ທັດສະນະຂອງສື່ມວນຊົນ ຕໍ່ການຝຶກອົບຮົມໂຄງການແກມຊິວ

ໂຄງການສ້າງຄວາມເຂັ້ມແຂງໃຫ້ແກ່ສື່ມວນຊົນ ໂດຍການມີສ່ວນຮ່ວມຂອງ ອົງການຈັດຕັ້ງມະຫາຊົນ ແລະອົງການຈັດຕັ້ງທາງສັງຄົມເພື່ອການພັດທະນາສີຂຽວໃນ ສປປ ລາວ ຫຼື ເອີ້ນຊື່ຫຍໍ້ວ່າ: ແກມຊິວ (GAMCIL) ໄດ້ຮັບການສະໜັບສະໜູນຈາກ ໂຄງການພັດທະນາສີຂຽວຂອງ ສະຫະພາບ ເອີຣົບ, ຊຶ່ງດຳເນີນງານໂດຍ ສະມາຄົມນັກຂ່າວແຫ່ງ ສປປ ລາວ ຮ່ວມກັບ ອົງການແຄຣນານາຊາດປະຈໍາລາວ ໄດ້ເສີມຂະຫຍາຍຄວາມຮູ້ທາງດ້ານ ສື່ດິຈິຕອລ ແລະການພັດທະນາສີຂຽວໃຫ້ແກ່ສື່ມວນຊົນລາວໃນທົ່ວປະເທດ, ເຮັດໃຫ້ນັກສໍາມະນາກອນກໍຄືນັກຂ່າວທີ່ເຂົ້າຮ່ວມຝຶກອົບຮົມ ຕ່າງກໍສະແດງທັດສະນະດ້ວຍຄວາມຮູ້ສຶກດີໃຈ ແລະພາກພູມໃຈທີ່ໄດ້ເຂົ້າຮ່ວມກິດຈະກຳດີໆທີ່ເປັນປະໂຫຍດແບບນີ້ທັງຈະນໍາເອົາຄວາມຮູ້ທີ່ໄດ້ຮຽນມາໄປໝູນໃຊ້ເຂົ້າໃນວຽກງານວິຊາສະເພາະຂອງຕົນໃຫ້ເກີດປະໂຫຍດຕໍ່ອົງກອນ ແລະ ສັງຄົມ.

ທ່ານນາງ ວັນເພັງ ອິນທະໄຊ ນັກຂ່າວໜັງສືພິມ ປະຊາຊົນ ສຽງຂອງສູນກາງພັກ ປະຊາຊົນ ປະຕິວັດລາວ (ຜູ້ເຂົ້າຮ່ວມຝຶກອົບຮົມ) ໄດ້ສະແດງຄວາມຮູ້ສຶກ ວ່າ: ການຝຶກອົບຮົມນີ້ ເປັນຄັ້ງທຳອິດ, ຊຶ່ງເຫັນວ່າມີຄວາມສໍາຄັນ ແລະ ເປັນປະໂຫຍດຢ່າງຫຼວງຫຼາຍຕໍ່ວຽກງານຂອງຕົນ ທັງໃນປັດຈຸບັນ ແລະ ອານາຄົດ, ເນື່ອງຈາກວ່າ ບັນດາຫົວຂໍ້ທີ່ ວິທະຍາກອນແຕ່ລະທ່ານນໍາມາສະເໜີນັ້ນລ້ວນແຕ່ເປັນຫົວໃຈສໍາຄັນຂອງວຽກງານສື່ມວນຊົນ ໂດຍສະເພາະ ວຽກງານການຄຸ້ມຄອງສື່ມວນຊົນ, ກົດໝາຍສື່ມວນຊົນ, ຄວາມປອດໄພໃນການໃຊ້ສື່ສັງຄົມອອນລາຍ ແລະ ການແກ້ໄຂບັນຫາສື່ສັງຄົມອອນລາຍ; ການພັດທະນາສີຂຽວ ແລະ ບັນຫາສິ່ງແວດລ້ອມ, ການນໍາໃຊ້ເອໄອເຂົ້າຊ່ວຍວຽກງານສື່, ຄວາມສະເໝີພາບບົດບາດຍິງ-ຊາຍ, ຈັນຍາບັນນັກຂ່າວ, ການຖ່າຍພາບ-ຕັດຕໍ່ວິດີໂອ ແລະ ອື່ນໆ. ນອກຈາກນັ້ນ, ຍັງໄດ້ຮັບມິດຕະພາບທີ່ດີໆຈາກທາງໂຄງການ ແລະ ນັກສຳມະນາກອນດ້ວຍກັນ ເຮັດໃຫ້ການແລກປ່ຽນຄວາມຮູ້ ເຕັມໄປດ້ວຍບັນຍາກາດທີ່ສ້າງສັນ ແລະມີປະສິດທິພາບຫຼາຍຂຶ້ນ.

ສ່ວນທ່ານ ສີປະເສີດ ລໍມະນີ ນັກຂ່າວກອງວິທະຍຸ-ໂທລະພາບແຂວງບໍລິຄຳໄຊ ກໍມີທັດສະນະ ວ່າ: ຕົນເອງພາກພູມໃຈຫຼາຍທີ່ໄດ້ເຂົ້າຮ່ວມຝຶກອົບຮົມນໍາໂຄງການນີ້ ເຮັດໃຫ້ໄດ້ຮຽນຮູ້ບົດຮຽນຫຼາຍຢ່າງ ຊຶ່ງຕິດພັນກັບວຽກງານທີ່ພົ້ນເດັ່ນໃນຍຸກປັດຈຸບັນ. ພ້ອມນັ້ນ, ຍັງໄດ້ຮັບການຖ່າຍທອດຄວາມຮູ້ຈາກວິທະຍາກອນ ທີ່ມີຄວາມສາມາດສູງໃນແຕ່ລະສາຂາວຽກງານທັງພາຍໃນ ແລະ ຕ່າງປະເທດ, ໄດ້ພົບປະແລກປ່ຽນບົດຮຽນກັບນັກສຳມະນອນກອນທີ່ມາຈາກຫຼາຍແຂວງ ຊຶ່ງແຕ່ລະຄົນກໍມີປະສົບການ ແລະ ຄວາມສາມາດສູງ ເຮັດໃຫ້ຕົນເອງໄດ້ຮັບຄວາມຮູ້ຫຼາຍສິ່ງຫຼາຍຢ່າງຈາກໂຄງການນີ້ ເປັນຕົ້ນແມ່ນ: ການຖ່າຍພາບ-ແຕ່ງພາບ, ການຕັດຕໍ່ວິດີໂອ, ການປັບປຸງເນື້ອໃນຂ່າວໃຫ້ມີຄວາມໜ້າສົນໃຈຂຶ້ນ, ການນຳໃຊ້ເຕັກໂນໂລຊີແບບດິຈີຕອນ ແລະ ອື່ນໆ ຊຶ່ງຈະເຮັດໃຫ້ປະຊາຊົນໄດ້ຮັບຂໍ້ມູນຂ່າວສານທີ່ວ່ອງໄວ ແລະມີຄຸນນະພາບຫຼາຍຂຶ້ນ ແນໃສ່ເຮັດໃຫ້ປະເທດຊາດໄດ້ຮັບການພັດທະນາຕາມທິດພັດທະນາສີຂຽວ ແລະ ຍືນຍົງ.

ດ້ານທ່ານ ບຸນມາ ແກ້ວບຸດດາ ນັກຂ່າວແຂວງວຽງຈັນ ໄດ້ກໍເປີດເຜີຍວ່າ: ໂຄງການແກມຊິວ ຖືວ່າເປັນໂຄງການທີ່ມີປະໂຫຍດຫຼາຍຕໍ່ສັງຄົມ ແລະປະເທດຊາດ ເພາະບັນຫາສິ່ງແວດລ້ອມ ແມ່ນບັນຫາທີ່ທົ່ວໂລກໃຫ້ຄວາມສໍາຄັນ ແລະ ເອົາໃຈໃສ່ສູງ, ຊຶ່ງປະເທດລາວເອງ ກໍກໍາລັງພົບກັບຫຼາຍບັນຫາສິ່ງແວດລ້ອມໃນຫຼາຍຮູບແບບ ເຊັ່ນ: ໄພນໍ້າຖ້ວມ, ໄພແຫ້ງແລ້ງ, ດິນເຊາະເຈື່ອນ, ມົນລະພິດທາງອາກາດ ແລະອື່ນໆ. ພ້ອມນັ້ນ, ບົດບາດ ແລະຄວາມສະເໝີພາບຍິງ-ຊາຍ ກໍເປັນອີກວຽກງານໜຶ່ງທີ່ຈຳເປັນຂອງປະເທດຊາດທີ່ຕ້ອງໄດ້ເອົາໃຈໃສ່ ໂດຍສະເພາະການສ້າງຄວາມເຂັ້ມແຂງໃຫ້ແກ່ແມ່ຍິງ ແລະເດັກນ້ອຍ ໃນດ້ານການສຶກສາ, ສຸຂະພາບ ແລະ ການພັດທະນາຊີວິດການເປັນຢູ່ ຊຶ່ງແມ່ນໜ້າທີ່ຂອງທຸກຄົນຕ້ອງມີສ່ວນຮ່ວມໃນວຽກງານດັ່ງກ່າວ.

ຂະນະທີ່, ທ່ານນາງ ອານຸສອນ ແສງມະນີຄໍາ ທີ່ປຶກສາການສ້າງຄວາມເຂັ້ມແຂງໃຫ້ ຍິງ-ຊາຍ ແລະ ການສົ່ງເສີມເສດຖະກິດຂອງແມ່ຍິງ ຈາກອົງການແຄຣ ນານາຊາດປະຈຳລາວ, ຊຶ່ງເປັນວິທະຍາກອນ ບັນຍາຍຫົວຂໍ້ “ຄວາມສະເໝີພາບ ແລະ ບົດບາດຍິງ-ຊາຍ” ກໍໄດ້ກ່າວວ່າ: ການມາບັນລະຍາຍໃຫ້ນັກຂ່າວໃນຄັ້ງນີ້, ແມ່ນມີຄວາມແຕກຕ່າງກັບການໄປບັນລະຍາຍຢູ່ບ່ອນອື່ນຫຼາຍ, ກ່ອນອື່ນຕ້ອງຮູ້ເປົ້າໝາຍກຸ່ມຄົນໃດທີ່ເຮົາໄປຝຶກໃຫ້. ດັ່ງນັ້ນເປົ້າໝາຍຝຶກອົບຮົບໃນໂຄງການດັ່ງກ່າວນີ້ ແມ່ນພະນັກງານສື່ມວນຊົນທັງພາກລັດ-ເອກະຊົນ ແລະ ຊຸມຊົນ. ສໍາລັບຊຸມຊົນ ຈະເນັ້ນເພື່ອສ້າງຄວາມເຂັ້ມແຂງໃຫ້ແກ່ແມ່ຍິງໃນຊຸມຊົນນັ້ນ ໂດຍມີຄູ່ມືໃນການສ້າງຄວາມເຂັ້ມແຂງການເປັນຜູ້ນໍາຂອງແມ່ຍິງເຂົ້າເຖິງການເງິນຕ່າງໆ. ສ່ວນການຝຶກອົບຮົມໃຫ້ນັກຂ່າວ ຈະມີຄວາມທ້າທາຍ ແຕ່ຈະບໍ່ເປັນອັນກັງວົນໃຈເລື່ອງການນໍາໃຊ້ພາສາ ເພາະນັກຂ່າວມີຄວາມຮູ້ໃນການນໍາໃຊ້ພາສາທີ່ດີ, ການເຂົ້າໃຈເລື່ອງດີຈີຕອນ. ສະນັ້ນ, ວິທີ, ບົດຮຽນໃຫ້ໝັ້ນໃຈວ່າ ຕ້ອງແມ່ນບົດຮຽນໃໝ່ສາມາດນໍາໃຊ້ໄດ້ຕົວຈິງກັບນັກຂ່າວ. ສະນັ້ນ, ຈຶ່ງໄດ້ພະຍາຍາມຊອກຫາຂໍ້ມູນໃໝ່ໆ ໂດຍສະເພາະຫົວຂໍ້ທີ່ນໍາມາບັນລະຍາຍຄວາມຮູ້ກ່ຽວກັບບົດບາດຍິງ-ຊາຍແມ່ນເປັນແນວໃດ, ໃນປັດຈຸບັນມີຫຍັງແດ່ ແລະ Campaign ທົ່ວໂລກແມ່ນຫຍັງ ແລະ ພວກເຮົາຈະເລັ່ງໃສ່ການເຮັດວຽກຂອງນັກຂ່າວແນວໃດເພື່ອເຮັດໃຫ້ນັກຂ່າວທີ່ເປັນກະບອກສຽງສະທ້ອນບັນຫາຕ່າງໆໃນສັງຄົມ ແລະ ເປັນຜູ້ໜຶ່ງທີ່ສາມາດນໍາສະເໜີຄວາມຈິງໄດ້ ແລະເຮັດແນວໃດການນໍາສະເໜີຂອງນັກຂ່າວເພື່ອໃຫ້ຜູ້ຊາຍເຄົາລົບສິດຂອງຜູ້ຍິງ, ເດັກນ້ອຍ ແລະອື່ນໆ.

ຢ່າງໃດກໍຕາມຈາກທັດສະນະຂອງຜູ້ຂຽນຊຶ່ງກໍເປັນຜູ້ເຂົ້າຮ່ວມຝຶກອົບຮົມກໍເຫັນວ່າໂຄງການດັ່ງກ່າວນີ້ໄດ້ນໍາເອົາບົດຮຽນທີ່ເປັນປະໂຫຍດຢ່າງຫຼວງຫຼາຍມາຖ່າຍທອດໃຫ້ແກ່ສື່ມວນຊົນທີ່ແທ້, ແຕ່ເຫັນວ່າໄລຍະເວລາໃນການຈັດຝຶກອົບຮົມຂ້ອນຂ້າງຫນ້ອຍທຽບໃສ່ບັນດາຫົວຂໍ້ທີ່ວິທະຍາກອນນໍາມາບັນຍາຍ ແລະ ບາງຫົວຂໍ້ ກໍເຫັນວ່າເນື້ອໃນໃຈຄວາມມີລັກສະນະກວ້າງຂວາງເກີນໄປ, ບໍ່ຮັດກຸມເທົ່າທີ່ຄວນ, ສະນັ້ນຖ້າມີຊຸດຝຶກອົບຮົມໃນເທື່ອຕໍ່ໄປຄວນຂະຫຍາຍເວລາອອກຕື່ມ, ພ້ອມກະກຽມເນື້ອໃນທີ່ຈະນໍາມາສະເຫນີໃຫ້ຮັດກຸມກວ່າເກົ່າ, ແລະຫວັງວ່າໃນອະນາຄົດຈະໄດ້ຮັບການເສີມຂະຫຍາຍຄວາມຮູ້ຄວາມສາມາດຈາກໂຄງການນີ້ຕື່ມອີກ.

ໂດຍ: ສາວລາວໃຕ້

• 27/11/2024