ທ່ານ ໂພໄຊ ໄຊຍະສອນ ຊີ້ແຈງມາດຕະການແກ້ໄຂໜີ້ສິນຂອງ ລັດວິສາຫະກິດໄຟຟ້າລາວ

ທ່ານ ໂພໄຊ ໄຊຍະສອນ ລັດຖະມົນຕີ ກະຊວງພະລັງງານ ແລະບໍ່ແຮ່ ໄດ້ຊີ້ແຈງຂໍ້ຊັກຖາມຂອງສະມາຊິກສະພາແຫ່ງຊາດ ກ່ຽວກັບມາດຕະການແກ້ໄຂໜີ້ສິນຂອງລັດວິສາຫະກິດໄຟຟ້າລາວ ແລະ ການປັບປຸງໂຄງສ້າງດ້ານລາຄາ ຕໍ່ກອງປະຊຸມສະໄໝສາມັນເທື່ອທີ 8 ຂອງສະພາແຫ່ງຊາດ ຊຸດທີ IX ໃນວັນທີ 26 ພະຈິກ 2024 ນີ້ວ່າ: ລັດວິສາຫະກິດໄຟຟ້າລາວ (ຟຟລ) ມີສະພາບໜີ້ສິນສະສົມຢູ່ຢ່າງມະຫາສານທີ່ເກີດມາຈາກຫຼາຍສາເຫດທັງໃນໂຕ ແລະນອກໂຕ ເຊັ່ນ: ດ້ານນະໂຍບາຍ, ທິດທາງ, ຫຼັກການດໍາເນີນທຸລະກິດ, ໂຄງສ້າງລາຄາໄຟຟ້າບໍ່ສົມຄູ່ກັບຕົ້ນທຶນການສະໜອງໄຟ, ບັນຫາທີ່ຕິດພັນກັບເງື່ອນໄຂສັນຍາຊື້ຂາຍໄຟຟ້າ, ການດຸ່ນດ່ຽງພະລັງງານລວມທັງຜົນກະທົບການຜັນຜວນຂອງອັດຕາແລກປ່ຽນໃນລະບົບມະຫາພາກ.

ສໍາລັບມາດຕະການແກ້ໄຂຈະຕ້ອງໄດ້ສືບຕໍ່ມາດຕະການ ອັນສໍາຄັນຄື: ການປັບປຸງສະພາບຄ່ອງ ແລະສະພາບການເງິນຂອງລັດວິສາຫະກິດໄຟຟ້າລາວ ທີ່ພົວພັນການປັບປຸງ ໂຄງສ້າງລາຄາໄຟພາກຈໍາໜ່າຍໃຫ້ສະທ້ອນຕົ້ນທຶນຕົວຈິງ ແລະ ການປັບປຸງກົນໄກ ແລະ ລາຄາຊື້ຈາກບັນດາຜູ້ ຜະລິດໄຟຟ້າ ທີ່ສະໜອງໃຫ້ ຟຟລ ເຊິ່ງພົວພັນກັບການເຮັດວຽກກັບພາກສ່ວນກ່ຽວຂ້ອງຕ່າງໆ ລວມທັງພາກສ່ວນທະນາຄານຕ່າງປະເທດ ທີ່ເປັນຜູ້ໃຫ້ກູ້ຢືມລົງທຶນໃນໄລຍະຜ່ານມາ.

ທ່ານລັດຖະມົນຕີ ກະຊວງພະລັງງານ ແລະບໍ່ແຮ່ ໃຫ້ຮູ້ຕື່ມວ່າ: ໃນປະຈຸບັນກໍ່ໄດ້ເລີ່ມຂຸ້ມຂ້ຽວດໍາເນີນການຄົ້ນຄວ້າການຂັບເຄື່ອນນະໂຍບາຍກະຕຸ້ນໃຫ້ມີການນໍາໃຊ້ ພະລັງງານແສງຕະເວັນເຂົ້າໃນຂັ້ນຄົວເຮືອນ ແລະວິສາຫະກິດຂະໜາດນ້ອຍລວມທັງການຊຸກຍູ້ເລັ່ງລັດໃຫ້ ພັດທະນາໂຊລາຟາມ ໃນເຂດທີ່ ຟຟລ ໄດ້ກຳນົດໃຫ້ມີຄວາມເໝາະສົມເພື່ອສະໜອງເຂົ້າໃນເຂດທີ່ຕ້ອງການໄຟເຊັ່ນ: ເຂດອຸດສາຫະກຳ: ເຂດພັດທະນາເສດຖະກິດ.. ເພື່ອຫຼຸດຜ່ອນສັດສ່ວນຄວາມຕ້ອງການພະລັງງານທີ່ຕ້ອງໄດ້ ນໍາເຂົ້າ ແລະແນໃສ່ເພື່ອໃຫ້ກະທົບຕໍ່ຕົ້ນທຶນລາຄາໄຟຟ້າທີ່ ຟຟລ ຈະມາຈໍາໜ່າຍໃຫ້ໜ້ອຍທີ່ສຸດ.
ຂ່າວ: ໃພ້ໄຊທານີ

แชร์