ທຫລ ສົນທະນາ ນິຕິກຳ ຄຸ້ມຄອງເງິນຕາຕ່າງປະເທດ

ທະນາຄານແຫ່ງ ສປປ ລາວ (ທຫລ) ຈັດເວທີສົນທະນາແລກປ່ຽນຄຳເຫັນກ່ຽວກັບການຈັດຕັ້ງຜັນຂະຫຍາຍນິຕິກຳ ຄຸ້ມຄອງເງິນຕາຕ່າງປະເທດ ຢູ່ ສປປ ລາວ (ການນຳໃຊ້ເງິນຕາຕ່າງປະເທດ ແລະ ການເປີດບັນຊີເງິນຝາກຕາຕ່າງປະເທດ ຢູ່ ສປປ ລາວ) ຂຶ້ນໃນວັນທີ 30 ສິງຫາ 2024, ທີ່ ທຫລ ໂດຍການເປັນປະທານຂອງ ທ່ານ ນາງ ວັດທະນາ ດາລາລອຍ ຮັກສາການ ຜູ້ວ່າການ ທຫລ, ໃຫ້ກຽດຂຶ້ນສົນທະນາມີ ທ່ານ ສຸລິວັດ ສຸວັນນະຈູມຄໍາ ຮອງຜູ້ວ່າການ ທຫລ, ທ່ານ ເພັດສະຖາພອນ ແກ້ວວົງວິຈິດ ຫົວໜ້າກົມຄຸ້ມຄອງເງິນຕາຕ່າງປະເທດ ທຫລ, ທ່ານ ພຸດທະໄຊ ສີວິໄລ ປະທານສະມາຄົມທະນາຄານລາວ ແລະທ່ານ ມະໂນລິດ ຊຸມພົນພັກດີ, ວ່າການຫົວໜ້າກົມຄຸ້ມຄອງລະບົບການຊໍາລະ ທຫລ ແລະ ທ່ານ ຫຸມແພງ ວິໄລພອນ ນັກຂ່າວ ໂທລະພາບແຫ່ງຊາດລາວ ຊຶ່ງເປັນຜູ້ດຳເນີນລາຍການສົນທະນາ.

ທ່ານ ສຸລິວັດ ສຸວັນນະຈູມຄໍາ ກ່າວວ່າ: ຜ່ານມາ ທຫລ ໄດ້ມີຄວາມພະຍາຍາມຢ່າງຕັ້ງໜ້າ ໃນການສົ່ງເສີມໃຫ້ນຳໃຊ້ເງິນກີບໃນທົ່ວລະບົບເສດຖະກິດ ແຕ່ການຈັດຕັ້ງປະຕິບັດນິຕິກຳກ່ຽວຂ້ອງ ຍັງບໍ່ທັນເຂັ້ມງວດ, ສະຕິຂອງສັງຄົມບໍ່ສູງ ເຮັດໃຫ້ສັງຄົມ ເກີດຄວາມນິຍົມຫັນໄປນໍາໃຊ້ເງິນຕາຕ່າງປະເທດ ມີອັດຕາສ່ວນຖືຄອງເງິນຕາຕ່າງປະເທດທຽບໃສ່ສະກຸນເງິນກີບຍັງສູງ; ຜູ້ທີ່ຄອບຄອງເງິນຕາຕ່າງປະເທດເມື່ອຕ້ອງການແລກປ່ຽນເປັນເງິນກີບ ບໍ່ຂາຍໃຫ້ກັບທະນາຄານ; ສ່ວນໜຶ່ງເກີດມາຈາກຄວາມຕ້ອງການຖືຄອງເງິນຕາຕ່າງປະເທດ ເພື່ອຊຳລະຢູ່ພາຍໃນ ສປປ ລາວ. ພ້ອມດຽວກັນນີ້ ສັງຄົມລາວ ແມ່ນມີຄວາມຊິນເຄີຍໃນການນຳໃຊ້ເງິນຕາຕ່າງປະເທດມາແຕ່ດົນນານ, ໃນຂະນະທີ່ສິນຄ້າສ່ວນໃຫຍ່ເປັນສິນຄ້ານຳເຂົ້າຈາກຕ່າງປະເທດ ແລະ ມີການກຳນົດໂຄງປະກອບລາຄາສິນຄ້າ ແລະ ການບໍລິການ ເປັນເງິນຕາຕ່າງປະເທດ, ສະນັ້ນ ເຮັດໃຫ້ສັງຄົມ ເກີດຄວາມນິຍົມຫັນໄປນໍາໃຊ້ເງິນຕາຕ່າງປະເທດ.
ອີງໃສ່ທິດຊີ້ນໍາຂອງລັດຖະບານ ກໍ່ຄືສະຫາຍເລຂາທິການໃຫຍ່ ປະທານປະເທດແຫ່ງ ສປປ ລາວ ກ່ຽວກັບ ການນຳໃຊ້ເງິນຕາຕ່າງປະເທດ ແລະ ການເປີດບັນຊີເງິນຝາກເງິນຕາຕ່າງປະເທດຢູ່ ສປປ ລາວ ຖືເປັນໂອກາດທີ່ເໝາະສົມ ໃນການຈັດຕັ້ງຄຸ້ມຄອງການນຳໃຊ້ເງິນຕາຕ່າງປະເທດ ແລະ ການເປີດບັນຊີເງິນຝາກຕາຕ່າງປະເທດ ໃຫ້ມີຂອບເຂດທີ່ຊັດເຈນ ເພື່ອຫັນສັງຄົມສູ່ການນຳໃຊ້ເງິນກີບ, ຊຶ່ງຈະສາມາດປະຕິບັດໄດ້ແມ່ນມີຄວາມຈຳເປັນໃນການສ້າງນິຕິກຳ ການນຳໃຊ້ເງິນຕາຕ່າງປະເທດ ແລະ ການເປີດບັນຊີເງິນຝາກເງິນຕາຕ່າງປະເທດ ຈຳເປັນຕ້ອງໄດ້ຕັ້ງຜັນຂະຫຍາຍກົດໝາຍວ່າດ້ວຍການຄຸ້ມຄອງເງິນຕາຕ່າງປະເທດ (ສະບັບປັບປຸງ) ສະບັບລົງວັນທີ 15/ສພຊ, ລົງວັນທີ 07 ກໍລະກົດ 2022 ແລະ ຄໍາສັ່ງວ່າດ້ວຍການຈັດຕັ້ງປະຕິບັດການຄຸ້ມຄອງເງິນຕາຕ່າງປະເທດ ສະບັບເລກທີ 10/ນຍ, ລົງວັນທີ 14 ກໍລະກົດ 2023, ຊຶ່ງນິຕິກຳດັ່ງກ່າວ ໄດ້ມອບໃຫ້ ທຫລ ກຳນົດເປົ້າໝາຍສະເພາະ ທີ່ສາມາດນຳໃຊ້ເງິນຕາຕ່າງປະເທດ ຢູ່ ສປປ ລາວ ເປັນຕົ້ນ ເຂດເສດຖະກິດພິເສດ, ເຂດການຄ້າຊາຍແດນ, ຮ້ານຄ້າປອດພາສີ ລວມທັງການປະຕິບັດພັນທະຕໍ່ລັດຂອງຫົວໜ່ວຍວິສາຫະກິດທີ່ມີລາຍຮັບເປັນເງິນຕາຕ່າງປະເທດ” ແລະ ໃຫ້ ທຫລ ປັບປຸງລະບົບການຊໍາລະພາຍໃນປະເທດໃນຮູບແບບເອເລັກໂຕຣນິກ ທີ່ເປັນເງິນຕາຕ່າງປະເທດ ໃຫ້ມີຂອບເຂດຈະແຈ້ງ, ມີກົນໄກການຢັ້ງຢືນທຸລະກຳ ຖືກຕ້ອງຕາມຈຸດປະສົງຂອງການຊຳລະທີ່ແທ້ຈິງ ເພື່ອເຮັດໃຫ້ການນຳໃຊ້ເງິນຕາຕ່າງປະເທດ ຖືກຕ້ອງຕາມກົດໝາຍ ແລະ ລະບຽບການ.

ນອກຈາກນີ້ໃນໄລຍະຜ່ານມາ ທຫລ ຍັງບໍ່ໄດ້ຜັນຂະຫຍາຍເປັນນິຕິກຳສະເພາະເພື່ອຄຸ້ມຄອງການນຳໃຊ້ເງິນຕາຕ່າງປະເທດ ແລະການເປີດບັນຊີເງິນຝາກເງິນຕາຕ່າງປະເທດ ຢູ່ ສປປ ລາວ ດັ່ງກ່າວ, ເຮັດໃຫ້ການຄອບຄອງເງິນຕາຕ່າງປະເທດ ທັງໃນຮູບແບບເງິນຝາກ ແລະ ເງິນສົດ ຂອງສັງຄົມ ລາວ ຍັງມີການປະຕິບັດ ບໍ່ເປັນເອກະພາບ ແລະ ມີມາດຕະຖານທີ່ຊັດເຈນ. ສະນັ້ນ, ໂດຍອີງຕາມຄວາມຈຳເປັນຄືດັ່ງກ່າວ ທຫລ ຈື່ງໄດ້ນຳສະເໜີ 2 ນິຕິກຳທີ່ສໍາຄັນຄື: 1) ຮ່າງຂໍ້ຕົກລົງວ່າດ້ວຍການນຳໃຊ້ເງິນຕາຕ່າງປະເທດຢູ່ ສປປ ລາວ; 2) ຮ່າງຂໍ້ຕົກລົງວ່າດ້ວຍການຄຸ້ມຄອງບັນຊີິເງິນຝາກເປັນເງິນຕາຕ່າງປະເທດຢູ່ ສປປ ລາວ. ຊຶ່ງທັງ 2 ນິຕິກຳດັ່ງກ່າວ ແມ່ນມີຄວາມສໍາຄັນ ແລະ ຈະເປັນເຄື່ອງມື ຂອງ ທຫລ ລວມທັງພາກສ່ວນກ່ຽວຂ້ອງ ເພື່ອນໍາໃຊ້ເຂົ້າໃນການຄຸ້ມຄອງ ການນຳໃຊ້ເງິນຕາຕ່າງປະເທດ ແລະການເປີດບັນຊີເງິນຝາກຕາຕ່າງປະເທດ ຢູ່ພາຍໃນ ສປປ ລາວ; ສ້າງຄວາມເປັນລະບຽບຮຽບຮ້ອຍ ແລະ ຄວາມເປັນເອກະພາບຕໍ່ການຈັດຕັ້ງປະຕິບັດຂອງທຸກພາກສ່ວນທີ່ກ່ຽວຂ້ວງ ທັງສູນກາງ ແລະ ທ້ອງຖິ່ນ; ເພື່ອເປັນການຊຸກຍູ້ສົ່ງເສີມການຄ້າ, ການບໍລິການ ແລະການລົງທຶນລະຫວ່າງປະເທດເຮັດໃຫ້ມີລາຍຮັບເປັນເງິນຕາຕ່າງປະເທດເຂົ້າສູ່ລະບົບທະນາຄານຫຼາຍຍິ່ງຂຶ້ນ.

ເຖິງຢ່າງໃດກໍ່ຕາມ, ເປົ້າໝາຍສູງສຸດຂອງ ທຫລ ແມ່ນຢາກເຫັນທຸກພາກສ່ວນນຳໃຊ້ເງິນກີບຢ່າງເປັນເອກະພາບ, ນຳໃຊ້ເງິນຕາຕ່າງປະເທດຢ່າງເປັນລະບຽບຮຽບຮ້ອຍຖືກຕ້ອງຕາມວັດຖຸປະສົງ ແລະເປົ້າໝາຍ, ນໍາໃຊ້ເງິນຕາຕ່າງປະເທດຢ່າງປະຢັດ ແລະຮັບປະກັນຖານະເງິນຕາຕ່າງປະເທດຊຳລະກັບຕ່າງປະເທດໃຫ້ມີຄວາມເຂັ້ມແຂງ.

แชร์