ເກືອບ 70 ຫົວໜ່ວຍຈະນຳສິນຄ້າສວຍງາມຮ່ວມວ່າງສະແດງເຄື່ອງເຮືອນລາວ

ກຽມພົບກັບສິນຄ້າສວຍງາມຫຼາກຫຼາຍໃນງານວາງສະແດງເຄື່ອງເຮືອນລາວຄັ້ງທີ 4 ປະຈຳປີ 2019 ຊຶ່ງຈະເລີ່ມວາງຂາຍນັບແຕ່ວັນທີ 6 ກໍລະກົດ ເປັນຕົ້ນໄປແຕ່ມື້ເປີດຢ່າງເປັນທາງການແມ່ນຈະຈັດຂຶ້ນໃນວັນທີ 8 ແລະ ຈະດໍາເນີນໄປຈົນເຖິງວັນທີ 14 ກໍລະກົດ 2019 ທີ່ສູນການຄ້າລາວໄອ-ເຕັກນະຄອນຫຼວງວຽງຈັນມາຮອດປະຈຸບັນການກະກຽມຂອງຄະນະຮັບຜິດຊອບແມ່ນມີຄວາມພ້ອມ 100% ໂດຍຈະມີເກືອບ 70 ຫົວໜ່ວຍນຳສິນຄ້າເຂົ້າຮ່ວມວາງສະແດງ.

  ທ່ານ ກອງມາລາ ພົມມາໄລ, ຮອງປະທານສະມາຄົມເຟີນິເຈີລາວ, ຜູ້ຊີ້ນໍາການຈັດງານເປີດເຜີຍໃຫ້ຮູ້ວ່າ: ການຈັດງານຄັ້ງນີ້ຄາດຄະເນຈະມີມູນຄ່າຊື້-ຂາຍທັງໝົດ 70-80% ຈາກສິນຄ້າທີ່ມາຮ່ວມມູນຄ່າທັງໝົດ 10 ຕື້ກວ່າກີບ ໂດຍຄາດວ່າຈະມີຜູ້ຄົນເຂົ້າຊົມງານບໍ່ຫຼຸດ 2 ແສນຄົນທັງນີ້ກໍເພື່ອ

ປະຕິບັດຕາມນະໂຍບາຍໃນການສົ່ງເສີມທັງເປັນການໂຄສະນາເຜີຍແຜ່ໃຫ້ສັງຄົມຮັບຮູ້ຜະລິດຕະພັນເຄື່ອງເຮືອນລາວທີ່ຜະລິດຈາກໄມ້ຫຼາຍຂຶ້ນໃຫ້ຜູ້ຜະລິດສາມາດເຂົ້າຫາຕະຫຼາດ ແລະຈຳໜ່າຍສີນ ຄ້າໄດ້ທັງພາຍໃນ ແລະຕ່າງປະເທດກ້າວໄປສູ່ການສ້າງຕາໜ່າງການວາງສະແດງຂາຍສິນຄ້າກັບພາກພື້ນ ແລະສາກົນໄດ້ໃນອະນາຄົດ.

 ພ້ອມດຽວກັນນັ້ນກໍເພື່ອຜັນຂະຫຍາຍຕາມເນື້ອໃນຂອງຄໍາສັ່ງເລກທີ 15/ນຍ ໃຫ້ປາກົດຜົນເປັນຈິງ,ເປັນການອະນຸລັກຮັກສາປ່າໄມ້,ການນຳໃຊ້ໄມ້ໃຫ້ເກີດປະໂຫຍດສູງສຸດ ແລະມີໄມ້ໄວ້ໃຊ້ຢ່າງຢືນຍົງໂດຍການປຸງແຕ່ງໃຫ້ເປັນຜະລິດຕະພັນສຳເລັດຮູບຈາກໄມ້, ຫວາຍ ແລະໄມ້ປ່ອງໃຫ້ມີຫຼາກຫຼາຍຜະລິດຕະພັນຕາມທີ່ສັງຄົມປະຈຸບັນຕ້ອງການ ແລະ ເປັນທີ່ນິຍົມກັນຢູ່ດ້ວຍການນຳໃຊ້ເຕັກໂນໂລຊີທີ່ທັນສະໄໝ ແລະ ທັງເປັນການສ້າງມູນຄ່າເພີ່ມໃຫ້ກັບ

ຜະລິດຕະພັນເຟີນີເຈີໄມ້ລາວໃຫ້ກາຍເປັນສີນຄ້າທີ່ມີຄຸນນະພາບ ແລະ ລາຄາສູງຖືກຕາມຄວາມຕ້ອງການຂອງລູກຄ້າ ແລະ ຕະຫຼາດເຮັດໃຫ້ສາມາດສົ່ງອອກຕ່າງປະເທດໄດ້, ຍັງເປັນການສ້າງວຽກເຮັດງານທຳໃຫ້ກັບປະຊາຊົນບັນດາເຜົ່າ, ຕ້ານໄພວ່າງງານ ແລະຊ່ວຍໃຫ້ຫຼຸດພົ້ນຈາກຄວາມທຸກຍາກຕື່ມອີກໃນອະນາຄົດ.

ສຳລັບຫ້ອງວາງສະແດງມາຮອດປະຈຸບັນແມ່ນມີຫົວໜ່ວຍທຸລະກິດຈັບຈອງແລ້ວ 153 ຫ້ອງ ໂດຍຫົວຫນ່ວຍທຸລະກິດ ແລະ ໂຮງງານທີ່ຈະເຂົ້າຮ່ວມ 67 ຫົວ ໜ່ວຍຈາກ 11 ແຂວງ ນອກຈາກນີ້ຍັງມີຫົວໜ່ວຍທຸລະກິດໂອດັອບຈຳນວນໜຶ່ງຊຶ່ງກິດຈະກໍາໃນງານນອກຈາກການວາງສະແດງ-ຂາຍສິນຄ້າ, ຍັງ

ຈະມີການສາ ທິດຜະລິດເຄື່ອງເຮືອນລາວຈາກໄມ້ ແລະແກະສະຫຼັກໄມ້, ເຈົ້າສະຫຼາກຊິງລາງວັນ, ມີການສະແດງສີນລະປະຈາກນັກຮ້ອງນັກສະແດງຊື່ດັງຂອງປະເທດເປັນຕົ້ນແມ່ນມຸກດາວັນ ສັນຕິພອນ ຈົນຂອງຜົນງານເພງເອີ້ນອ້າຍໃສ່ໝໍ້ໜື້ງ ແລະອີກຫຼາກຫຼາຍກິດຈະກຳໂດຍເຊີນທຸກໆທ່ານເຂົ້າຮ່ວມຊົມ ແລະ ຊື້ສິນຄ້າໄດ້ ທ່ານ ກອງມາລາ ພົມມາໄລ ກ່າວ.

ພາບ ແລະຂ່າວຈາກ: ໜັງສືພິມເສດຖະກິດ-ສັງຄົມ

แชร์