ນາຍົກລັດຖະມົນຕີ ຊີ້ແຈງການແກ້ໄຂບັນຫາເງິນເຟີ້

ໃນວາລະກອງປະຊຸມສະໄໝສາມັນ ເທື່ອທີ 8 ຂອງສະພາແຫ່ງຊາດ ຊຸດທີ IX, ຄັ້ງວັນທີ 26 ພະຈິກ 2024, ພາຍໃຕ້ການເປັນປະທານຂອງທ່ານ ປອ ໄຊສົມພອນ ພົມວິຫານ ກຳມະການກົມການເມືອງສູນກາງພັກ, ປະທານສະພາແຫ່ງຊາດ, ທ່ານ ສອນໄຊ ສີພັນດອນ ນາຍົກລັດຖະມົນຕີ ໄດ້ຊີ້ແຈງຂໍ້ຊັກຖາມຂອງ ສະພາແຫ່ງຊາດ, ສະມາຊິກສະພາແຫ່ງຊາດ ກ່ຽວກັບການແກ້ໄຂບັນຫາເງິນເຟີ້ ຂອງລັດຖະບານ.
ຕໍ່ບັນຫາດັ່ງກ່າວ ທ່ານ ສອນໄຊ ສີພັນດອນ ໄດ້ຊີ້ແຈງວ່າ: ລັດຖະບານ ໄດ້ສຸມໃສ່ແກ້ໄຂບັນຫາເງິນເຟີ້ຕະຫຼອດມາ ຊຶ່ງເຮັດໃຫ້ອັດຕາເງິນເຟີ້ ມີທ່າອ່ຽງຫຼຸດລົງຫຼາຍ ທຽບໃສ່ປີຜ່ານມາ, ມາດຕະການສ່ວນໜຶ່ງ ກໍໄດ້ລາຍງານໄປແລ້ວ ແລະ ທ່ານ ຮັກສາການຜູ້ ວ່າການທະນາຄານແຫ່ງ ສປປ ລາວ ກໍໄດ້ຊີ້ແຈງແລ້ວ, ເຖິງຢ່າງໃດກໍຕາມ ຂ້າພະເຈົ້າ ຂໍຢືນຢັນຕື່ມ ຕໍ່ບັນດາມາດຕະການຕ່າງໆ ໃນຕໍ່ໜ້າ ເພື່ອສືບຕໍ່ແກ້ໄຂບັນເງິນເຟີ້ໃຫ້ຫຼຸດລົງ ຢູ່ໃນລະດັບ 1 ຕົວເລກ ຕາມຄາດໝາຍ ຫຼື ໃກ້ຄຽງກັບ 1 ຕົວເລກທີ່ສຸດ ຕາມທີ່ສະມາຊິກສະພາແຫ່ງຊາດ ໄດ້ມີຄຳເຫັນ ໂດຍລັດຖະບານ ຈະສຸມໃສ່ປະຕິບັດມາດຕະການດັ່ງນີ້:
1). ຮັກສາສະຖຽນລະພາບຂອງຄ່າເງິນກີບ ດ້ວຍການຈະສືບຕໍ່ຈັດຕັ້ງປະຕິບັດ ນະໂຍບາຍເງິນຕາ ໃນທິດທາງທີ່ຮັດກຸມ ໂດຍສືບຕໍ່ຄົ້ນຄວ້າພິຈາລະນາ ການດັດປັບອັດຕາດອກເບ້ຍ ພື້ນຖານ ໃຫ້ແທດເໝາະກັບສະພາບໃນແຕ່ລະໄລຍະ ເພື່ອຄວບຄຸມການຂະຫຍາຍຕົວຂອງປະລິ ມານເງິນ M2 ແລະ ປ້ອງກັນການຂາດສະຖຽນລະພາບທາງການເງິນ.
2). ຈະໄດ້ຄົ້ນຄວ້າກໍານົດເພດານອັດຕາດອກເບ້ຍ ທັງເງິນກູ້ ແລະ ເງິນຝາກ ເປັນເງິນຕາ ຕ່າງປະເທດ ແນໃສ່ ເພື່ອຍົກສູງຄວາມຕ້ອງການໃນການຖືຄອງເງິນກີບ ແລະ ຫຼຸດຜ່ອນ ຄວາມຕ້ອງການຖືຄອງເງິນຕາຕ່າງປະເທດ.
3). ສືບຕໍ່ຄຸ້ມຄອງສະຖາບັນການເງິນ ໃຫ້ມີຄວາມໝັ້ນທ່ຽງ ແລະ ພັດທະນາລະບົບຊຳລະ ໃຫ້ ທັນສະໄໝໂດຍສຸມໃສ່ຄວບຄຸມອັດຕາແລກປ່ຽນ ຕາມກົນໄກຕະຫຼາດ, ຊຸກຍູ້ການແລກ ປ່ຽນເງິນຕາ ຜ່ານ ຕະຫຼາດ LFX ແລະ ພັດທະນາການເຄື່ອນໄຫວ ຂອງຕະຫຼາດດັ່ງກ່າວ ໃຫ້ກວ້າງຂວາງ, ຫຼາກຫຼາຍຮູບການ ເພື່ອຕອບສະໜອງຄວາມຕ້ອງການຂອງສັງຄົມ. ນັບທັງພັດທະນາລະບົບການຊຳລະສະສາງຂ້າມແດນດ້ວຍເງິນສະກຸນທ້ອງຖິ່ນກັບປະເທດໃກ້ຄຽງ.
4). ສືບຕໍ່ຄຸ້ມຄອງເງິນຕາຕ່າງປະເທດ ໃຫ້ເຂົ້າສູ່ລະບົບທະນາຄານໃຫ້ຫຼາຍຂຶ້ນ ໂດຍສະເພາະ ແມ່ນການສົ່ງອອກ-ນໍາເຂົ້າສິນຄ້າ ຕ້ອງຜ່ານການຊຳລະສະສາງຜ່ານບັນຊີຢູ່ທະນາຄານທຸລະ ກິດ ຕິດພັນກັບການດັດສົມບໍລິສັດນໍາເຂົ້າ-ສົ່ງອອກໃຫ້ຢູ່ໃນຈໍານວນທີ່ເມາະສົມ ເອົາໃຈໃສ່ ຄຸ້ມຄອງລາຍຮັບເງິນຕາຕ່າງປະເທດ ຈາກການສົ່ງອອກ, ການລົງທຶນຈາກຕ່າງປະເທດ, ການ ຊ່ວຍເຫຼືອທາງການເພື່ອການພັດທະນາ (ODA), ການບໍລິການຜ່ານ/ຂ້າມແດນ, ການທ່ອງ ທ່ຽວ, ລາຍຮັບຂອງແຮງງານທີ່ໄປອອກແຮງງານຢູ່ຕ່າງປະເທດ ແລະ ຄົນເຊື້ອຊາດລາວຢູ່ ຕ່າງປະເທດຝາກມາໃຫ້ພີ່ນ້ອງ-ຄອບຄົວ ແລະ ມູນນິທິການຊ່ວຍເຫຼືອຕ່າງໆ. ແລະ ຈຳກັດ ການນໍາເຂົ້າສິນຄ້າທີ່ບໍ່ຈໍາເປັນ, ຟຸມເຟືອຍ ແລະ ສິນຄ້າທີ່ພາຍໃນຜະລິດໄດ້ໃຫ້ໄດ້ 20- 25% ໄປຄຽງຄູ່ກັບການຄຸ້ມຄອງລາຄາສິນຄ້າ, ຄ່າບໍລິການ ແລະ ການປະຕິບັດນະໂຍບາຍ ອຸດໜູນຄ່າຄອງຊີບໃຫ້ແກ່ພະນັກງານ, ທະຫານ, ຕຳຫລວດ, ພະນັກງານບຳນານ, ຄູອາຈານ, ແພດໝໍ ແລະ ແຮງງານຂັ້ນຕໍ່າ, ຄຸ້ມຄອງຢ່າງເຂັ້ມງວດຕໍ່ການຄ້ານອກລະບົບ, ການຄ້າຂາຍເຖື່ອນເປັນຕົ້ນການລັກລອບນໍາເຂົ້າຍາຍພາຫະນະ.
5). ສືບຕໍ່ຊຸກຍູ້ການຜະລິດພາຍໃນບົນຈິດໃຈ ສ້າງເສດຖະກິດເອກະລາດເປັນເຈົ້າຕົນເອງ (ສອຈ) ເພື່ອຄໍ້າປະກັນສະບຽງອາຫານ, ທົດແທນການນໍາເຂົ້າ ແລະ ເປັນສິນຄ້າສົ່ງອອກ ທີ່ມີຄຸນນະພາບແລະມີມາດຕະຖານເປັນທີ່ຍອມຮັບຂອງຕະຫຼາດຕ່າງປະເທດ.
6). ປຸກລະດົມ ແລະ ໂຄສະນາເຜີຍແຜ່ທົ່ວສັງຄົມ ໃຫ້ຮັບຮູ້ ແລະ ພ້ອມກັນ ປະຕິບັດບັນດາ ມາດຕະການເພື່ອແກ້ໄຂບັນຫາເງິນເຟີ້ ຢ່າງເປັນຂະບວນການກວ້າງຂວາງ ເປັນຕົ້ນ ພ້ອມກັນ ນໍາໃຊ້ເງິນກີບໃນການຊື້-ຂາຍ ແລະ ຊຳລະສະສາງ ຢູ່ພາຍໃນປະເທດ ໃຫ້ຫຼາຍຂຶ້ນ, ປ່ຽນແປງ ພຶດຕິກຳສວຍໂອກາດກັກຕຸນສິນຄ້າ-ເງິນຕາເພື່ອເກງກຳໄລ ແລະ ອື່ນໆ.
7). ຈະສືບຕໍ່ປັບປຸງກົງຈັກ, ວິທີການ ແລະ ມາດຕະການຄຸ້ມຄອງລາຄາສິນຄ້າ ໂດຍສະເພາະ ແມ່ນການພັດທະນາ ໂຄງສ້າງລາຄາສິນຄ້າ, ການຄວບຄຸມລາຄາຂອງສິນຄ້າບູລິມະສິດ ທີ່ກະທົບໄວຕໍ່ການ ດໍາລົງຊີວິດ ຂອງປະຊາຊົນ ກໍຄືທົບທວນ ແລະ ປັບປຸງໂຄງສ້າງອັດຕາ ເງິນເຟີ້ ໃຫ້ແທດເໝາະກັບສະພາບປັດຈຸບັນ.
8). ສືບຕໍ່ຮ່ວມມືກັບປະເທດເພື່ອມິດ ແລະ ສະຖາບັນສາກົນເຄື່ອຄ່າຍອົງການສະຫະ ປະຊາຊາດ ເພື່ອແລກປ່ຽນ, ຖອດຖອນບົດຮຽນ ໃນການແກ້ໄຂ ແລະ ຮັບມືກັບສະພາບ ການຜັນແປຂອງສະພາບເສດຖະກິດກິດໂລກໃນແຕ່ລະໄລຍະ.
ຂ່າວ: ສາວລາວໃຕ້

แชร์