ນາຍົກສືບຕໍ່ເຂົ້າຮ່ວມກອງປະຊຸມສຸດຍອດອາຊຽນກັບບັນດາຄູ່ເຈລະຈາ ທີ່ບາງກອກ

  ໃນວັນທີ 3 ພະຈິກ 2019 ທ່ານ ທອງລຸນ ສີສຸລິດ, ນາຍົກລັດຖະມົນຕີແຫ່ງ ສປປ ລາວ, ໄດ້ສືບຕໍ່ນຳພາຄະນະຜູ້ແທນແຫ່ງ ສປປ ລາວ ເຂົ້າຮ່ວມກອງປະຊຸມສຸດຍອດອາຊຽນຄັ້ງທີ 35 ແລະກອງປະຊຸມສຸດຍອດກັບບັນດາຄູ່ເຈລະຈາອາຊຽນຢູ່ບາງກອກ, ປະເທດໄທ: ກອງປະຊຸມສຸດຍອດອາຊຽນ-ຈີນ ຄັ້ງທີ 22, ກອງປະຊຸມສຸດຍອດອາຊຽນ-ອິນເດຍຄັ້ງທີ 16 ແລະກອງປະຊຸມສຸດຍອດອາຊຽນ-ສປຊ ຄັ້ງທີ 10.

ກອງປະຊຸມສຸດຍອດອາຊຽນ-ຈີນ ຄັ້ງທີ 22ໄດ້ສະແດງຄວາມຊົມເຊີຍຜົນ ສຳເລັດການພັດທະນາເສດຖະກິດ-ສັງຄົມ ສປຈີນ ໃນໂອກາດສະເຫຼີມສະຫຼອງຄົບ ຮອບ 70 ປີໃນເດືອນຕຸລາ 2019 ຜ່ານ ມາ, ກອງປະຊຸມຕີລາຄາສູງຕໍ່ຜົນການ ຈັດຕັ້ງປະຕິບັດແຜນປະຕິບັດງານອາ ຊຽນ-ຈີນ 2016-2020 ແລະສອງຝ່າຍ ຢືນຢັນຄືນຄວາມໝາຍໝັ້ນທີ່ຈະສືບຕໍ່ຮ່ວມມືກັນໃນໄລຍະຕໍ່ໜ້າຕື່ມ, ນອກນີ້ ກອງປະຊຸມໄດ້ສະແດງຄວາມຍິນດີຕໍ່ ໝາກຜົນຂອງການຈັດຕັ້ງປະຕິບັດກິດ ຈະກຳສະເຫຼີມສະຫຼອງປີແຫ່ງການ ແລກປ່ຽນ ແລະການຮ່ວມມືສື່ມວນຊົນ ອາຊຽນ-ຈີນປີ 2019 ແລະໄດ້ຮັບຮອງເອົາ 3 ຖະແຫຼງການຮ່ວມອາຊຽນ-ຈີນວ່າດ້ວຍການຮ່ວມມືໃນຂົງເຂດຕ່າງໆ ເຊັ່ນ: ດ້ານຕົວເມືອງອັດສະລິຍະ, ການຮ່ວມມືດ້ານສື່ມວນຊົນ ແລະການເຊື່ອມສານລະຫວ່າງແຜນແມ່ບົດວ່າດ້ວຍການເຊື່ອມຈອດອາຊຽນກັບຂໍ້ລິເລີ່ມໜຶ່ງແລວ, ໜຶ່ງເສັ້ນທາງຂອງຈີນເພື່ອເປັນການສົ່ງເສີມການເຊື່ອມໂຍງທາງເສດຖະກິດ, ການເຊື່ອມຈອດພາກພື້ນ ແລະການພົວພັນລະຫວ່າງປະ ຊາຊົນກັບປະຊາຊົນພ້ອມນີ້ໄດ້ຮັບເອົາປີ 2020 ເປັນປີແລກປ່ຽນອາຊຽນ-ຈີນ, ພິເສດຜູ້ນຳອາຊຽນໄດ້ຕົກລົງເຫັນ ດີຮັດແໜ້ນການຮ່ວມມືໃນອະນາຄົດໂດຍການມອບໝາຍໃຫ້ພາກສ່ວນກ່ຽວຂ້ອງຂອງອາຊຽນ ແລະຈີນເລີ່ມຕົ້ນການ ເຈລະຈາແຜນປະຕິບັດງານອາຊຽນ-ຈີນ ສະບັບໃໝ່ສໍໍາລັບປີ 2021-2025.

  ກອງປະຊຸມສຸດຍອດ ອາຊຽນ-ອິນ ເດຍຄັ້ງທີ 16 ໄດ້ຕີລາຄາສູງຕໍ່ຜົນສຳ ເລັດການຈັດຕັ້ງປະຕິບັດການພົວພັນຮ່ວມມືໃນປີຜ່ານມາໂດຍສະເພາະໄດ້ຈັດຕັ້ງຜັນຂະຫຍາຍແຜນປະຕິບັດງານ ອາຊຽນ-ອິນເດຍ ສຳລັບປີ 2016-2020 ແລະເນື້ອຈິດໃຈຂໍ້ລິເລີ່ມຕ່າງໆ ທີ່ຕົກລົງກັນໃນກອງປະຊຸມສຸດຍອດສະເຫຼີມສະຫຼອງການພົວພັນອາຊຽນ-ອິນ ເດຍ ຄົບຮອບ 25 ປີ, ພ້ອມນີ້ ກອງປະ  ຊຸມໄດ້ເຫັນດີໃຫ້ມີການເລີ່ມຕົ້ນຮ່າງແຜນ ປະຕິບັດງານອາຊຽນສະບັບໃໝ່ສຳລັບປີ 2021-2025, ຄຽງຄູ່ກັບການຈັດຕັ້ງປະຕິບັດແຜນປະຕິບັດງານອາຊຽນ-ອິນເດຍສຳລັບປິ 2016-2020 ຊຶ່ງຜູ້ນຳອາຊຽນ ແລະອິນເດຍໄດ້ຍິນດີໃຫ້ມີການເລີ່ມຕົ້ນເຈລະຈາແຜນປະຕິບັດງານອາຊຽນຈີນສະ ບັບໃໝ່ສໍາລັບປີ 2021-2025, ກອງປະຊຸມໄດ້ຢໍ້າຄືນຄວາມໝາຍໝັ້ນໃນການເພີ່ມທະວີ ແລະຮັດແໜ້ນການເປັນຄູ່ຮ່ວມຍຸດທະສາດ ແລະເນັ້ນໃສ່ການຮ່ວມມືໃນອະນາ ຄົດ ໃນຂົງເຂດຕ່າງໆເຊັ່ນ: ການຮ່ວມມືທາງທະເລ, ການເຊື່ອມຈອດ, ແນວຄວາມຄິດກ່ຽວກັບເສດຖະກິດສີຟ້າ (blue economy), ການລົງທຶນ, ການທ່ອງທ່ຽວ, ການຖ່າຍທອດເຕັກໂນໂລຊີໃໝ່, ນະວັດຕະກຳ ແລະອື່ນໆ.

ສະໜັບສະໜຸນໂດຍ: HONDA

  ໃນຕອນບ່າຍຂອງວັນດຽວກັນ, ທ່ານນາຍົກລັດຖະມົນຕີ ທອງລຸນ ສີສຸລິດ ຍັງໄດ້ສືບຕໍ່ນຳພາຄະນະຜູ້ແທນລາວເຂົ້າຮ່ວມກອງປະຊຸມສຸດຍອດອາຊຽນ-ສປຊ ຄັ້ງທີ 10, ຊຶ່ງກອງປະຊຸມໄດ້ສະແດງຄວາມເພິ່ງພໍໃຈຕໍ່ຄວາມຄືບໜ້າໃນການຈັດຕັ້ງປະຕິບັດການເປັນຄູ່ຮ່ວມມືອາຊຽນ-ສປຊ ໃນໄລຍະຜ່ານມາ, ໂດຍສະເພາະການຈັດຕັ້ງປະຕິບັດແຜນປະຕິບັດງານອາຊຽນ-ສປຊ (2016-2020), ຄຽງຄູ່ກັນນີ້ກອງປະຊຸມຍັງໄດ້ຊົມເຊີຍການພົບປະປະຈໍາປີລະຫວ່າງລັດຖະມົນຕີິຕ່າງປະເທດອາຊຽນ ແລະ ເລຂາ ທິການໃຫຍ່ ສປຊ ແລະ ປະທານກອງປະຊຸມສະມັດຊາໃຫຍ່ ສປຊ ໃນໂອກາດກອງປະຊຸມສະມັດຊາໃຫຍ່ ສປຊ ທີ່ນິວຢອກ, ຊຶ່ງການພົບປະດັ່ງກ່າວໄດ້ເປັນການປະກອບສ່ວນເຂົ້າໃນການສົ່ງ ເສີມ ແລະຮັດແໜ້ນການຮ່ວມມືລະຫວ່າງສອງອົງການຈັດຕັ້ງ, ນອກຈາກນີ້ ກອງ ປະຊຸມຍັງໄດ້ມີການປຶກສາຫາລືບັນຫາການປ່ຽນແປງຂອງດິນຟ້າອາກາດ ແລະໄພພິບັດທຳມະຊາດ, ຊຶ່ງເຫັນວ່າເປັນໄພຂົ່ມຂູ່ຕໍ່ສະຖຽນລະພາບ ແລະການພັດທະນາເສດຖະກິດ-ສັງຄົມ ຂອງບັນດາປະເທດໃນໂລກລວມທັງປະເທດສະມາ ຊິກອາຊຽນ, ພິດເສດກອງປະຊຸມ ຄັ້ງນີ້ໄດ້ຮັບຊາບເອກະສານແຜນປະຕິ ບັດງານເພື່ອການເສີມສ້າງເຊິ່ງກັນ ແລະ ກັນລະຫວ່າງວິໄສທັດປະຊາຄົມອາຊຽນ 2025 ແລະວາລະ ສປຊ 2030 ເພື່ອການພັດທະນາແບບຍືນຍົງແລະໄດ້ມີພິທີປະກາດເປີດນຳໃຊ້ສູນອາຊຽນເພື່ອປຶກສາຫາລື ແລະ ການສຶກສາດ້ານການພັດທະນາແບບຢືນຍົງອີກດ້ວຍ.

  ໃນວັນດຽວກັນນີ້, ທ່ານ ທອງລຸນ ສີສຸລິດ ພ້ອມດ້ວຍຄະນະຜູ້ແທນຍັງໄດ້ພົບປະສອງຝ່າຍກັບບັນດາຜູ້ນຳປະເທດເພື່ອນມິດເປັນຕົ້ນແມ່ນພົບປະສອງຝ່າຍກັບ ທ່ານ ຫຼີ ເຄີ້ສຽງນາຍົກລັດຖະມົນຕີ ແຫ່ງ ສປ ຈີນ, ສອງຝ່າຍໄດ້ຮ່ວມກັນປຶກສາຫາລືເພື່ອຊຸກຍູ້ສົ່ງເສີມການຮ່ວມມືສອງຝ່າຍດ້ານເສດຖະກິດ, ການຄ້າ-ການລົງທຶນ ແລະດ້ານອື່ນໆ ໃຫ້ຫຼາຍຂຶ້ນໃນອະນາຄົດ, ສອງຝ່າຍຍັງໄດ້ສະແດງຄວາມຢືນຢັນຈະສືບຕໍ່ຊຸກຍູ້ສົ່ງເສີມການພົວພັນແບບຄູ່ຮ່ວມຍຸດທະສາດຮອບດ້ານໝັ້ນຄົງຍາວນານຕາມທິດ 4 ດີ ແລະເປັນເພື່ອນສະຕາກຳທີ່ມຸ່ງໄປສູ່ອະນາຄົດແຫ່ງການຮ່ວມແຮງຮ່ວມໃຈ ແລະຮ່ວມກັນພັດທະນາພ້ອມທັງໃຫ້ຄວາມສຳຄັນແກ່ການແບ່ງປັນ, ເອື້ອເຟື້ອ ແລະການຊ່ວຍ ເຫຼືອເຊິ່ງກັນ ແລະກັນຖານມິດສະຫາຍອ້າຍນ້ອງຕ່າງຝ່າຍຕ່າງໄດ້ຮັບຜົນປະໂຫຍດ.

  ການມາເຂົ້າຮ່ວມກອງປະຊຸມສຸດຍອດອາຊຽນໃນຄັ້ງນີ້ນອກຈາກຈະໄດ້ພົບປະສອງຝ່າຍກັບການນຳຂອງ ສປ ຈີນແລ້ວ, ທ່ານນາຍົກລັດຖະມົນຕີ ທອງລຸນ ສີສຸລິດ ພ້ອມດ້ວຍຄະນະຍັງໄດ້ພົບປະສອງຝ່າຍກັບ ທ່ານ ດີມິຕຣີ ເມດເວເດບ ນາຍົກລັດຖະມົນຕີ ແຫ່ງສະຫະພັນຣັດເຊຍ, ຊຶ່ງສອງຝ່າຍສະແດງຄວາມຍິນດີສືບຕໍ່ເສີມຂະຫຍາຍສາຍພົວພັນມິດຕະພາບ ແລະຮັດແໜ້ນການພົວພັນຮ່ວມມືອັນດີງາມຂອງສອງຊາດໃຫ້ນັບມື້ຈະເລີນງອກງາມຂຶ້ນໄປເລື້ອຍໆ.

ສະໜັບສະໜຸນໂດຍ: ສ່ວນບຸກຄົນ

___________

ໜັງສືພິມເສດຖະກິດ-ສັງຄົມ

  • ບໍລິການໂຄສະນາທາງເຟສບຸກ ແລະເວັບໄຊ
  • ໂທ: 021 313645, 316511
  • App: 020 58707444

แชร์