ຖວທ​ ແຂວງຈໍາປາສັກ​ ມີຄວາມພ້ອມໃນການດໍາເນີນກອງປະຊຸມໃຫຍ່ ຄັ້ງທີ​ VI

ກອງປະຊຸມໃຫຍ່ ຄັ້ງທີ​ VI ຂອງຄະນະພັກຮາກຖານພະແນກ​ຖະແຫຼງຂ່າວ,​ ວັດທະນະທຳ​ ແລະ​ ທ່ອງທ່ຽວ​ (ຖວທ)​ ແຂວງຈໍາປາສັກ​ ຈະເປີດຂຶ້ນໃນທ້າຍເດືອນກຸມພາ 2025​ ນີ້.​ ປັດຈຸບັນ​ ການກະກຽມແຕ່ລະດ້ານແມ່ນມີຄວາມພ້ອມ 100%.
ສະຫາຍ ປອ.ວັນນະໄຊ​ ຊາດຕະກຸນ​ ກໍາມະການພັກແຂວງ​ ເລຂາຄະນະພັກຮາກຖານ​ ຫົວໜ້າ​ພະແນກ​ ຖວທ​ ແຂວງ​ຈໍາປາສັກ​ ໃຫ້ສໍາພາດໃນວັດທີ 19​ ກຸມພາ​ 2025​ ນີ້ວ່າ: ການກະກຽມຄວາມພ້ອມໃນການດໍ່ເນີນກອງປະຊຸມໃຫຍ່​ ຄັ້ງທີ​ VI​ ຂອງຄະນະ​ອົງຄະນະ​ພັ​ກ​ຮາກຖານ​ພະແນກ​ ຖວທ​ ແຂວງ​,​ ມາຮອດປະຈຸບັນ,​ ວຽກງານແຕ່ລະດ້ານແມ່ນມີຄວາມພ້ອມແລ້ວ,​ ໃນນັ້ນ​ ດ້ານເນື້ອໃນ​ ໄດ້ຮ່າງບົດລາຍງານການເມືອງທັງ 2 ພາກສໍາເລັດ 100% ເຊິ່ງເນື້ອໃນ ໄດ້ສະຫຼຸບການນໍາພາຈັດຕັ້ງປະຕິບັດ​ມະຕິກອງປະຊພມໃຫຍ່​ ຄັ້ງທີ​ V ຂອງຄະນະພັກ​ຮາກຖານ​ (2020 - 2024) ທັງຕີລາຄາ​ ແລະ​ ຖອດຖອນບົດຮຽນຜົນການຈັດຕັ້ງປະຕິບັດ, ຊອກໃຫ້ເຫັນສາເຫດ,​ ຈຸດດີ,​ ຈຸດອ່ອນ, ຂໍ້ຄົງຄ້າງ​ ເພື່ອເປັນບ່ອນອີງໃນການວາງຄາດໝາຍສູ້ຊົນ ແລະ ກຳນົດບັນດາທິດທາງໜ້າທີ່ລວມ ໃນ​ 5 ປີຕໍ່ໜ້າ ຢ່າງຖືກຕ້ອງ, ສອດຄ່ອງກັບຈຸດພິເສດ ແລະ ທ່າແຮງຂອງພະແນກ​ ຖວທ​ ແຂວງ​.​ ດ້ານບຸກຄະລະກອນ,​ ໄດ້ສໍາເລັດການທາບທາມບຸກຄະລາກອນເຂົ້າໂຄງປະກອບຄະນະພັກຮາກຖານ​ ຮອບທີ III​ ​ແລ້ວ.​ ດ້ານຂະບວນການຕ່າງໆ​ ກໍໄດ້ຊຸກຍູ້ສະມາຊິກພັກ, ພະນັກງານ​ - ລັດຖະກອນ​ ເອົາໃຈໃສ່ການຮັກສາອະນາໄມ ແລະ ການປ້ອງກັນເວນຍາມສໍານັກງານຫ້ອງການ ເພື່ອຮັບປະກັບເຮັດໃຫ້ມີຄວາມສະຫງົບ, ຄວາມເປັນລະບຽບຮຽບຮ້ອຍໃນ ທົ່ວ​ຄະນະພັກຮາກຖານ.
ການຈັດຕັ້ງ​ປະຕິບັດ​ວຽກງານ​ວິຊາສະເພາະ​ ໃນ​ 5 ປີຜ່ານມາ ໂດຍສະເພາະແມ່ນ 3 ວຽກ ຄື: ວຽກຖະແຫຼງຂ່າວ -​ ສື່ມວນຊົນ,​ ວຽກງານ​ຂົງເຂດວັດທະນະທໍາ ແລະ​ ວຽກງານການທ່ອງທ່ຽວ,​ ໃນນັ້ນ ວຽກຖະແຫຼງຂ່າວ​ - ສື່ມວນຊົນ,​ ໄດ້ເອົາໃຈໃສໃນການຄຸ້ມຄອງ, ຕິດຕາມການເຄື່ອນໄຫວວຽກງານຕ່າງໆດ້ານຖະແຫຼງຂ່າວຢ່າງເຂັ້ມງວດ​ ໃຫ້ເຄື່ອນໄຫວໄປຕາມລະບຽບກົດໝາຍ,​ ນິຕິກຳຕ່າງໆທີ່ວາງອອກໃນແຕ່ລະໄລຍະ​ ເຮັດໃຫ້ຫົວໜ່ວຍທຸລະກິດທີ່ເຄື່ອນໄຫວດ້ານຖະແຫຼງຂ່າວ​ ມີຄວາມເປັນລະບຽບຮຽບຮ້ອຍ; ປັບປຸງ​, ຫັນປ່ຽ​ນ​ລະ​ບົບ​ເຕັກ​ນິກ​ຂອງວຽກ​ງານ​ສື່ມວນ​ຊົນ​ກ້າວ​ໄປ​ສູ່​ທັນ​ສະ​ໄໝ​ ໂດຍນໍາໃຊ້ລະ​ບົບ​ດີ​ຈິ​ຕ້ອນ; ໄດ້ນໍາພາ -​ ຊີ້ນຳ ຂະແໜງການສື່ມວນຊົນທຸກປະເພດນັບແຕ່ຂັ້ນແຂວງ ແລະ ເມືອງ ເອົາໃຈໃສ່ເຮັດໜ້າທີ່ໂຄສະນາໃຫ້ແກ່ເຫດການສຳຄັນຂອງພັກ - ຂອງຊາດ ແລະ ສາກົນ, ປັບປຸງບັນດາເນື້ອໃນຂອງສື່ມວນຊົນ ໃຫ້ສ່ອງແສງຄວາມເປັນຈິງບໍ່ວ່າເຫດການທີ່ເກີດຂຶ້ນ​ຢູ່ພາຍໃນແຂວງ, ຕ່າງແຂວງ ແລະ ຕ່າງປະເທດ, ສ້າງຄວາມຮັບຮູ້​ -​ ເຂົ້າໃຈຕໍ່ເຫດການ, ສະພາບການເຄື່ອນໄຫວໃນຊີວິດການເມືອງ,​ເສດຖະກິດ, ວັດທະນະທຳ - ສັງຄົມໃຫ້ແກ່ທົ່ວສັງຄົມ, ຮັບປະກັນຄວາມຖືກຕ້ອງດ້ານຂໍ້ມູນຂ່າວສານ, ໃຫ້ສາລະຄວາມຮູ້, ສຶກສາອົບຮົມປຸກລະດົມ ໂດຍຜ່ານຫຼາຍຊ່ອງທາງ,​ ຫຼາຍເຄື່ອຂ່າຍ ດ້ວຍຄວາມວ່ອງໄວ, ຊັດເຈນ, ທົ່ວເຖິງກວ່າເກົ່າ ທັງໃຫ້ຄຳຕອບຕໍ່ບັນຫາທີ່ສັງຄົມສົນໃຈຫຼາຍຂຶ້ນ; ຕອບຕ້ານປາກົດການຫຍໍ້ທໍ້, ຕີຖອຍເລ່ກົນມ້າງເພທຳລາຍຂອງອິດທິກຳລັງປໍລະປັກ​ ແລະ ຖ້ອຍທຳນອງໂຄສະນາໂຈມຕີ​ ໂດຍນໍາໃຊ້ພາຫະນະສື່ມວນຊົນ​ຂອງແຂວງ​ ຄື: ວິທະຍຸ, ໂທລະພາບ ແລະ​ ໜັງສືພິມຈຳປາໃໝ່​ ເຊິ່ງມີທັງເພຈ,​ ເຟຊບຸກ​ ແລະ​ ຢູທູບ ທີ່ແທດເໝາະກັບແຕ່ລະເປົ້າໝາຍ ດ້ວຍຮູບການນໍາສະເໜີມີຫຼາຍຮູບ, ຫຼາຍສີ ດຶງດູດຄວາມສົນໃຈຂອງຜູ້ອ່ານ, ຜູ້ຟັງ ແລະ ຜູ້ເບີ່ງໄດ້ດີສົມຄວນ​ ເຮັດໃຫ້ສາມາດຕອບຕ້ານຕໍ່ການໃສ່ຮ້າຍປ້າຍສີຂອງກຸ່ມຄົນບໍ່ດີ ໄດ້ໃນລະດັບໜື່ງ.
ວຽກງານຂົງເຂດວັດທະນະທຳ,​ ໄດ້ຕັ້ງໝ້າປຸກລະດົມຊຸກຍູ້ຂະບວນການສົ່ງເສີມຊີວິດວັດທະນະທຳ,​ ສິລະປະວັນນະຄະດີ, ຂະນົບທຳນຽມ​ -​ ຮີດຄອງປະເພນີອັນດີງາມຂອງທ້ອງຖິ່ນ,​ ຂອງເຜົ່າຕ່າງໆ​ ເຊັ່ນ: ການສະແດງສິລະປະວັນນະຄະດີ, ການບູລະນະປະຕິສັງຂອນວັດວາອາຮາມ, ສະຖານບູຮານ, ວັດຖຸບູຮານທີ່ເປັນມໍລະດົກວັດທະນະທຳ ໂດຍສົມທົບກັບຂະແໜງການກ່ຽວຂ້ອງເຫັນໄດ້ວ່າ ຊີວິດວັດທະນະທຳ​ - ສັງຄົມຂອງແຂວງ​ ໃນປະຈຸບັນມີລັກສະນະຊາດກ້າວໝ້າຕາມຍຸກສະໄໜ,​ ວຽກງານວັດທະນະທໍາ​ ໄດ້ຮັບການພັດນະນາຄຽງຄູ່ກັບດ້ານເສດຖະກິດ,​ ສະກັດກັ້ນກະແສວັດທະນະທຳພາຍນອກຊອດກະຈາ​ ທີ່ຈະແຜ່ລາມເຂົ້າທໍາລາຍວັດທະນະທໍາອັນດີງາມຂອງທ້ອງຖິ່ນ​ ກໍຄືຂອງຊາດ. ເປັນເຈົ້າການຊຸກຍູ້ໃນທຸກຂະບວນການກິດຈະກຳຕ່າງໆຂອງແຂວງ​ ກໍຄືບັນດາເມືອງໃນການຈັດກິດຈະກຳງານບຸນປະເພນີຂອງປະຊາຊົນບັນດາເຜົ່າ; ໄດ້ເອົາໃຈໃສ່ຄຸ້ມຄອງຜູ້ປະກອບການທາງດ້ານວັດທະນະທຳ ໂດຍສະເພາະການອອກອະນຸຍາດສ້າງຕັ້ງ ແລະ ສືບຕໍ່ໂຮງພິມ,​ ຄະນະໝໍລຳເລື້ອງ,​ ວົງດົນຕີ,​ ປ້າຍ,​ກິດຈະກຳສົ່ງເສີມການຂາຍ​ ພາຍໃຕ້ລະບຽບກົດໝາຍ​ ໂດຍໄດ້ສຸມໃສ່ການຜັນຂະຫຍາຍບັນດານິຕິກໍາ, ລະບຽບການ, ຂໍ້ກຳນົດກົດໝາຍໂດຍການໂຄສະນາຜ່ານສື່ວິທະຍຸ​ - ໂທລະພາບ, ໜັງສືພິມ​ ແລະ​ ໂຄສະນາຜ່ານສື່ອອນລາຍຕ່າງໆ​ ເພື່ອໃຫ້ລະບຽບການດັ່ງກ່າວໄດ້ອອກສູ່ສັງຄົມຢ່າງທົ່ວເຖິງ​ ແລະ​ ທັນການ.​ ວຽກງານມໍລະດົກໂລກວັດພູຈຳປາສັກ​ ໄດ້ເອົາໃຈໃສ່ໃນການຕິດຕາມ​ກວດກາ​ສະພາບ​ໂຄງ​ສ້າງ​ຂອງ​ອາຄານ​ສະຖາປັດຕະຍະກຳ​ເກົ່າ​ແກ່ ​ແລະ ບັນດາຮ່ອງຮອຍທາງ​ດ້ານ​ວັດທະນະທຳ ​ແລະ ທຳ​ມະ​ຊາດ​ອັນ​ເປັນ​ອົງ​ປະກອບ​ຂອງ​ມໍລະດົກ​ໂລກໃຫ້​ຄົງ​ຢູ່​ກັບ​ສະພາບ​ເດີມ ​ແລະ ມີ​ຄວາມ​ຍືນ​ຍົງ​ຕະຫຼອດ​ໄປ; ປະສານສົມທົບກັບກົມມໍລະດົກໂລກ ແລະ UNESSCO ເພື່ອປັບປຸບແຜນການຄຸ້ມຄອງມໍລະດົກໂລກວັດພູໃນແຕ່ລະປີ; ເຂົ້າຮ່ວມເຮັດວຽກກັບອົງການຈັດຕັ້ງສາກົນຕ່າງໆເຊັ່ນ: ໂຄງການຮ່ວມມືລາວ​ - ຝຣັ່ງ,​ໂຄງການຝຣັ່ງ​ ເພື່ອການພັດທະນາ,​ ໂຄງການຈໍາປາ,​ ໂຄງການຮ່ວມມືລາວ​ - ອີນເດຍ,​ ໂຄງການຮ່ວມມືລາວ​ - ສ.ເກົາຫຼີ​ ໃນການຄຸ້ມຄອງ, ປົກປັກຮັກສາ,​ ຂຸດຄົ້ນ,​ ບູລະນະສ້ອມແປງ,​ ສ້າງຄວາມດຶງດູດໃຫ້ແກ່ມໍລະດົກທາງດ້ານວັດທະນະທຳ; ເປັນເຈົ້າການໃນການຄຸ້ມຄອງປົກປັກຮັກສາວັດຖຸບູຮານທີ່ວາງສະແດງໃນຫໍພິພິທະພັນແລະໃນສາງເກັບມ້ຽນວັດຖຸບູຮານໃຫ້ຢູ່ໃນສະພາບປົກກະຕິແລະມີຄວາມປອດໄພຮອບດ້ານ.
ວຽກງານທ່ອງທ່ຽວ​ ແຕ່ຕົ້ນປີ​ 2020​ -​ ກາງປີ 2022​ ຢູ່​ ສປປ​ ລາວ​ ໄດ້ມີການລະບາດຂອງພະຍາດໂຄວິດ​ 19,​ ພາຍຫຼັງ​ທີ່​ລັດ​ຖະ​ບານ​ສາ​ມາດ​ຄວບ​ຄຸມການລະບາດຂອງພະຍາດໂຄວິດ - 19​ ໄດ້​ ແລະ​ ມີ​ມາ​ດ​ຖະ​ການ​ຜ່ອນ​ຜັນເປີດ​ປະ​ເທດ​ເລີ່ມ​ແຕ່​ເດືອນ​ພຶດ​ສະ​ພາ 2022 ​ເປັນ​ຕົ້ນ​ມາ ເຮັດໃຫ້ບັນ​ຍາ​ການ​ໃນ​ການ​ທ່ອງ​ທ່ຽວ​​ເລີ່ມ​ດີ​ຂຶ້ນ​ເລື່ອຍໆ​ ເຊີ່ງໄລ​ຍະ​ຕົ້ນ​ ໄດ້ສຸມ​ໃສ່​ການ​ຟື້ນ​ຟູ,​ປັບ​ປຸງ​ປົວ​ແປງຍົກ​ລະ​ດັບ​ຄວາມ​ສາ​ມາດ​ທາງ​ດ້ານ​ການ​ບໍ​ລິ​ການ,​ ເປີດຊ່ອງທາງທ່ຽວທ່ຽວສີຂຽວ​ ເພື່ອຮອງຮັບການດຶງດູດ,​ ການເຜີຍແຜ່ ແລະ ຝຶກອົບຮົມໃຫ້​ຜູ້​ປະ​ກອບ​ການ​ທຸ​ລະ​ກິດ​ທ່ອງ​ທ່ຽວ (lao safe) ເພື່ອ​ສ້າງ​ຄວາມ​ເຊື່ອ​ໜັ້ນແລະ​ ຮັບປະກັນຄວາມປອດໄພຈາກພະຍາດໂຄວິດ-19​ ໃຫ້ແກ່ນັກທ່ອງທ່ຽວ, ຕິດ​ພັນ​ກັບ​ການ​ເຮັດ​ການ​ໂຄ​ສະ​ນາ​ການ​ທ່ອງ​ທ່ຽວ​ ເພື່ອ​ດືງ​ດູດ​ນັດ​ທ່ອງ​ທ່ຽວ​ເຂົ້າ​ມາ​ໃຫ້​ຫຼາຍ​ຂຶ້ນ.​ ໃນ​ແຜນ 5 ປີ(2021​ - 2025),​ ຄາດວ່າຈະມີນັກທ່ອງທ່ຽວ ທັງພາຍໃນ ແລະ ຕ່າງປະເທດ​ ເຂົ້າມາທ່ຽວ​ແຂວງຈໍາປາສັກ​ ຈຳນວນ 1.162.686 ເທື່ອຄົນ,​ ຜ່ານ​ຈັດ​ຕັ້ງ​ປະ​ຕິ​ບັດນະໂຍບາຍສົ່ງເສີມການທ່ອງທ່ຽວພາຍໃນ “ ລາວທ່ຽວລາວ​ ” ແລະ​ ນະໂຍບາຍການເປີດປິ​ທ່ອງ​ທ່ຽວ 2024 ແຕ່ປີ​ 2021​ - 2024),​ ມີນັກທ່ອງທ່ຽວທັງໝົດ​ 889.635 ເທື່ອຄົນ,​ ທຽບໃສ່ແຜນ 5 ປີ​ ທີ່ສະພາຮັບຮອງ 1.162.686 ເທື່ອຄົນ,​ ປະຕິບັດໄດ້​ 77%, ສາມາດສ້າງລາຍຮັບໄດ້ທັງໝົດ​ 162.172.110 ໂດລາສະຫະລັດ​ ແລະ​ ຄາດ​ໜາຍ​ໝົດ​ປີ​ 2025​ ຈ​ະ​ບັນ​ລຸ​​ໄດ້ຕາມ​ແຜນ​ທີ່​ກຳ​ນົດ​ໄວ້.​
ສະຫາຍ​ ປອ.​ວັນນະໄຊ​ ຊາດຕະກຸນ​ ກ່າວຕອນທ້າຍອີກວ່າ: ທິດທາງແຜນການເຄື່ອນໄຫວນຳພາ​ - ຊີ້ນຳ​ ໃນ​ 5 ປີຕໍ່ໜ້າ, ຄະນະພັກຮາກຖານ​ພະແນກ​ ຖວທ​ ແຂວງ​ ຈະສືບຕໍ່ເອົາໃຈໃສ່ນໍາພາດ້ານການເມືອງ​ -​ ແນວຄິດ, ປັບປຸງການຈັດຕັ້ງ,​ ລະບອບແບບແຜນວິທີເຮັດວຽກ, ຍົກລະດັບຄວາມຮູ້ທາງດ້ານການເມືອງ, ຄຸນສົມບັດສິນທຳປະຕິວັດ,​ ນ້ຳໃຈຮັກຊາດ, ຮັກບ້ານເກີດເມືອງນອນ, ຄວາມຮູ້ດ້ານວິຊາສະເພາະ ແລະ ພາສາຕ່າງປະເທດ; ສືບຕໍ່ປັບປຸງຍົກລະດັບພື້ນຖານເຕັກນິກຂອງສື່ມວນຊົນ, ປັບປຸງເນື້ອໃນລາຍການ - ຄໍລຳ ໃຫ້ມີຫຼາຍສີສັນ ແລະ ມີສ່ວນຮ່ວມຂອງສັງຄົມ ເພື່ອສ້າງໃຫ້ສື່ມວນຊົນມີຄວາມເຂັ້ມແຂງ, ປົກປັກຮັກສາ, ສົ່ງເສີມ ແລະ ຟື້ນຟູມໍລະດົກວັດທະນະທຳທາງວັດຖຸ ແລະ ຈິດໃຈອັນຊົງຄຸນຄ່າຂອງຊາດ, ທ້ອງຖິ່ນ; ພັດທະນາການທ່ອງທ່ຽວໃຫ້ມີຄວາມຍືນຍົງຕາມທິດສົ່ງເສີມການທ່ອງທ່ຽວທຳມະຊາດ, ວັດທະນະທຳ ແລະປະຫວັດສາດ ເຮັດໃຫ້ແຂວງຈຳປາສັກເປັນທີ່ຮັບຮູ້ ແລະ ເປັນຈຸດໝາຍປາຍທາງຂອງນັກທ່ອງທ່ຽວຢ່າງກວ້າງຂວາງ; ສືບຕໍ່ປັບປຸງດ້ານການເງິນງົບປະມານ ເພື່ອໃຫ້ມີລາຍຮັບປະກອບໃຫ້ການເຄື່ອນໄຫວວຽກງານມີຄວາມຄ່ອງຕົວ, ເອົາໃຈໃສ່ຮັກສາຄວາມສະຫງົບປອດໄພ, ຄວາມເປັນລະບຽບຮຽບຮ້ອຍ ແລະ ຄວາມສະອາດສວຍງາມຂອງສຳນັກງານ; ສືບຕໍ່ການພົວພັນຮ່ວມມືກັບຕ່າງປະເທດຕາມທິດຕ່າງຝ່າຍຕ່າງມີຜົນປະໂຫຍດ ເພື່ອປະກອບສ່ວນເຂົ້າໃນການຈັດຕັ້ງປະຕິບັດມະຕິກອງປະຊຸມໃຫຍ່​ ຂອງພັກ​ ແລະ​ ແຜນພັດທະນາເສດຖະກິດ​ -​ ສັງຄົມ​ລັດ​ ແລະ​ ຂອງແຂວງ​ ໃຫ້ນັບມື້ເຕີບໃຫຍ່ຂະຫຍາຍຕົວ.
ຂ່າວ​-ພາບ​: ທູນທອງໃຈ​

แชร์