ເປີດໄຟສີສົ້ມໃສ່ປະຕູໄຊ ລະນຶກວັນສາກົນເພື່ອລຶບລ້າງຄວາມຮຸນແຮງຕໍ່ແມ່ຍິງ

ນະຄອນຫຼວງວຽງຈັນໃນຄໍ່າຄືນຂອງວັນທີ 25 ພະຈິກ 2024, ລັດຖະບານແຫ່ງ ສປປ ລາວ ຮ່ວມກັບ ອົງການສະຫະປະຊາຊາດ (ສປຊ) ແລະ ບັນດາຄູ່ຮ່ວມງານ ໄດ້ຈັດພິທີເປີດໄຟສີສົ້ມໃສ່ປະຕູໄຊ ລະນຶກວັນສາກົນ ເພື່ອລຶບລ້າງຄວາມຮຸນແຮງຕໍ່ແມ່ຍິງ 25 ພະຈິກ ພາຍໃຕ້ຫົວຂໍ້ “ກ້າວເຂົ້າສູ່ 30 ປີ ແຫ່ງຖະແຫຼງການ ແລະ ແຜນປະຕິບັດງານປັກກິ່ງ: ຮ່ວມກັນເພື່ອຢຸດຕິການໃຊ້ຄວາມຮຸນແຮງຕໍ່ແມ່ຍິງ ແລະເດັກຍິງ” ພ້ອມທັງເປີດບັ້ນຂະບວນການ 16 ວັນແຫ່ງການເຄື່ອນໄຫວເພື່ອຢຸດຕິການໃຊ້ຄວາມຮຸນແຮງຕໍ່ແມ່ຍິງ ແລະເດັກຍິງ.

ງານຄັ້ງນີ້ ຈັດຂຶ້ນເພື່ອແນໃສ່ການປູກຈິດສໍານຶກ ແລະ ຊຸກຍູ້ບັນດາການເຄື່ອນໄຫວຕ່າງໆ ເພື່ອປ້ອງກັນ ແລະ ລຶບລ້າງຄວາມຮຸນແຮງຕໍ່ແມ່ຍິງ ແລະ ເດັກຍິງຢູ່ໃນປະເທດລາວ, ແມ່ຍິງປະມານ 1 ໃນ 3 ຄົນ ເປັນຜູ້ຖືກເຄາະຮ້າຍຈາກຄວາມຮຸນແຮງທາງເພດ, ທາງຮ່າງກາຍ ຫຼືຈິດໃຈ, ແຕ່ໃນຈຳນວນເຫຼົ່ານີ້, ມີພຽງ 1 ໃນ 10 ຄົນເທົ່ານັ້ນທີ່ຊອກການຊ່ວຍເຫຼືອຈາກອໍານາດການປົກຄອງເຊັ່ນ: ຕໍາຫຼວດ, ສູນປິ່ນປົວ ຫຼື ສະຫະພັນແມ່ຍິງລາວ ແລະ ຂະແໜງການທີ່ກ່ຽວຂ້ອງ. ໂຕເລກເຫຼົ່ານີ້, ເນັ້ນໜັກເຖິງຄວາມຈໍາເປັນອັນຮີບດ່ວນ ໃນການປັບປຸງການປະສານງານ ແລະ ຄວາມພະຍາຍາມ ເພື່ອປ້ອງກັນຄວາມຮຸ່ນແຮງ, ສະໜອງການບໍລິການຊ່ວຍເຫຼືອທີ່ສາມາດເຂົ້າເຖິງໄດ້ພ້ອມທັງຮັບປະກັນວ່າຜູ້ລອດຊີວິດໄດ້ຮັບການຊ່ວຍເຫຼືອດ້ວຍຄວາມເມດຕາ, ມີກຽດສັກສີ ແລະດ້ວຍຄວາມເອົາໃຈໃສ່. ກິດຈະກໍາໃນຄັ້ງນີ້, ຍັງເປັນການປ່າວປະກາດຄໍາວ່າ “ບໍ່”' ໂດຍຜ່ານການເຂົ້າຮ່ວມກິດຈະກໍາຕ່າງໆໃນງານ.

ໃນພິທີຜູ້ເຂົ້າຮ່ວມໄດ້ຮັບຊົມ ແລະ ຮັບຟັງ ການສາຍວິດີໂອການກ່າວຄຳປາໄສ ຂອງ ທ່ານ ສອນໄຊ ສີພັນດອນ ນາຍົກລັດຖະມົນຕີແຫ່ງ ສປປ ລາວ ຊຶ່ງເປັນການຢືນຢັນຄືນເຖິງຄວາມມຸ່ງໝັ້ນຂອງລັດຖະບານລາວໃນການປ້ອງກັນ ແລະ ລຶບລ້າງຄວາມຮຸນແຮງທຸກຮູບແບບ ບໍ່ວ່າຈະເປັນເພດໃດກໍຕາມ. ຈາກນັ້ນ ທ່ານ ນາງ ອາລີ ວົງໜໍ່ບຸນທຳ ປະທານຄະນະບໍລິຫານງານສູນກາງສະຫະພັນແມ່ຍິງລາວ (ສສຍລ) ຮອງປະທານຜູ້ປະຈໍາການຄະນະກໍາມາທິການແຫ່ງຊາດ ເພື່ອຄວາມກ້າວໜ້າຂອງແມ່ຍິງ, ແມ່ ແລະ ເດັກ (ຄຊກມດ) ໄດ້ກ່າວຄຳເຫັນວ່າ: ສີສົ້ມ ຫຼື ສີນໍ້າໝາກກ້ຽງ ເປັນສີທີ່ສົດໃສ ແລະ ເບິ່ງໂລກໃນມຸມມອງທີ່ດີ, ເປັນສີທີ່ສະແດງເຖິງອະນາຄົດທີ່ສົດໃສ ປາສະຈາກຄວາມຮຸນແຮງຕໍ່ແມ່ຍິງ ແລະ ເດັກຍິງ ໃຫ້ທຸກຄົນຢືນຢັນຕໍ່ຕ້ານການໃຊ້ຄວາມຮຸນແຮງຕໍໍ່ແມ່ຍິງ ແລະ ເດັກຍິງ, ໃຫ້ການຊ່ວຍເຫຼືອຜູ້ລອດຊີວິດ ແລະ ໃຫ້ຄວາມຮູ້ຂໍ້ມູນຂ່າວສານທີ່ສຳຄັນໃນການເຂົ້າເຖິງຂະບວນການຍຸຕິທຳ; ຂໍໃຫ້ໃຊ້ໜຶ່ງສຽງຂອງທ່ານ ເພື່ອປັບປ່ຽນບັນທັດຖານຂອງສັງຄົມທີ່ເປັນອັນຕະລາຍ, ເຂົ້າຮ່ວມໃນການໂຄສະນາ ແລະຊຸກຍູ້ໃຫ້ມີການຈັດຕັ້ງປະຕິບັດກົດໝາຍທີ່ເຂັ້ມງວດ, ການບັງຄັບໃຊ້ທີ່ດີກວ່າ ແລະເພີ່ມຊັບພະຍາກອນເພື່ອຢຸດຕິຄວາມຮຸນແຮງຕໍ່ແມ່ຍິງ ແລະເດັກຍິງ.

ທ່ານ ແກມບິສ ກາບິຣີ ຜູ້ປະຈຳການ ອົງການ ສປຊ ກອງທຶນເພື່ອປະຊາກອນ, ຜູ້ຕາງໜ້າຈາກອົງການຈັດຕັ້ງສາກົນ ກ່າວວ່າ: ໃນໄລຍະ 10 ກວ່າປີທີ່ຜ່ານມາ, ສປປ ລາວ ໄດ້ມີການຫັນປ່ຽນບັນດາບັນທັດຖານດ້ານວັດທະນະທຳທີ່ສໍາຄັນຫຼາຍພໍສົມຄວນ ໂດຍຜ່ານການໂຄສະນາເຜີຍແຜ່ເພື່ອປູກຈິດສໍານຶກ, ການຊີ້ນໍາຂອງລັດຖະບານທີ່ເຂັ້ມແຂງ ແລະ ການລົງທຶນທີ່ສຳຄັນ ໃນການປ້ອງກັນການໃຊ້ຄວາມຮຸນແຮງຕໍ່ແມ່ຍິງ, ພ້ອມທັງການນຳພາຈາກບັນດາກະຊວງ ແລະ ຄູ່ຮ່ວມພັດທະນາທີ່ກ່ຽວຂ້ອງ ຈຶ່ງເຮັດໃຫ້ຄວາມອົດທົນຕໍ່ຄວາມຮຸນແຮງພາຍໃນຄອບຄົວ ມີອັດຕາຫຼຸດລົງຢ່າງຫຼວງຫຼາຍ ແຕ່ວ່າວຽກງານນີ້ແມ່ນຍັງອີກຍາວໄກ ແລະ ບໍ່ທັນສິ້ນສຸດ. ອົງການ UNFPA ຈະສືບຕໍ່ຮຽກຮ້ອງໃຫ້ມີການປະຕິບັດທີ່ເດັດດ່ຽວ ເພື່ອປູກຈິດສໍານຶກ, ຊຸກຍູ້ການໂຄສະນາເຜີຍແຜ່ ແລະ ຊອກວິທີແກ້ໄຂດ້ວຍນະວັດຕະກຳໃໝ່ ເພື່ອຢຸດຕິການແຜ່ລາມຂອງຄວາມຮຸນແຮງຕໍ່ແມ່ຍິງ ແລະເດັກຍິງ.

ເພື່ອດຳເນີນການເຄື່ອນໄຫວເປັນເວລາ 16 ວັນ ເລີ່ມແຕ່ວັນສາກົນ ເພື່ອສືບຕໍ່ລຶບລ້າງການໃຊ້ຄວາມຮຸນແຮງຕໍ່ແມ່ຍິງ ແລະ ເດັກຍິງ ໃນວັນທີ 25 ພະຈິກ ຈົນເຖິງວັນສິດທິມະນຸດ ໃນວັນທີ 10 ທັນວາ 2024.

ຂະບວນການດັ່ງກ່າວ, ຈະປະກອບດ້ວຍບັນດາກິດຈະກໍາສົ່ງເສີມຕ່າງໆ, ມີການສໍາມະນາ, ການໂຄສະນາໂດຍສື່ມວນຊົນ ແລະການເປີດເວທີສົນທະນາສາທາລະນະໃນຫົວຂໍ້ທີ່ສໍາຄັນເຊັ່ນ: ຄວາມສໍາຄັນຂອງສຸຂະພາບຈິດ ສໍາລັບຜູ້ລອດຊີວິດຈາກຄວາມຮຸນແຮງບົນພື້ນຖານທາງເພດ, ພະຍາດ HIV/AIDS ແລະ ສິດທິຂອງຄົນພິການ. ພາຍຫຼັງສໍາເລັດພິທີດັ່ງກ່າວ, ຍັງມີງານສະແດງແຟຊັນໄດ້ຈັດຂຶ້ນ ຢູ່ສວນສາທາລະນະອາຊຽນ ພາຍໃຕ້ຄໍາຂວັນ “ເວທີແຫ່ງຄວາມເຂັ້ມແຂງ” ຊຶ່ງໄດ້ມີການສະແດງໃຫ້ເຫັນເຖິງຫຼາກຫຼາຍຮູບແບບຄວາມຮຸນແຮງ, ພ້ອມທັງເປັນການເຜີຍແຜ່ໂຄສະນາ ເພື່ອສ້າງຄວາມເຄົາລົບດ້ານສິດທິ ແລະການມີສ່ວນຮ່ວມຂອງແມ່ຍິງທຸກຄົນ ລວມທັງຜູ້ພິການ, ແມ່ຍິງຈາກເຂດຊົນນະບົດ, ຊົນເຜົ່າ ແລະສະມາຊິກຂອງກຸ່ມເພດທາງເລືອກ (LGBTQIA+).

แชร์