ຮ່ວມລົງນາມເຊັນສັນຍາ ລະຫວ່າງ ຝ່າຍອົງການປົກຄອງແຂວງ ຕາງໜ້າໂດຍມີ ທ່ານ ນິດສາ ມຽງລາວັນ ຮອງຫົວໜ້າພະແນກແຜນການ ແລະ ການລົງທຶນແຂວງ ພ້ອມດ້ວຍພະແນກການກ່ຽວຂ້ອງຈາກ 4 ພາກສ່ວນ ປະກອບມີຄື: ພະແນກຊັບ​ພະຍາກອນທຳມະຊາດ ແລະ ສິ່ງແວດລ້ອມແຂວງ, ພະແນກກະສິກຳ ແລະ ປ່າໄມ້ແຂວງ, ພະແນກອຸດສາຫະກຳ ແລະ ການຄ້າແຂວງ ແລະ ເຈົ້າເມືອງ ຊານໄຊ, ຝ່າຍນັກລົງທຶນ ຕາງໜ້າໂດຍ ທ່ານ ຟ້າມ ຖຸ່ຍ ລິງ ຜູ້ອໍານວຍການບໍລິສັດຜະລິດແປ້ງມັນຕົ້ນ ອ່ານຕ໋ວນ ຊານໄຊ ຈຳກັດຜູ້ດຽວ ໂດຍມີທ່ານ ທະນູໄຊ ບັນຊາລິດ ຮອງເຈົ້າແຂວງ ແລະ ພາກສ່ວນກ່ຽວຂ້ອງຂອງແຂວງ ຮ່ວມລົງນາມເປັນສັກຂີພິຍານ.

ໂຮງງານຜະລິດແປ້ງມັນຕົ້ນ ທີ່ຈະສ້າງຕັ້ງຄັ້ງນີ້ ມີອາຍຸສັນຍາສຳປະທານ 30 ປີ, ມີເນື້ອທີ່ທັງໝົດ 30 ເຮັກຕາ, ມີກໍາລັງການຜະລິດ ບໍ່ເກີນ 1 ແສນໂຕນຕໍ່ປີ ແລະ ອົບແຫ້ງເປືອກມັນຕົ້ນຜະລິດເປັນຫົວອາຫານ ເພື່ອຈໍາໜ່າຍພາຍໃນ ແລະ ຕ່າງປະເທດ ເຊິ່ງການເຊັນສັນຍາພັດທະນາໂຄງການລົງທຶນສ້າງຕັ້ງໂຮງງານຜະລິດແປ້ງມັນຕົ້ນຢູ່ເມືອງຊານໄຊ ຝ່າຍອົງການປົກຄອງແຂວງອັດຕະປື ມີຈຸດປະສົງຢາກພັດທະນາເສດຖະກິດຂອງແຂວງ ໃຫ້ມີການຂະຫຍາຍຕົວ ແລະ ເພື່ອສົ່ງເສີມການພັດທະນາວຽກງານກະສິກຳ ຢູ່ແຂວງ ອັດຕະປື ໃຫ້ມີການເຕີບໃຫຍ່ຂະຫຍາຍຕົວ, ສຳລັບຝ່າຍບໍລິສັດມີຈຸດປະສົງທີ່ຈະພັດທະນາໂຄງການສ້າງຕັ້ງໂຮງງານຜະລິດແປ້ງມັນຕົ້ນເພື່ອປຸງແຕ່ງເປັນຜະລິດຕະພັນແປ້ງມັນຕົ້ນ ສົ່ງຂາຍພາຍໃນ ແລະຕ່າງປະເທດ, ປະກອບສ່ວນສ້າງວຽກເຮັດງານທຳ ໃຫ້ປະຊາຊົນສາມາດສ້າງແຫຼ່ງລາຍຮັບໃຫ້ແກ່ພາກລັດໄດ້ອີກທາງເລືອກໜຶ່ງ.

ໂດຍ: ໄພບູນ