ທ່ານ ພົນໂທ ສຸວອນ ເລືອງບຸນມີ ຮອງປະທານສະພາແຫ່ງຊາດ ໄດ້ຖະແຫຼງຂ່າວກ່ຽວກັບຜົນສຳ ເລັດການພິຈາລະນາບົດລາຍງານຂອງລັດຖະບານກ່ຽວກັບການ​ຈັດ​ຕັ້ງ​ປະ​ຕິ​ບັດວຽກງານ 3 ສ້າງ ຕາມມະຕິ ກອງປະຊຸມສະພາແຫ່ງຊາດ, ສະບັບເລກທີ 02/ສພຊ, ລົງວັນທີ 28 ມັງກອນ 2016 ວ່າດ້ວຍການຈັດຕັ້ງປະຕິບັດວຽກ ງານສ້າງແຂວງເປັນຫົວໜ່ວຍຍຸດທະສາດ, ສ້າງເມືອງເປັນຫົວໜ່ວຍເຂັ້ມແຂງຮອບດ້ານ ແລະ ສ້າງບ້ານເປັນຫົວໜ່ວຍພັດທະນາ ໃນກອງປະຊຸມສະໄໝສາມັນ ເທື່ອທີ 8 ຂອງສະພາແຫ່ງຊາດ ຊຸດທີ IX, ໃນວັນທີ 27 ພະຈິກນີ້ວ່າ: ກອງປະຊຸມ ໄດ້ສະແດງຄວາມຊົມເຊີຍຕໍ່ລັດຖະບານ ທີ່ໄດ້ມີຄວາມພະຍາຍາມ ໃນການຈັດຕັ້ງປະຕິບັດວຽກງານ 3 ສ້າງ ຕາມມະຕິ ກອງປະຊຸມສະພາແຫ່ງຊາດ ເລກທີ 02/ສພຊ, ລົງວັນທີ 28 ມັງກອນ 2016 ກ່ຽວກັບການຈັດຕັ້ງປະຕິບັດວຽກງານສ້າງແຂວງເປັນຫົວໜ່ວຍຍຸດທະສາດ, ສ້າງເມືອງເປັນຫົວໜ່ວຍເຂັ້ມແຂງຮອບດ້ານ ແລະ ສ້າງບ້ານເປັນຫົວໜ່ວຍພັດທະນາ ຊຶ່ງວຽກງານສາມສ້າງ ແມ່ນແນວທາງ ແລະ ທິດນຳ ຂອງພັກເຮົາ ໃນການສ້າງຄວາມເຂັ້ມແຂງໃຫ້ແກ່ທ້ອງຖິ່ນ-ຮາກຖານ, ເປົ້າໝາຍແມ່ນການເສີມຂະຫຍາຍສິດເປັນເຈົ້າ ຂອງທ້ອງຖິ່ນ-ຮາກຖານ ຊຶ່ງຕ້ອງມີການມອບສິດ, ມອບຄວາມຮັບຜິດຊອບດ້ານການບໍລິຫານລັດ ແລະ ດ້ານການຄຸ້ມຄອງເສດຖະກິດ-ສັງຄົມ ກໍຄືດ້ານຜົນປະໂຫຍດ ໃຫ້ທ້ອງຖິ່ນ ເພື່ອໃຫ້ມີຄວາມສາມາດ ແລະ ເປັນເຈົ້າການຫຼາຍຂຶ້ນ. ສະນັ້ນ, ກົມການເມືອງສູນກາງພັກ ຈຶ່ງອອກມະຕິ ເລກທີ 03/ກມສພ, ລົງວັນທີ 15 ກຸມພາ 2012 ເປັນທິດນຳ ເພື່ອເພີ່ມທະວີບົດບາດການນຳພາຂອງພັກ ເພື່ອເສີມຂະຫຍາຍຄວາມເປັນເຈົ້າການ ແລະ ຄວາມຮັບຜິດ ຊອບ ໃນການຄຸ້ມຄອງເສດຖະກິດ-ສັງຄົມ ຂອງອົງການປົກຄອງທ້ອງຖິ່ນ ແລະ ລັດຖະບານ ກໍໄດ້ສືບຕໍ່ອອກມະຕິ, ນິຕິກຳຕ່າງໆ ເພື່ອໃຫ້ບັນດາກະຊວງ, ອົງການ ແລະ ຂະແໜງການຕ່າງໆເປັນບ່ອນອີງໃນການຈັດຕັ້ງຜັນຂະຫຍາຍ ເປັນອັນລະອຽດ ແລະ ໄດ້ຈັດຕັ້ງເຮັດທົດລອງ ຢູ່ໃນ 109 ເປົ້າໝາຍ ຢູ່ 51 ເມືອງ ແລະ ໄດ້ສະຫຼຸບສັງລວມລາຍງານການເຮັດທົດລອງ ຕໍ່ກອງປະຊຸມສະໄໝສາມັນ ເທື່ອທີ 10 ຂອງສະພາແຫ່ງຊາດ ຊຸດທີ VII, ກອງປະຊຸມໄດ້ຄົ້ນຄວ້າພິຈາລະນາ ອອກມະຕິ ສະບັບເລກທີ 02/ສພຊ, ລົງວັນທີ 28 ມັງ ກອນ 2016 ວ່າດ້ວຍການຮັບຮອງເອົາບົດລາຍງານ ຂອງລັດຖະບານ ກ່ຽວກັບການຈັດຕັ້ງປະຕິບັດເຮັດທົດລອງວຽກງານສ້າງແຂວງເປັນຫົວໜ່ວຍຍຸດທະສາດ, ສ້າງເມືອງເປັນຫົວໜ່ວຍເຂັ້ມແຂງຮອບດ້ານ ແລະ ສ້າງບ້ານເປັນຫົວໜ່ວຍພັດທະນາ; ຮັບຮອງເອົາຄາດມາຍສູ້ຊົນ ແລະ ທິດທາງ ເພື່ອສືບຕໍ່ຈັດຕັ້ງປະຕິບັດວຽກງານ 3 ສ້າງ ໃນຕໍ່ໜ້າຕາມການສະເໜີ ຂອງລັດຖະບານ.