ເຂົ້າພັນສາ ງົດເຫຼົ້າເຊົາສຸລາໄດ້ເປັນທຳມະດາ ເພື່ອບຸນປາລະມີຂອງຕົນ

 ບຸນເຂົ້າພັນສາທຸກໆປີຖືເປັນໜຶ່ງໃນຮີດ 12 ຄອງ 14 ທີ່ມີຄວາມໝາຍສຳຄັນທາງພຸດທະສາສະໜາສຳພັນລາວ ຊຶ່ງໄດ້ປະຕິບັດ ສືບສານກັນມາແຕ່ບູຮານນະການ ສຳລັບຄົນລາວຊາວພຸດເຮົາທີ່ໄດ້ຖືເອົາພຸດທະສາສະໜາເປັນທີ່ເພິ່ງ ທາງໃຈ ແລະໄດ້ພ້ອມກັນຕັ້ງຈິດອະທິຖານໃນໄລຍະເຂົ້າພັນສານັ້ນ    ເພື່ອເສີມປາລະມີ, ສ້າງຄວາມດີ ແກ່ຕົນເອງ, ຄອບຄົວ ແລະສັງຄົມ ເພື່ອຄວາມຜາສຸກໃນຊາດນີ້ ແລະພົບໜ້າ.

 ພະອາຈານ ທະວີວົງ ແກ້ວມະນີວັນ ປະຈຸບັນສອນຢູ່ໂຮງຮຽນ ມສ ສົງ ວັດຫຼວງ ເມືອງສາມັກຄີໄຊ ແຂວງອັດຕະປື ໃຫ້ຮູ້ວ່າ: ໃນລະດູຝົນ ເປັນລະດູການ ຜະລິດກະສິກຳ ໂດຍສະເພາະແມ່ນການປູກພືດຕ່າງໆດັ່ງນັ້ນ, ການທ່ອງທ່ຽວໄປ-ມາຂອງພະສົງບໍ່ວ່າຈະເປັນການໄປເທສະໜາສັ່ງສອນປະຊາຊົນ ຫຼື ໄປທຳກິດຂອງສົງກໍໄດ້ຢຽບຍ່ຳຖືກເຄື່ອງປູກຂອງຝັງ ຂອງປະຊາຊົນຈົນຖືກຕຳນິສົ່ງ ຂ່າວຈາກປະຊາຊົນ ແລະເລື່ອງດັ່ງກ່າວກໍຖືກໄປຂາບທູນພະພຸດທະເຈົ້າ (ພຸດທະການຕອນຕົ້ນພະສົງຍັງບໍ່ໄດ້ເຂົ້າພັນສາ) ເພື່ອຕັດບັນຫານີ້ພະພຸດທະເຈົ້າກໍເລີຍຊົງກຳນົດໃຫ້ພະພິກຂຸສົງເມື່ອເຂົ້າລະດູຝົນໃຫ້ພະສົງຢູ່ກັບທີ່ຕັ້ງແຕ່ແຮມ 1 ຄໍ່າເດືອນ 8 ຈົນເຖິງຂຶ້ນ 15 ຄໍ່າເດືອນ 11 ໃຫ້ຢູ່ເປັນທີ່ເປັນບ່ອນ ບໍ່ໃຫ້ທ່ອງທ່ຽວໄປມາ ໂດຍສະເພາະແມ່ນຫ້າມໄປນອນແຮມຄືນທີ່ ອື່ນຖ້າໃຜຕ້ອງການຢາກຟັງເທດກໍໃຫ້ມາຫາພະສົງຢູ່ວັດມາເຮັດບຸນຢູ່ວັດນັ້ນເອີ້ນວ່າການເຂົ້າພັນສາ,ຖືໂອກາດທີ່ເກີດເປັນບັນຫານີ້ຊົງປ່ຽນຄຳກ່າວຫາໃຫ້ກາຍເປັນໂອກາດອັນດີຂອງພະພິກຂຸສົງເມື່ອພະພິກຂຸສົງຢູ່ປະຈຳວັດກໍຈະໄດ້ອົບຮົມສັ່ງສອນພະສົງທີ່ບວດໃໝ່ເພື່ອຈະໄດ້ຕັ້ງໜ້າສຶກສາຮໍ່າຮຽນຫຼັກທຳຄຳສອນທຸກມື້ຢ່າງຕໍ່ເນື່ອງ ແລະໄດ້ຮັບຜົນດີ.

 ປົກກະຕິໃນຍາມເຂົ້າພັນສາ ແບບນີ້ຊາວພຸດທະສະນິກະຊົນທັງປວງໄດ້ມີການເຊື່ອຖື ຫຼື ໂຄສະນາໃຫ້ງົດເຫຼົ້າຕອນເຂົ້າພັນສາເພິ່ນວ່າມັນດີຫຼາຍຢ່າງນີ້ແມ່ນຄວາມ ຈິງ: ບໍ່ເປືອງເງິນ, ເລີກການແລ້ວ ບໍ່ໄດ້ໄປຕໍ່ທາງອື່ນກັບມາຫາຄອບ ຄົວ, ຮັກສາສຸຂະພາບ, ອີກຢ່າງ ໜຶ່ງພວກທີ່ງົດດື່ມໃນເວລາເຂົ້າພັນສາມັກດື່ມໜັກສົ່ງທ້າຍກ່ອນເຂົ້າພັນສາ ແລະດື່ມໜັກຫຼັງອອກພັນສາຖືເປັນທຳລາຍສຸຂະພາບຫຼາຍກວ່າພວກບໍ່ງົດແຕ່ຄວນໃຫ້ດື່ມ ຕາມໂອກາດ ແລະເລືອກດື່ມຢ່າງ ພໍດີ, ການງົດເວັ້ນຈາກການດື່ມ ນໍ້າເມົາ ແລະສິ່ງເສບຕິດຕ່າງໆອັນ ລວມທັງຢາສູບ ແລະບາງຄັ້ງແມ່ນ ແຕ່ກາເຟກໍ່ຍັງຖືວ່າເປັນສິ່ງເສບຕິດຖ້າເຮັດໄດ້ແມ່ນເປັນຜົນດີຕໍ່ສຸຂະພາບຫຼາຍຢ່າງແນ່ນອນ.

 ອາຈານ ທະວີວົງ ແກ້ວມະນີວັນ ກ່າວວ່າ “ຕາມທັດສະນະທາງ ພະພຸດທະສາສະໜາວິທີປະຕິບັດເພື່ອໃຫ້ອາຍຸຍືນແມ່ນຕ້ອງຮັກສາສິນ 5 ໃຫ້ເປັນນິດຈະສິນ(ສິນທີ່ປະຕິບັດຢູ່ເປັນປະຈຳບໍ່ໄດ້ຂາດ) ໃນນັ້ນຂໍ້ສຳຄັນທີ່ຈະເຮັດໃຫ້ອາຍຸ ຍືນນັ້ນແມ່ນຂໍ້ທີ 1 ແລະຂໍ້ທີ 5, ການລວ່ງລະເມີດສິນຂໍ້ທີ 1 ຢູ່ ເລື້ອຍໆຈະເຮັດໃຫ້ອາຍຸສັ້ນ, ມີພະຍາດໂລຄາບຽດບຽນ, ສຳລັບຂໍ້ນີ້ ຈະເຮັດຄົນເຮົາລະເວັ້ນຈາກການ ບຽດບຽນກັນທາງກາຍ, ທາງວາຈາ ແລະທາງຈິດໃຈ, ການລ່ວງ ລະເມີດສິນຂໍ້ສຸດທ້າຍຄືສຸລາແມ່ນຈະເຮັດໃຫ້ຜູ້ດື່ມສຸລາຫຼາຍເປັນໂລກຄວາມຈຳເສື່ອມ,ໂລກກະເພາະ,ໂລກຕັບແຂງຖ້າດື່ມຢູ່ເລື້ອຍກໍ່ຈະເຮັດໃຫ້ສະຕິປັນຍາບໍ່ໝັ້ນຄົງທຸ່ນທ່ຽງ,ຮ້າຍດ່າລູກເມຍເປັນຫົນທາງນຳໄປສູ່ຄວາມປະໝາດ-ຂາດສະຕິເມື່ອຂັບລົດມັກເກີດອຸບັດເຫດ,ມີຄວາມຫຼົງຄອບງຳຈິດໃຈ,”ຊາວພຸດທີ່ດີຄວນປະຕິບັດສິນຢູ່ເປັນປະຈຳບໍ່ສະເພາະແຕ່ໄລຍະເວລາເຂົ້າພັນສາເທົ່ານັ້ນແຕ່ຖ້າເຮັດບໍ່ໄດ້ ແທ້ໆກໍ່ເອົາຕອນເຂົ້າພັນສາແຕ່ກໍ່ບໍ່ໝາຍຄວາມວ່າຫຼັງຈາກອອກພັນສາແລ້ວກໍ່ຈະລຸຍດື່ມເຫຼົ້າຢ່າງໃຫຍ່ເພື່ອຊົດເຊີຍເວລາທີ່ບໍ່ໄດ້ດື່ມຖ້າເຮັດແນວນັ້ນກໍ່ເປັນອັນວ່າຄວາມດີທີ່ສ້າງມາພາຍໃນເວລາເຂົ້າພັນສານັ້ນມະຫັບມະຫາຍໄປໝົດພາຍຫຼັງອອກພັນສາດີແທ້ຖ້າເລີກໄດ້ເລີຍກໍ່ເປັນການດີ, ການງົດເວັ້ນຈາກການດື່ມເຫຼົ້າ ແລະສິ່ງເສບຕິດຕ່າງໆອັນລວມທັງຢາສູບນີ້ກໍ່ເພື່ອເປັນຂອງຂວັນໃນວັນເຂົ້າພັນສາໃຫ້ກັບຕົວເອງ, ຄອບຄົວອີກ ດ້ວຍ.”

 ແນວໃດກໍ່ດີໃນໄລຍະເຂົ້າພັນສານີ້ແມ່ນໄລຍະໜ້າຝົນປະຊາຊົນລາວສ່ວນໃຫຍ່ມີອາຊີບກະສິກຳ ຊຶ່ງເຂົ້າພັນສາກໍ່ກົງກັນກັບລະດູແຫ່ງການຜະລິດຫາກວ່າເຮົາຜ່ອນຜັນ ຫຼື ປ່ອຍວາງການດື່ມແລ້ວ ຫັນໄປສູ່ທາງດ້ານການຜະລິດກໍ່ຈະເຮັດໃຫ້ທ່ວງທັນກັບລະດູການຜົນຜະລິດອອກມາກໍ່ຈະໄດ້ເຕັມເມັດ ເຕັມໜ່ວຍຫາກເຫຼືອກິນເຫຼືອເກັບ ກໍ່ນຳມາເປັນສິນຄ້າສ້າງເສດຖະກິດຄອບຄົວເພື່ອການພັດທະນາ ແລະສຸຂະພາບອີກດ້ວຍ (ຈະເລີນ ພອນ).

------

ໂດຍ: ມາລາທິບ

แชร์