍໆ, ຊຶ່ງວຽກງານຂ່າວສານເປັນກະບອກສຽງທີ່ສຳຄັນໃນການໂຄສະນາເຜີຍແຜ່ຂໍ້ມູນໃຫ້ສັງຄົມຮັບຮູ້ຢ່າງທົ່ວເຖິງຈາກສູນກາງຫາທ້ອງຖິ່ນເພື່ອສະໜອງຂໍ້ມູນຕ່າງໆໃຫ້ກຸ່ມຄົນທີ່ດ້ອຍໂອກາດໄດ້ເຂົ້າເຖິງການສຶກສາບຳລຸງຍົກລະດັບເພື່ອລຶບລ້າງຄວາມບໍ່ຮູ້ໜັງສືຕາມແຜນຍຸດທະສາດຂອງກະຊວງສຶກສາທິການ ແລະກີລາວາງໄວ້.

  ຂະນະດຽວກັນທ່ານນາງ ເບຄຳ ສະເຫຼີມສຸກ ຜູ້ປະສານງານໂຄງການ DVV ທີ່ໃຫ້ທຶນສະໜັບສະໜູນໄດ້ຮຽກຮ້ອງໃຫ້ຄະນະຮັບຜິດຊອບ, ວິທະຍາກອນ, ບຸກຄະລາກອນຈົ່ງພ້ອມກັນເອົາໃຈໃສ່ຄົ້ນຄວ້າແລກປ່ຽນບົດຮຽນເຊິ່ງກັນ ແລະກັນເປັນຕົ້ນພື້ນຖານການຂຽນຂ່າວ,ຂຽນຈົດໝາຍຂ່າວ,ການນຳໃຊ້ກ້ອງຖ່າຍຮູບ ແລະສົ່ງຂ່າວຜ່ານອິນເຕີເນັດທີ່ສາມາດກະຈາຍເປັນເຄືອຂ່າຍຕາໜ່າງຂ່າວໃນວຽກງານການສຶກສານອກໂຮງຮຽນໃຫ້ຫຼາຍຂຶ້ນກວ່າເກົ່າ.

-----------

ໂດຍ: ສອນທະວີ ໂພສະລາດ

• 18/08/2020