5 ເດືອນກອງຄຸ້ມຄອງພາສີ V ເກັບລາຍຮັບໄດ້ພຽງ 26,96% ຂອງແຜນປີ

 ກອງຄຸ້ມຄອງພາສີ V ໄດ້ຮັບຕົວເລກແຜນການຈັດເກັບລາຍຮັບໃນປີ 2020 ນີ້ ຈໍານວນ 4.435 ຕື້ກີບ ກວມເອົາ 54,10% ຂອງລາຍຮັບພາສີທົ່ວປະເທດ, ຜ່ານການຈັດຕັ້ງປະຕິບັດຕົວຈິງໃນ 5 ເດືອນຜ່ານມາສາມາດປະຕິບັດໄດ້ 1.195 ຕື້ກວ່າກີບ ເທົ່າກັບ 26,95% ຂອງແຜນການປີ, ທຽບໃສ່ໄລຍະດຽວກັນຂອງປີຜ່ານມາຫຼຸດລົງ 405,97 ຕື້ກວ່າກີບ ຫຼືປະມານ 9,15%, ທັງນີ້ກໍຍ້ອນຫຼາຍສາເຫດເປັນຕົ້ນແມ່ນແຜນການຕົວເລກລາຍຮັບສູງ, ການນໍາເຂົ້າສິນຄ້າຫຼຸດລົງ, ການແຜ່ລະ ບາດຂອງພະຍາດໂຄວິດ 19 ແລະບັນຫາອື່ນໆອີກ.
  ທ່ານ ທອງພັດ ລາດຊະວົງ ຫົວໜ້າກອງຄຸ້ມຄອງພາສີ V ລາຍງານກອງປະຊຸມສະຫຼຸບຕີລາຄາການຈັດຕັ້ງປະຕິບັດວຽກງານວິຊາສະເພາະ 5 ເດືອນປີ 2020 ໃຫ້ຮູ້ວ່າ: ກອງຄຸ້ມຄອງພາສີ V ມີ 4 ແຂວງຂຶ້ນກັບຄື: ນະຄອນຫຼວງວຽງຈັນ, ແຂວງບໍລິຄຳໄຊ, ໄຊສົມບູນ ແລະແຂວງວຽງຈັນ, ປະກອບມີ 2 ຂະແໜງ, 2 ກອງກວດກາພາສີປະຈໍາແຂວງ, 15 ດ່ານພາສີຊາຍແດນຂຶ້ນກັບໃນນັ້ນ, ມີ 4 ດ່ານພາສີສາກົນ, 3 ດ່ານພາສີທ້ອງຖິ່ນ ແລະ 8 ດ່ານພາສີປະເພນີໃນໄລຍະ 5 ເດືອນປີ 2020 ກອງຄຸ້ມຄອງພາສີ V ໄດ້ຈັດຕັ້ງປະຕິບັດວຽກງານວິຊາສະເພາະຂອງຢ່າງຕັ້ງໜ້າໂດຍສະເພາະການຈັດເກັບລາຍຮັບເຂົ້າງົບປະມານແຫ່ງລັດ, ລົງຕິດຕາມກວດກາຂອງຄະນະກອງ, ຄະນະດ່ານພາສີຊາຍແດນ, ປັບປຸງແບບແຜນວິທີເຮັດວຽກ, ໄປຄຽງຄູ່ກັບການຈັດຕັ້ງປະຕິບັດບັນດາລະບຽບກົດໝາຍ, ນິຕິກຳຕ່າງໆ.


   ດ້ານວຽກງານວິຊາສະເພາະໃນປີ 2020 ກອງຄຸ້ມຄອງພາສີ V ໄດ້ຮັບຕົວເລກແຜນການຈໍານວນ 4.435 ຕື້ກີບ ກວມເອົາ 54,10% ຂອງລາຍຮັບພາສີທົ່ວປະ ເທດ, ຜ່ານການຈັດຕັ້ງປະຕິບັດ 5 ເດືອນປີ 2020 ສາມາດປະຕິບັດໄດ້ 1.195 ຕື້ກວ່າກີບ ເທົ່າກັບ 26,95% ຂອງແຜນການປີ, ຖ້າທຽບໃສ່ 5 ເດືອນປີຜ່ານມາຫຼຸດລົງ 405,97 ຕື້ກວ່າກີບ ຫຼືປະມານ 9,15% ໃນນັ້ນນະຄອນຫຼວງວຽງຈັນປະຕິບັດໄດ້ 1.039 ຕື້ກວ່າກີບ ເທົ່າກັບ 27,96% ຂອງແຜນການປີ, ແຂວງບໍລິຄໍາໄຊ ປະຕິບັດໄດ້ 153,63 ຕື້ກວ່າກີບ ເທົ່າກັບ 21,62% ຂອງແຜນການປີ, ແຂວງວຽງຈັນປະຕິບັດໄດ້ 1,6 ຕື້ກວ່າກີບ ເທົ່າກັບ 30,95% ຂອງແຜນການປີ.
  ທ່ານຫົວໜ້າກອງຄຸ້ມຄອງພາສີ V ໃຫ້ຮູ້ຕື່ມວ່າ: ສາເຫດທີ່ພາໃຫ້ການຈັດເກັບລາຍຮັບບໍ່ໄດ້ຕາມແຜນການຍ້ອນແຜນການຕົວເລກລາຍຮັບສູງກວມເອົາ 54,10% ຂອງລາຍຮັບພາສີທົ່ວປະເທດ, ການນໍາເຂົ້າສິນຄ້າເຄື່ອງຂອງເຫັນວ່າຫຼຸດລົງຖ້າທຽບໃສ່ປີຜ່ານມາ ແລະຍ້ອນການແຜ່ລະບາດຂອງພະຍາດໂຄວິດ-19 ເຮັດໃຫ້ການນໍາເຂົ້າສິນຄ້າ, ເຄື່ອງຂອງຫຼຸດລົງ, ດ່ານພາສີທ້ອງຖິ່ນ, ດ່ານພາສີປະເພນີຖືກປິດຊົ່ວຄາວ ແລະບັນຫາອື່ນໆ.
  ສະນັ້ນ,ເພື່ອເຮັດໃຫ້ການຈັດເກັບລາຍຮັບໃນປີ 2020 ຂອງກອງຄຸ້ມຄອງພາສີ V ທີ່ໄດ້ຮັບມອບໝາຍຈໍານວນ 4.435 ຕື້ກີບ, ຄະນະກອງຄຸ້ມຄອງພາສີ V,ຄະນະດ່ານພາສີຊາຍແດນໄດ້ວາງຫຼາຍມາດຕະການເປັນຕົ້ນ: ດ້ານການເມືອງ-ແນວຄິດໄດ້ເນັ້ນໃຫ້ສະມາຊິກພັກ-ພະນັກງານ ດ້ວຍຫຼາຍຮູບແບບໂດຍຖືເອົາແບບແຜນວິທີ ການເຄື່ອນໄຫວວຽກງານເປັນຫຼັກ, ປັບປຸງແບບແຜນວິທີເຮັດວຽກຂອງຄະນະກອງຄຸ້ມຄອງ, ກອງກວດກາພາສີປະຈໍາແຂວງ ແລະຂະແໜງສ້າງເປັນແຜນວຽກແຜນງານ, ແຕ່ງຄະນະຕິດຕາມກວດກາ, ກວດການຮອບດ້ານ, ແກ້ໄຂວຽກງານໃຫ້ມີຄວາມຄ່ອງໂຕໄວຂຶ້ນ, ມີການປຶກສາຫາລືເປັນເອກະພາບກັນ, ຮ່ວມກັນແກ້ໄຂໃຫ້ທ່ວງທັນເວລາ, ເລັ່ງທວງໜີ້ຄ້າງ IM8 ທີ່ສາມາດເກັບລາຍຮັບຄືນໄດ້ເພື່ອຊໍາລະສະສາງ, ສິນຄ້າຄ້າງສາງກາຍກໍານົດ, ຄະດີຄ້າງຊໍາລະສະສາງ, ພາຫະນະຮິບຄ້າງການປະ ມູນ ແລະອື່ນໆ ພ້ອມດຽວກັນນັ້ນ, ອໍານວຍຄວາມສະດວກໃຫ້ແກ່ຜູ້ປະກອບການ, ຈັດສັນສະຖານທີ່ບໍລິການວ່ອງໄວ, ນໍາໃຊ້ເຄື່ອງມືທີ່ທັນສະໄໝເຂົ້າໃນວຽກງານເປັນຕົ້ນລະບົບອາຊີກູດາ, ສະມາດແທັກ, ສະມາດແວັດ, ຄີອອດ, ລະບົບສາຍແສງສະແກນເນີ, ລະບົບແຈ້ງຜ່ານປະຕູດຽວ ແລະລະບົບ ບ53 ໃຫ້ເປັນຮູບປະທໍາ ແລະມີປະສິດທິຜົນ.

______________

ໜັງສືພິມເສດຖະກິດ-ສັງຄົມ

แชร์