ທພລ-ສຄອຊ ພ້ອມສ້າງເງື່ອນໄຂສູ່ແຫຼ່ງທຶນເອັສເອັມອີ

   ທະນາຄານພັດທະນາລາວ (ທພລ) ແລະສະພາການຄ້າ ແລະ ອຸດສາຫະກໍາແຫ່ງຊາດລາວ (ສຄອຊ) ໄດ້ຈັດຕັ້ງການພົບປະຫາລື ແລະໄດ້ຕົກລົງກັນຢ່າງເປັນທາງການກ່ຽວກັບການເປີດໂຕະໃຫ້ແກ່ຜູ້ປະກອບການທຸລະກິດຂະໜາດນ້ອຍ ແລະກາງ (SMEs) ໄດ້ເຂົ້າມາສອບຖາມການເຂົ້າເຖິງແຫຼ່ງທຶນຂອງ ທພລ ໄດ້ຢ່າງສະດວກ, ງ່າຍດາຍ ແລະ ວ່ອງໄວຊຶ່ງເປັນການຮັບໃຊ້ນະໂຍບາຍຂອງລັດຖະບານ ແລະໄດ້ເປັນນິມິດໝາຍທີ່ດີ ທີ່ຈະເຮັດໃຫ້ຜູ້ປະກອບການ ໃນພາກ SMEs ທີ່ກວມອັດຕາສ່ວນ ຫຼາຍກວ່າໝູ່ ໄດ້ສາມາດເຂົ້າເຖິງແຫຼ່ງທຶນ ໂດຍການພົບກັນລະຫວ່າງ ທພລ ແລະ ສຄອຊ ໄດ້ຈັດຂຶ້ນໃນວັນທີ 13 ກຸມພາ 2019 ທີ່ສໍານັກງານ ສຄອຊ ນະຄອນ ຫຼວງວຽງຈັນ ລະຫວ່າງທ່ານ  ອາຄົມ ປຣະເສີດ ຜູ້ອໍານວຍການໃຫຍ່ ທພລ ແລະທ່ານ ດາວວອນ ພະຈັນທະວົງ ຮອງ ປະທານ ສຄອຊ.

  ການພົບກັນລະຫວ່າງ 2 ພາກສ່ວນ ນີ້ ແມ່ນປະຕິບັດຕາມບົດບັນທຶກຊ່ວຍຈຳ (MOU) ຂອງທັງສອງຝ່າຍໃນເດືອນ ພຶດສະພາ 2018 ແລະໄດ້ມີການຈັດຕັ້ງ ປະຕິບັດຫຼາຍກິດຈະກຳຮ່ວມກັນເຊັ່ນ: ການຈັດສຳມະນາໃນຫົວຂໍ້: “ການເຂົ້າ ຫາແຫຼ່ງທຶນ” ແລະການເປີດໂຕະໃຫ້ຄໍາ ປຶກສາແກ່ຜູ້ປະກອບການທຸລະກິດຂະໜາດນ້ອຍ ແລະກາງ (SMEs) ທັງ ໃນນະຄອນຫຼວງວຽງຈັນ, ແຂວງຫຼວງ ພະບາງ ແລະຈະຂະຫຍາຍໄປແຂວງສະ ຫວັນນະເຂດ, ຈໍາປາສັກ ແລະແຂວງ ອື່ນໆຕື່ມອີກໃນຕໍ່ໜ້ານີ້ ແລະນັບແຕ່ນີ້ ເປັນຕົ້ນໄປ ການເປີດໂຕະໃຫ້ຄໍາປຶກສາ ແກ່ຜູ້ປະກອບການທຸລະກິດຂະໜາດນ້ອຍ ແລະກາງ (SME s) ຈະຈັດໃນວັນພຸດ ຂອງທຸກອາທິດ ຊຶ່ງໃຫ້ເວລາຫຼາຍຂຶ້ນ ແລະເມື່ອກ່ອນແມ່ນເດືອນລະຄັ້ງ.

 ການເປີດໂຕະໃຫ້ຄຳປຶກສາດັ່ງກ່າວໄດ້ເລີ່ມຈັດຕັ້ງປະຕິບັດມາ 3 ຄັ້ງ ຊຶ່ງເດືອນລະຄັ້ງຄື: ເດືອນກັນຍາ, ຕຸລາ, ພະຈິກ 2018 ລວມມີ 13 ຫົວໜ່ວຍທຸ ລະກິດເຂົ້າຮ່ວມ ແລະມີ 3 ຜູ້ປະກອບການໄດ້ມາພົວພັນກັບ ທພລ ເພື່ອປະກອບເອກະສານການຂໍກູ້ຢືມເພື່ອຂະຫຍາຍທຸລະກິດ ແລະປະຈຸບັນ ທພລ ໄດ້ອະນຸ ມັດເງິນກູ້ຢືມໃຫ້ລູກຄ້າແລ້ວ 1 ລາຍ ສ່ວນທີ່ເຫຼືອກໍ່ຍັງຢູ່ໃນຂັ້ນຕອນພິຈາລະນາ. ສໍາລັບການເປີດໂຕະໃຫ້ຄຳປຶກສາ 1 ມື້ ແກ່ຜູ້ປະກອບການກໍ່ເພື່ອເປັນກາ ນເປີດໂອກາດໃຫ້ຜູ້ປະກອບການທຸລະກິດ SMEs ສາມາດປຶກສາຫາລືກ່ຽວກັບຫຼາຍຫົວຂໍ້ເຊັ່ນ: ການເຂົ້າຫາແຫຼ່ງທຶນຂອງທະນາຄານ, ການຕະຫຼາດ, ການ ຄ້າ, ວຽກງານການລົງບັນຊີເປັນຕົ້ນໂດຍຈະມີພະນັກງານຈາກ ທພລ ແລະ ສຄອຊ ໃຫ້ຄຳປຶກສາ; ຫາກຜູ້ປະກອບການທ່ານໃດມີຄວາມສົນໃຈກະລຸນາເຂົ້າ ໄປປຶກສາຫາລືຕາມວັນ ແລະ ເວລາດັ່ງກ່າວ (ກໍານົດເວລາ 1 ຊົ່ວໂມງ ກັບ 30 ນາທີ / 1 ທ່ານ ຫຼື ວິສາຫະກິດໃນທຸກໆວັນພຸດ) ໂດຍບໍ່ມີຄ່າທໍານຽມໃດໆ; ກະລຸນາຕິດຕໍ່ພົວພັນໄດ້ທີ່ສູນໃຫ້ບໍລິການທຸລະກິດຂະໜາດນ້ອຍ ແລະກາງ (LNCCI SME Service Center; ໂທລະສັບ: 021-416266-7, 020 5954 8789, 020 9916 5564; ອີເມວ: [email protected]; smeservicec enter.laos @gmail.com

 ໂຄງການຮ່ວມມືທັງສອງຝ່າຍລະຫ່ວາງ ທພລ ແລະ ສຄອຊ ແມ່ນໜຶ່ງໃນໂຄງການພາຍໃຕ້ການຮ່ວມມືຂອງອົງການໄຈກ້າ (JICA) ໃນການຊຸກຍູ້ສົ່ງເສີມຂະແໜງການທຸລະກິດລະກິດ SMEs ໃນລາວ ແລະທັງເປັນການສ້າງຄວາມເຂັ້ມແຂງໃຫ້ຜູ້ປະກອບການທຸລະກິດໄດ້ມີທຶນເຂົ້າໃນການຜະລິດ ແລະທຸລະກິດປະກອບສ່ວນເຂົ້າໃນການພັດທະນາເສດຖະກິດ-ສັງຄົມແຫ່ງຊາດ (ແຜນການ 5 ປີ)ຄັ້ງທີ 8 (NSEDP).

ຂ່າວ: ຣັດສະໝີ ດວງສັດຈະ - ນສພ ເສດຖະກິດ-ສັງຄົມ    

แชร์