ກອງປະຊຸມສະພາແຫ່ງຊາດຈະໄຂຂຶ້ນທິດໜ້າ

  ວັນທີ 30 ພຶດສະພາ 2019, ສະພາແຫ່ງຊາດ ທ່ານ ນາງ ສວນສະຫວັນ ວິຍະເກດ ກໍາມະການສໍາຮອງສູນກາງພັກ, ຄະນະປະຈໍາສະພາແຫ່ງຊາດ, ເລຂາ ທິການສະພາແຫ່ງຊາດໄດ້ຖະແຫຼງຂ່າວຕໍ່ສື່ມວນຊົນກ່ຽວກັບການຈັດກອງປະຊຸມສະໄໝສາມັນເທື່ອທີ 7 ຂອງສະພາແຫ່ງຊາດ ຊຸດທີ VIII ຊຶ່ງຈະໄດ້ໄຂຂຶ້ນໃນຕອນເຊົ້າຂອງວັນພຸດທີ 5 ມິຖຸນາ ແລະຈະດໍາເນີນໄປເຖິງວັນອັງຄານ, ວັນທີ 25 ມິຖຸນາ 2019 ທີ່ຫ້ອງປະຊຸມສະພາແຫ່ງຊາດ (ຫຼັກ 6), ນະຄອນ ຫຼວງວຽງຈັນ ຊຶ່ງຈະໃຊ້ເວລາດໍາເນີນກອງປະຊຸມທັງໝົດ 15 ວັນ ໂດຍກອງປະຊຸມດັ່ງກ່າວໄດ້ຍົກເອົາຫຼາຍບັນຫາຂຶ້ນມາປຶກສາຫາລືເພື່ອພິຈາລະນາຮັບຮອງ.

  ທ່ານ ນາງ ສວນສະຫວັນ ວິຍະເກດ ກ່າວວ່າ: ກອງປະຊຸມຄັ້ງນີ້ຈະໄດ້ຮັບຟັງການລາຍງານ, ພິຈາລະນາ ແລະຕົກລົງບັນຫາສຳຄັນຕ່າງໆເປັນຕົ້ນແມ່ນບົດ ລາຍງານຂອງລັດຖະບານກ່ຽວກັບສະພາບພົ້ນເດັ່ນໃນການຈັດຕັ້ງປະຕິບັດວຽກງານຂອງລັດຖະບານ; ບົດລາຍງານກ່ຽວກັບຜົນການປະຕິບັດມະຕິກອງປະຊຸ ມສະພາແຫ່ງຊາດ, ບົດລາຍງານກ່ຽວກັບການພັດທະນາຊັບພະຍາກອນມະນຸດທີ່ຕິດພັນກັບການພັດທະນາເສດຖະກິດ-ສັງຄົມໃນແຕ່ລະໄລຍະໂດຍສະເພາະການສ້າງຊັບພະຍາກອນມະນຸດໃຫ້ໄປຕາມຂະແໜງການບຸລິມະສິດເປັນຕົ້ນວິຊາການສະເພາະດ້ານໃນສາຂາວິຊາກະສິກໍາ, ຄູ ແລະ ພະຍາບານເພື່ອສາມາດຕອບສະໜອງໃຫ້ແກ່ການພັດທະນາປະເທດຊາດ ແລະແກ້ໄຂຄວາມທຸກຍາກ; ບົດລາຍງານການຈັດຕັ້ງປະຕິບັດຄໍາຕັດສິນຂອງສານ;ບົດລາຍງານວຽກງານທ່ອງທ່ຽວຕິດພັນ ກັບການຈັດຕັ້ງປະຕິບັດປີທ່ອງທ່ຽວ ລາວ-ຈີນ ປີ 2019; ການຊີ້ແຈງກ່ຽວກັບການຄຸ້ມຄອງ, ການອອກໃບຕາດິນຊໍ້າຊ້ອນໃນໄລຍະຜ່ານມາ ແລະມາດຕະການແກ້ໄຂໃນຕໍ່ໜ້າ; ການຊີ້ແຈງກ່ຽວກັບການຟື້ນຟູປ່າໄມ້ ແລະປູກປ່າທົດແທນທີ່ຕິດພັນກັບການນຳໃຊ້ງົບປະມານຈາກໂຄງການພັດທະ ນາໄຟຟ້າ-ບໍ່ແຮ່ ແລະ ທຶນຊ່ວຍເຫຼືອຈາກຕ່າງປະເທດ; ເອົາບົດລາຍງານກ່ຽວກັບການຕິດຕາມກວດກາການປະຕິບັດກົດໝາຍຂອງອົງການສືບສວນ-ສອບສວນຕາມມາດຕາ 42  ຂໍ້ 2 ຂໍ້ 5 ແລະ 6 ຂອງກົດໝາຍວ່າດ້ວຍອົງການໄອຍະການປະຊາຊົນ, ວຽກງານການສ້າງ ແລະ ປັບປຸງກົດໝາຍຈໍານວນ 10 ສະ ບັບນຳອີກ.

  ທ່ານ ນາງ ສວນສະຫວັນ ວິຍະເກດ ກ່າວຕື່ມວ່າ: ປະຊາຊົນສາມາດສົ່ງຄຳຄິດຄຳເຫັນ ແລະຄຳສະເໜີມາຍັງກອງປະຊຸມໂດຍຜ່ານໂທລະສັບສາຍດ່ວນໂດຍ ບໍ່ເສຍຄ່າໝາຍເລກ 156, ໂທລະສານໝາຍເລກ 021 413528, ສົ່ງເປັນຈົດໝາຍທາງໄປສະນີຕູ້ ປນ 662 ແລະສົ່ງອີເມວ: [email protected].

ພາບ ແລະຂ່າວໂດຍ: ໜັງສືພິມເສດຖະກິດ-ສັງຄົມ

แชร์