ກະຊວງ ຜທ ຊີ້ແຈງການຈັດສັນແຜນການລົງທຶນຂອງລັດ ປີ 2025

ທ່ານ ປອ. ເພັດ ພົມພິພັກ ລັດຖະມົນຕີກະຊວງແຜນການ ແລະ ການລົງທຶນ ໄດ້ຊີ້ແຈງຄໍາຊັກຖາມຂອງສະຖາແຫ່ງຊາດ ໃນກອງປະຊຸມ ສະໄໝສາມັນເທື່ອທີ 8 ຂອງສະພາແຫ່ງຊາດ ຊຸດທີ IX ໃນຕອນແລງວັນທີ 25 ພະຈິກ 2024 ວ່າ: ໃນປີ 2025 ມີງົບປະມານລົງທຶນຂອງລັດ ທັງໝົດຈໍານວນ 5,300 ຕື້ກີບ ເພີ່ມ ຂຶ້ນ 6% ທຽບໃສ່ແຜນປະຈໍາປີ 2024 ແລະຕາມການແຈ້ງການຂອງກະຊວງການເງິນລ່າສຸດແມ່ນຈະມີງົບປະມານເພີ່ມຕື່ມ ຈໍານວນ 150 ຕື້ກີບ ເຮັດໃຫ້ງົບປະມານລົງທຶນຂອງລັດ ໃນປີ 2025 ຄາດວ່າຈະມີທັງໝົດ ຈໍານວນ 5,450 ຕື້ກີບ. ດັ່ງນັ້ນ, ເພື່ອເຮັດໃຫ້ການຈັດຕັ້ງປະຕິບັດມີຄວາມເປັນເອກະພາບກັນ, ລັດຖະບານ ຈຶ່ງໄດ້ກຳນົດເພດານລວມ ໃຫ້ຂະແໜງການ ແລະທ້ອງຖິ່ນເປັນຜູ້ຈັດສັນທຶນເຂົ້າໃນໂຄງການຕົວຈິງ. ໃນຈໍານວນ 5,300 ຕື້ກີບ ນັ້ນມີບ້ວງທຶນທົ່ວໄປຈໍານວນ 3,150 ຕື້ກີບ ຈັດສັນໃຫ້ 2 ກຸ່ມແຜນງານໃຫຍ່ ຄື: ກຸ່ມທີ 1 ຈັດສັນໃຫ້ບັນດາແຜນງານ/ໂຄງການບູລິມະສິດຂອງລັດຖະບານ (9 ເປົ້າໝາຍ ບູລິມະສິດ) ແລະ ກຸ່ມທີ 2 ຈັດສັນໃຫ້ບັນດາໂຄງການປົກກະຕິ ແລະ ໂຄງການເປົ້າໝາຍສະເພາະຂອງບັນດາກະຊວງ-ອົງການ ແລະ ທ້ອງຖິ່ນຕ່າງໆ. ໃນນີ້ ໃຫ້ບູລິມະສິດ ໂຄງການສົມທົບທຶນກັບຕ່າງປະເທດ (ODA), ໂຄງການທີ່ມີຜົນປະໂຫຍດດ້ານເສດຖະກິດ ແລະ ສະໜັບສະໜູນການຈັດຕັ້ງປະຕິບັດ 2 ວາລະແຫ່ງຊາດເຊິ່ງໄດ້ຈັດສັນໄປຕາມບູລິມະສິດໂດຍອີງໃສ່ທິດທາງວຽກງານບູລິມະສິດຂອງການພັດທະນາເສດຖະກິດ-ສັງຄົມ ແລະ ມະຕິຂອງກົມການເມືອງສູນກາງພັກ ສະບັບເລກທີ 04/ກມສພ ວ່າດ້ວຍການສ້າງເສດຖະກິດເອກະລາດເປັນເຈົ້າຕົນເອງໃນໄລຍະໃໝ່ ແລະ ແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນ ໃຫ້ບັນດາຂະແໜງການ ແລະທ້ອງຖິ່ນກຳນົດຫຼັກການ, ບູລິມະສິດ ແລະຈຸດສຸມຂອງການລົງທຶນໄວ້ຢ່າງຊັດເຈນພໍສົມຄວນຕາມທີ່ໄດ້ລະບຸໃນຄໍາສັ່ງ ເລກທີ 12/ນຍ ແລະ ຄໍາແນະນໍາຂອງກະຊວງແຜນການ ແລະການລົງທຶນ ສະບັບເລກທີ 2034/ກຜທ.ກຜ3

ຫຼັກການໃນການຈັດສັນໃຫ້ແກ່ໂຄງການລົງທຶນຂອງລັດ ມີຄື: ຕ້ອງມີຈຸດສຸມ, ຫຼີກລ່ຽງການຈັດສັນແບບສະເລ່ຍເພື່ອສຸມທຶນຮອນເຂົ້າໃສ່ ບັນດາໂຄງການສືບຕໍ່ທີ່ຊຸກຍູ້ໃຫ້ເສດຖະກິດ ແລະ ການຜະລິດເຕີນໂຕ ໂດຍສະເພາະໂຄງການທີ່ໃກ້ຈະສຳເລັດ (80-90%) ເພື່ອໃຫ້ສໍາເລັດ ແລະ ສາມາດນໍາໃຊ້ໄວ; ໃນປີ 2025 ຊຳລະໂຄງການໜີ້ສິນແຕ່ປີ 2021 ຄືນຫຼັງ ທີ່ມີມູນຄ່າຄ້າງຊຳລະບໍ່ເກີນ 500 ລ້ານກີບ ເພື່ອໃຫ້ສິ້ນສຸດໂຄງການ ແລະປົດອອກຈາກແຜນລົງທຶນຂອງລັດ.

ເນື່ອງຈາກວ່າ ໃນປີ 2025 ນີ້ ລັດຖະບານບໍ່ໄດ້ກຳນົດໂຄງປະກອບການລົງທຶນຂອງລັດ, ດັ່ງນັ້ນກະຊວງແຜນການ ແລະການລົງທຶນຈຶ່ງໄດ້ແຈ້ງເພດານລວມໃຫ້ກະຊວງ, ອົງການ ແລະ ທ້ອງຖິ່ນ ເປັນຜູ້ຄົ້ນຄວ້າຈັດສັນທຶນໃສ່ໂຄງການຂອງຕົນຕາມເງື່ອນໄຂຕົວຈິງຂອງແຕ່ລະພາກສ່ວນໂດຍໃຫ້ບຸລິມະສິດແກ່ໂຄງການໜີ້ສິນ ແລະ ໂຄງການສືບຕໍ່ທີ່ໃກ້ຈະສຳເລັດ ແລະ ໂຄງການຈໍາເປັນຮີບດ່ວນ, ສ່ວນໂຄງການໃໝ່ຖ້າມີຄວາມຈໍາເປັນແທ້ຕ້ອງໄດ້ສະເໜີຫາກະຊວງແຜນການ ແລະ ການລົງທຶນ ເພື່ອຄົ້ນຄວ້າສັງລວມ, ຈັດລຽງບູລິມະສິດ ແລະ ລາຍງານລັດຖະບານ ເພື່ອພິຈາລະນາອະນຸມັດ ເພື່ອບໍ່ໃຫ້ສ້າງໜີ້ສິນໃນຕໍ່ໜ້າ. ສະນັ້ນ, ໃນປີ 2025 ແມ່ນໄດ້ຈັດສັນທຶນໃຫ້ສູນກາງໃນສັດສ່ວນ 43% ແລະທ້ອງຖິ່ນໃນສັດສ່ວນ 57%; ໂດຍໄດ້ຈັດສັນໃຫ້ໂຄງການໜີ້ສິນ ຈໍານວນ 803.76 ຕື້ກີບ ກວມ 17.9%; ຈັດສັນໃຫ້ໂຄງການສືບຕໍ່ ຈໍານວນ 3,216.74 ຕື້ກີບ ກວມ 71.5%; ຈັດສັນໃຫ້ໂຄງການໃໝ່ ຈໍານວນ 479.48 ຕື້ກີບ ກວມ 10.7% (ລວມທັງທຶນຟື້ນຟູໄພພິບັດ).

แชร์