35 ປີ ແຫ່ງການຂະຫຍາຍຕົວຂອງ ທຄຕລ ສາຂາແຂວງໄຊຍະບູລີ

ທ່ານ ທະນູສັກ ແກ້ວປັນຍາ ຫົວໜ້າທະນາຄານການຄ້າຕ່າງປະເທດລາວມະຫາຊົນ (ທຄຕລ) ສາຂາແຂວງໄຊຍະບູລີ ໄດ້ເປີດເຜີຍໃນພິທີສະເຫຼີມສະຫຼອງວັນຫັນເປັນທະນາຄານທຸລະກິດຂອງທະນາຄານການຄ້າຕ່າງປະເທດລາວມະຫາຊົນສາຂາແຂວງໄຊຍະບູລີ ຄົບຮອບ 35 ປີ ໃນຄັ້ງນີ້ຖືວ່າເປັນເຫດການປະຫວັດສາດທາງດ້ານການເມືອງທີ່ສໍາຄັນຂອງ ທຄຕລ ມະຫາຊົນ ເຊິ່ງໄດ້ຫັນຈາກສາຂາທະນາຄານແຫ່ງລັດ ມາເປັນທະນາຄານທຸລະກິດຢ່າງເຕັມຮູບແບບ ໃນວັນທີ 1 ພະຈິກ 1989 ເປັນຕົ້ນມາເຊິ່ງໄດ້ສະແດງເຖິງການເຕີບໃຫຍ່ຂະຫຍາຍຕົວທາງດ້ານຈໍານວນ ແລະ ຄຸນນະພາບອັນໄດ້ປະກອບສ່ວນຢ່າງຕັ້ງໜ້າໃນການພັດທະນາ ແລະ ສ້າງສາພັດທະນາປະເທດຊາດເວົ້າລວມເວົ້າສະເພາະກໍຄືແຂວງໄຊຍະບູລີ ຕາມຄວາມສາມາດຕາມພາລະບົດບາດ ແລະໜ້າທີ່ທີ່ພັກ-ລັດຖະບານມອບໝາຍໃຫ້ສໍາເລັດຜົນເປັນຢ່າງດີເຊິ່ງສະແດງອອກ ປີ 2008 ໂຄງປະກອບການຈັດຕັ້ງຂອງສາຂາໄຊຍະບູລີ ໃນເບື້ອງຕົ້ນປະກອບດ້ວຍ 06 ຄົນເທົ່ານັ້ນ, ມາເຖິງເດືອນ 06/2008 ມີພະນັກງານທັງໜົດ 18 ຄົນ, ເຊີ່ງປະກອບດ້ວຍ: ຄະນະສາຂາ 02 ທ່ານ, ຄະນະຂະແໜງ 04 ທ່ານ, ຮັບພະນັກງານໃໝ່ເຂົ້າເປັນພະນັກງານທົດສອບ 10 ຄົນ, ພະນັກງານສັນຍາຈ້າງ 02 ຄົນ, ໃນນັ້ນຊັ້ນສູງ 4 ຄົນ, ປະລິນຍາຕີ 12 ຄົນ, ບໍ່ມີຊັ້ນ 02 ຄົນ; ເຊິ່ງມາຮອດປະຈຸບັນມີພະນັກງານທັງໝົດ 69 ຄົນ ຍິງ 34 ຄົນ ໃນນັ້ນ ມີສັນຍາຈ້າງ 09 ຄົນ ຍິງ 05 ຄົນ, ປະກອບມີ 04 ຂະແໜງການທີ່ຂື້ນກັບຄື: ຂະແໜງຫ້ອງການ-ບັນຊີ-ໄອທີ, ຂະແໜງສີນເຊື່ອ, ຂະແໜງບໍລິການ, ຂະແໜງຄັງເງີນສົດ.

ໃນປີ 2008 ມີຍອດເງິນຝາກຈຳນວນ: 10,65 ຕື້ກີບ; ຍອດສິນເຊື່ອທັງ ໝົດມີ 27,52 ຕື້ກີບ, ມີຕູ້ ATM 01 ໜ່ວຍ. ເຊິ່ງຜົນດຳເນີນທຸລະກິດຂອງສາຂາມາຮອດເດືອນ 10/2024 ມີຍອດເງິນຝາກເພີ່ມຂື້ນຈາກປີ 2008 ຈໍານວນ 258 ເທົ່າຕົວ; ຍອດສິນເຊື່ອ ເພີ່ມຂຶ້ນຈາກປີ 2008 ມີຈໍານວນ 10 ເທົ່າຕົວ; ມີຕູ້ ATM ທັງໝົດ ຈຳນວນ 23 ໜ່ວຍ; ຕູ້ຝາກເງີນ 02 ໜ່ວຍ, ມີຕົວແທນເງີນດ່ວນຊູມຊົນ (Become) ຈຳນວນ 40 ຕົວແທນ. ແຜນໃນຕໍ່ໜ້າທາງສາຂາຈະຂະຫຍາຍຕາໜ່າງບໍລິການ 01 ໜ່ວຍຄື ໜ່ວຍບໍລິການຊຽງຮ່ອນ. ຄາດວ່າຈະໃຫ້ໄດ້ເປີດນໍາໃຊ້ໃນໄຕມາດ 03 /2025.

ຈາກນັ້ນທ່ານ ພົງສະຫວັນ ສິດທະວົງ ເຈົ້າແຂວງໄຊຍະບູລີ ໄດ້ມີຄໍາເຫັນເຊິ່ງທ່ານໄດ້ກ່າວວ່າ: ພິທີສະເຫຼີມສະຫຼອງວັນຫັນເປັນທະນາຄານທຸລະກິດຂອງທະນາຄານການຄ້າຕ່າງປະເທດລາວ ມະຫາຊົນ ສາຂາແຂວງໄຊຍະບູລີ ຄົບຮອບ 35 ປີ ໃນມື້ນີ້, ແມ່ນເປັນການຢັ້ງຢືນ ໃຫ້ເຫັນໄດ້ບັນດາໝາກຜົນ, ຜົນງານ ແລະຄວາມສາມັກຄີເປັນເອກະພາບ, ຄວາມທຸ້ມເທ, ຄວາມຫ້າວຫັນ ແລະ ຄວາມບຸກບືນຕື່ນຕົວ ຢ່າງຕັ້ງໜ້າໃນປະກອບສ່ວນວຽກງານດ້ານຕ່າງໆ ດ້ວຍຄວາມຮັບຜິດຊອບສູງຂອງທຸກພາກສ່ວນ, ເວົ້າລວມ, ເວົ້າສະເພາະ ກໍຄືພະນັກງານຂອງ ທະນາຄານການຄ້າຕ່າງປະເທດລາວ ມະຫາຊົນ ທຸກຄົນ. ພິທີສະເຫຼີມສະຫຼອງວັນຫັນເປັນທະນາຄານທຸລະກິດຂອງ ທຄຕລ ຄົບຮອບ 35 ປີ ສາຂາແຂວງໄຊຍະບູລີ ໄດ້ຈັດຂຶ້ນໃນວັນທີ 23 ພະຈິກ 2024 ນີ້ ທີ່ລີສອດ 3 ເອື້ອຍນ້ອງໂດຍໃຫ້ກຽດເຂົ້າຮ່ວມຂອງທ່ານ ພົງສະຫວັນ ສິດທະວົງ ເຈົ້າແຂວງໄຊຍະບູລີ, ທ່ານ ເສນ ພັນລັກ ວ່າການເຈົ້າເມືອງໄຊຍະບູລີ, ທ່ານ ທະນູສັກ ແກ້ວປັນຍາ ຫົວໜ້າ ທຄຕລ ສາຂາແຂວງໄຊຍະບູລີ, ມີຮອງອໍານວຍການທະນາຄານ, ແຂກຖືກເຊີນ ພ້ອມດ້ວຍຫົວໜ້າສາຂາທະນາຄານພາຍໃນແຂວງ ແລະພະນັກງານພາຍໃນ ທຄຕລ ເຂົ້າຮ່ວມ.
.
ຂ່າວ+ພາບ: ບຸນທີ

แชร์