ກະຊວງການເງິນ ຊີ້ແຈງມາດຕະການແກ້ໄຂ ການຫຼົບຫຼີກພາສີ ແລະ ນໍາເຂົ້າລົດເຖື່ອນ

ຈາກຂໍ້ຊັກຖາມຂອງ ສະມາຊິກສະພາແຫ່ງຊາດ ກ່ຽວກັບ ມາດຕະການແກ້ໄຂການຫຼົບຫຼີກພາສີ ແລະ ການນໍາເຂົ້າລົດເຖື່ອນ ຕໍ່ບັນຫາດັ່ງກ່າວ, ທ່ານ ສັນຕິພາບ ພົມວິຫານ ລັດຖະມົນຕີ ກະຊວງການເງິນ ໄດ້ຕາງໜ້າລັດຖະບານ ຊີ້ແຈງໃນກອງປະຊຸມສະໄໝສາມັນເທື່ອທີ 8 ຂອງສະພາແຫ່ງຊາດ ຊຸດທີ IX, ຄັ້ງວັນທີ 25 ພະຈິກ 2024 ວ່າ: ໃນໄລຍະຜ່ານມາ ກະຊວງການເງິນ ໄດ້ມີຄວາມພະຍາຍາມໃນການແກ້ໄຂ ການລັກລອບຫຼົບຫຼີກພາສີ ແລະ ການນໍາເຂົ້າລົດເຖື່ອນ ດ້ວຍຫຼາຍວິທີການ ໃນນັ້ນລວມມີ ກົນໄກ ແລະ ມາດຕະການ.

ສໍາລັບມາດຕະການແກ້ໄຂການລັກລອບຫຼົບຫຼີກພາສີ: ໄດ້ສ້າງນິຕິກຳ ແລະ ດໍາເນີນກົນໄກ ການແຈ້ງລ່ວງໜ້າ ກ່ອນສິນຄ້າມາເຖິງດ່ານພາສີຊາຍແດນ ເພື່ອນໍາມາ ວິເຄາະ-ວິໄຈ ຄວາມສ່ຽງ ແລະ ປະຕິບັດການຄວບຄຸມທາງພາສີ ຕາມແຈ້ງການຂອງກະຊວງການເງິນ ສະບັບເລກທີ 2755/ກງ, ລົງວັນທີ 31 ກໍລະກົດ 2024 ເຊິ່ງໄດ້ຈັດຕັ້ງປະຕິບັດເລີ່ມແຕ່ເດືອນ ຕຸລາ ປີ 2024 ໂດຍສອດຄ່ອງກັບລະບຽບການຂອງອົງການພາສີໂລກ ເຊິ່ງຫຼາຍປະເທດໄດ້ນໍາໃຊ້ເຊັ່ນ: ຍີ່ປຸ່ນ, ສປ ຈີນ, ສສ ຫວຽດນາມ ແລະ ໄທ; ໄດ້ປະສານສົມທົບ ກັບ ພາສີປະເທດອ້ອມຂ້າງ ຫຼື ຄູ່ດ່ານຊາຍແດນ (ດ່ານ ສາກົນຂົວມິດຕະພາບ 01 ກັບ ດ່ານພາສີ ໜອງຄາຍ, ດ່ານ ສາກົນປາກຊັນ ກັບ ດ່ານບຶງການ ລາຊະອານາຈັກໄທ) ໃນການແລກປ່ຽນຂໍ້ມູນຂ່າວສານ ແລະ ຮ່ວມກັນປາບປາມການລະເມີດກົດໝາຍຂ້າມແດນ ໂດຍສະເພາະສິນຄ້າຍຸດທະສາດ (ນໍ້າມັນເຊື້ອໄຟ), ໃນຕໍ່ໜ້າ ຈະໄດ້ສືບຕໍ່ແລກປ່ຽນຂໍ້ມູນຂ່າວສານ ກ່ຽວກັບສິນຄ້າທີ່ມີການລັກລອບ ເປັນຕົ້ນແມ່ນ: ພາຫະນະ ແລະ ສິນຄ້າອື່ນໆ ທີ່ມີຄວາມສ່ຽງໃນການລັກລອບ; ໄດ້ສ້າງ ແລະ ປະຕິບັດຕາມບົດບັນທຶກຄວາມເຂົ້າໄຈຮ່ວມກັບ ບໍລິສັດ ທາງລົດໄຟລາວ-ຈີນ ໃນການສະໜອງຂໍ້ມູນ ໃຫ້ແກ່ກັນ, ເຊິ່ງເຮັດໃຫ້ເຈົ້າໜ້າທີ່ພາສີມີຂໍ້ມູນໃນການບໍລິຫານຄວາມສ່ຽງຢ່າງມີປະທິຜົນສູງ; ໄດ້ນໍາໃຊ້ເຄື່ອງມືທັນສະໃໝ ເຊັ່ນ: ເຄື່ອງສາຍແສງ, ຊິງຊັ່ງທັນສະໄໝ ແລະ ລະບົບທັນສະໄໝອື່ນເຂົ້າໃນການຄຸ້ມຄອງ ແລະ ກວດກາ; ໄດ້ແຕ່ງຕັ້ງ ຈຸດກວດກາ 14 ຈຸດ ໃນການເຄື່ອນໄຫວ ຕ້ານການຄ້າຂາຍເຖື່ອນໃນຂອບເຂດທົ່ວປະເທດ.
ສ່ວນມາດຕະການແກ້ໄຂການນໍາເຂົ້າລົດເຖື່ອນ: ໄດ້ສ້າງ ແລະ ຈັດຕັ້ງປະຕິບັດ ຕາມບົດບັນທຶກຊ່ວຍຈໍາ (MoU) ກັບ ສະມາຄົມອຸດສາຫະກຳ ຍານພາຫະນະລາວ ໂດຍຜ່ານແບ່ງຄວາມຮັບ ຜິດຊອບ ແລະ ການແລກປ່ຽນຂໍ້ມູນ ຈະຊ່ວຍໃຫ້ຂະແໜງພາສີ ມີຂໍ້ມູນທີ່ດີຂຶ້ນ; ໄດ້ມີການປັບປຸງ ນິຕິກຳ ແລະ ການຄຸ້ມຄອງລົດນໍາເຂົ້າເພື່ອການທ່ອງທ່ຽວຢ້ຽມຢ້າມ ແລະ ຂົນສົ່ງສິນຄ້າ ໂດຍໃຫ້ຜ່ານຜູ້ຄໍ້າປະກັນ ຫຼື ຕົວແທນ ຕາມແຈ້ງການຂອງກົມພາສີ ສະບັບເລກທີ 9614/ກພສ, ລົງວັນທີ 13 ສິງຫາ 2024 ຄ້າຍຄືບົດຮຽນຂອງປະເທດອ້ອມຂ້າງ (ສປ ຈີນ) ຈະເປັນເງື່ອນໄຂທີ່ຮັດກຸມ; ໄດ້ຮ່ວມກັບ ກົມຕຳຫຼວດກວດຄົນເຂົ້າເມືອງ ສ້າງບົດບັນທຶກຊ່ວຍຈໍາ (MoU) ແບ່ງໜ້າທີ່ ແລະ ຄວາມ ຮັບຜິດຊອບຢູ່ດ່ານຊາຍແດນ ເພື່ອຕິດຕາມຜູ້ຂັບຂີ່ພາຫະນະເຂົ້າ-ອອກເມືອງ ແລະ ຂົນສົ່ງສິນຄ້າ ເພື່ອຊ່ວຍ ເຮັດໃຫ້ການນໍາເຂົ້າພາຫະນະໃນຮູບແບບທ່ອງທ່ຽວຢ້ຽມຢາມ ແລະ ຂົນສົ່ງສິນຄ້າ ບໍ່ອອກຄືນ, ການ ລັກລອບຊື້-ຂາຍ ພາຍໃນ ຈະຫຼຸດຜ່ອນລົງ ເຊິ່ງຄາດວ່າ ຈະໄດ້ຈັດຕັ້ງປະຕິບັດໃນເດືອນ 12 ປີ 2024.
ຂ່າວ: ສາວລາວໃຕ້

แชร์