ທາງລົດໄຟລາວ-ຈີນ ຊົດເຊີຍຜູ້ຖືກໂຄງການຢູ່ຫຼວງນໍ້າທາແລ້ວເຄິ່ງໜຶ່ງ

ໂຄງການກໍ່ສ້າງເສັ້ນທາງລົດໄຟລາວ-ຈີນ ຊ້ວງຜ່ານແຂວງຫຼວງນໍ້າທາງນັບແຕ່ມື້ລົງມືຈັດຕັ້ງປະຕິບັດເປັນຕົ້ນມາຫຼາຍໜ້າວຽກແມ່ນມີຄວາມຄືບໜ້າເປັນໄປຕາມແຜນການທີ່ວາງໄວ້ ໂດຍສະເພາະແມ່ນການກໍ່ສ້າງຂົວ, ເຈາະອຸໂມງ, ຕ້ານກັນເຈື່ອນ ແລະຄັນຄູທາງຂະນະທີ່ການຊົດເຊີຍຜົນກະທົບສີ່ງແວດລ້ອມກໍມີໝາກຜົນສຳເລັດໄປຕາມໆກັນເປັນຕົ້ນ 331 ຄອບຄົວ ທີ່ຖືກໂຄງການຮອດເວລານີ້ຄະນະຮັບຜິດຊອບໄດ້ຈ່າຍໃຫ້ສຳເລັດແລ້ວເຄິ່ງໜຶ່ງ.

  ທ່ານ ພັນທະຈອນ ແກ້ວລະຄອນ ຫົວໜ້າຫ້ອງການປະສານງານໂຄງການກໍ່ສ້າງເສັ້ນທາງລົດໄຟລາວ-ຈີນ ຊ້ວງຜ່ານແຂວງຫຼວງນໍ້າທາໄດ້ລາຍງານຄວາມຄືບຫນ້າຂອງການກໍ່ສ້າງຕໍ່ກອງປະຊຸມປຶກສາຫາລືວຽກງານຮ່ວມກັນຂອງຄະນະຮັບຜິດຊອບໂຄງການທີ່ຈັດຂຶ້ນໃນວັນທີ31 ຕຸລາຜ່ານມານີ້ວ່າ: ໂຄງການກໍ່ສ້າງທາງລົດໄຟລາວ-ຈີນເລີ່ມແຕ່ບໍ່ເຕ່ນຊາຍແດນລາວ-ຈີນ ຫານະຄອນຫຼວງວຽງຈັນ ມີຄວາມຍາວທັງໝົດ 409 ກິໂລແມັດ ແຕ່ສະເພາະແລວທາງຜ່ານ ແຂວງຫຼວງນໍ້າທາມີ 16,9 ກິໂລແມັດ, ໃນນີ້ປະກອບມີ 2 ສະຖານີຄື: ສະຖານີບໍ່ເຕ່ນເປັນສະຖານີສຳລັບຜູ້ໂດຍສານ ແລະ ສະຖານີນາເຕີຍເປັນສະຖານີໃຫຍ່ສຳລັບຜູ້ໂດຍສານ ແລະຄ່ຽນຖ່າຍສິນຄ້າ.

  ໂຄງການໄດ້ມີການກໍ່ສ້າງຂົວໃຫຍ່ຈໍານວນ 7 ແຫ່ງ ແລະເຈາະອຸໂມງ 3 ແຫ່ງຄື: ອຸໂມງມິດຕະພາບລາວ-ຈີນ, ອຸໂມງບໍ່ເຕນ ແລະອຸໂມງຕີນຕົກລວມຄວາມຍາວ 10.051 ແມັດ , ປະຕິບັດໄດ້ ແລ້ວ 9.056 ແມັດ ເທົ່າກັບ 90,1% ຊຶ່ງແມ່ນບໍລິສັດກໍ່ສ້າງທາງລົດໄຟເລກ 5 ແລະບໍລິສັດກໍ່ສ້າງທາງລົດໄຟເລກ 2 ເປັນຜູ້ຮັບເໝົາກໍ່ສ້າງຈາກ ສປ ຈີນ, ທີ່ກໍ່ສ້າງສັນຍາຊ່ວງທີ 1 ສ່ວນວຽກງານກໍ່ສ້າງເສົາຂົວ, ກໍ່ສ້າງຂາງຂົວ, ກໍ່ສ້າງຕ້ານກັນເຈີື່ອນ, ກໍ່ສ້າງຄັນຄູທາງ ແລະອື່ນໆມາເຖິງປະຈຸບັນໄດ້ສຳ ເລັດ ແລ້ວ 87% ແລະຄາດວ່າຈະໃຫ້ສໍາເລັດ ໃນທ້າຍປີ 2019 ນີ້ພ້ອມນັ້ນຍັງຈະໄດ້ ຕິດຕັ້ງລະບົບລາງລົດໄຟ ແລະຕິດຕັ້ງລະບົບໄຟຟ້າສະໜອງໄຟຟ້າໃຫ້ແກ່ຂະບວນລົດໄຟໃຫ້ສຳເລັດໃນທ້າຍປີ 2021 ຕາມແຜນການຂອງສອງລັດຖະບານລາວ-ຈີນໄດ້ກຳນົດໄວ້.

  ດ້ານທ່ານ ທອງແດງ ສິດທິສົນ ຫົວໜ້າຄະນະກຳມະການໄກ່ເກ່ຍແກ້ໄຂຜົນກະທົບ ແລະຄະນະເບີກຈ່າຍໂຄງການກໍ່ສ້າງເສັ້ນທາງລົດໄຟລາວ-ຈີນ ຊ້ວງຜ່ານແຂວງດຽວ ກັນກໍໄດ້ລາຍງານວ່າ: ການເບີກຈ່າຍເງິນຄ່າຊົດເຊີຍສິ່ງກີດຂວາງແຕ່ງວດທີ 1 ຫາງວດທີ 6 ໃຫ້ ແກ່ຜູ້ທີ່ໄດ້ຮັບຜົນກະທົບຈາກໂຄງການຜ່ານຫຼວງນໍ້າທາ ມີ 4 ບ້ານຄື: ບ້ານບໍ່ເຕ່ນ, ບໍ່ປຽດ, ຕີນຕົກ ແລະບ້ານນາເຕີຍລວມມີ 331 ຄອບຄົວ, ຊົດເຊີຍໄປແລ້ວ 168 ຄອບຄົວ, ລວມເງິນທັງໝົດທີ່ໄດ້ເບີກຈ່າຍແລ້ວ 102,1 ຕື້ກີບ, ຍັງເຫຼືອ 163 ຄອບຄົວ ຈະໄດ້ເບີກຈ່າຍຄ່າຊົດເຊີຍໃຫ້ຜູ້ທີ່ຖືກຜົນກະທົບໃນຄັ້ງຕໍ່ໄປສໍາລັບງວດທີ 6 ຍັງຈະຕ້ອງໄດ້ເບີກຈ່າຍຕື່ມອີກຈຳນວນເງິນ 16,4 ຕື້ກີບ ໃຫ້ແກ່ 35 ຄອບຄົວ.

ສະໜັບສະໜຸນໂດຍ: ສ່ວນບຸກຄົນ

__________

ຂຽນໂດຍ: ອຸ້ມ
ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

  • ບໍລິການໂຄສະນາທາງເຟສບຸກ ແລະເວັບໄຊ
  • ໂທ: 021 313645, 316511
  • App: 020 58707444

แชร์