ຄຳມ່ວນຮ່ວມພາກທຸລະກິດ ແລກປ່ຽນການຄ້າ-ການລົງທຶນ

ກອງປະຊຸມປຶກສາຫາລືຮ່ວມ ລະຫວ່າງ ພາກລັດ ແລະພາກທຸລະກິດ ແຂວງຄໍາມ່ວນ ຄັ້ງທີ II ໄດ້ຈັດຂຶ້ນໃນວັນທີ 29 ສິງຫາ 2024 ທີ່ສະໂມສອນຂອງແຂວງ ໂດຍການເປັນປະທານຂອງ ທ່ານ ວັນໄຊ ພອງສະຫວັນ ເຈົ້າແຂວງຄໍາມ່ວນ, ມີບັນດາທ່ານຮອງເຈົ້າແຂວງ, ພະແນກການ, ສະພາການຄ້າ-ອຸດສາຫະກໍາແຂວງ, ບັນດາຜູ້ປະກອບການທຸລະກິດທັງພາຍໃນ ແລະຕ່າງປະເທດ ທີ່ດຳເນີນທຸລະກິດພາຍໃນແຂວງເຂົ້າຮ່ວມ.

ຈຸດປະສົງກອງປະຊຸມໃນຄັ້ງນີ້ເພື່ອເປັນການເປີດໂອກາດໃຫ້ພາກທຸລະກິດ, ຜູ້ປະກອບການໄດ້ພົບປະແລກປ່ຽນຄໍາເຫັນໂດຍສະເພາະແມ່ນສະພາບບັນຫາຂໍ້ຫຍຸ້ງຍາກໃນການດໍາເນີນທຸລະກິດ ແລະ ຂໍ້ສະເໜີຕ່າງໆ ໃຫ້ຂະແໜງການພາກລັດໄດ້ຮັບຊາບ ເພື່ອພ້ອມກັນຄົ້ນຄວ້າປຶກສາຫາລື ກໍານົດມາດຕະການ ແລະ ຊອກຫາວິທີແກ້ໄຂ. ໃນກອງປະຊຸມບັນດາຜູ້ເຂົ້າຮ່ວມໄດ້ຮັບຟັງ ລາຍງານສະພາບການຈັດຕັ້ງປະຕິບັດວຽກງານທາງດ້ານການຄ້າ, ການລົງທຶນໃນ 1 ປີຜ່ານມາ ທີ່ສະເໜີໂດຍ ທ່ານ ສົມວິໄຊ ວົງທິລາດ ຫົວໜ້າພະແນກອຸດສາຫະກໍາ ແລະ ການຄ້າແຂວງ ທີ່ໄດ້ຍົກໃຫ້ເຫັນສະພາບລວມ, ດ້ານທ່າແຮງ ແລະ ສະພາບການພັດທະນາເສດຖະກິດ-ສັງຄົມຂອງແຂວງ. ໃນປີ 2023 ແຂວງຄໍາມ່ວນແມ່ນມີການຂະຫຍາຍຕົວຢູ່ໃນລະດັບ 5,88% ລວມຍອດຜະລິດຕະພັນພາຍໃນບັນລຸ 16.593 ຕື້ກີບ ເທົ່າກັບ 111,43% ຂອງ ແຜນການປີ, ດ້ານການລົງທຶນເພື່ອການພັດທະນາບັນລຸໄດ້ 4.696 ຕື້ກີບ ເທົ່າກັບ 132,87% ຂອງແຜນການປີ, ການລົງທຶນຂອງເອກະຊົນພາຍໃນ ແລະ ຕ່າງປະເທດ ປີ 2023 ໄດ້ເພີ່ມຂຶ້ນ. ທົ່ວແຂວງມີໂຮງງານອຸດສາຫະກໍາປຸງແຕ່ງທັງໝົດ 282 ແຫ່ງ, ມູນຄ່າລົງທຶນ 4.802,62 ຕື້ກວ່າກກີບ, ໃນນັ້ນປະກອບມີໂຮງງານຂະໜາດໃຫຍ່ມີ 13 ແຫ່ງ, ໂຮງງານຂະໜາດກາງມີ 46 ແຫ່ງ ແລະ ໂຮງງານຂະໜາດນ້ອຍມີ 223 ແຫ່ງ, ດ້ານມູນຄ່າການຄ້າລະຫວ່າງປະເທດສາມາດປະຕິບັດໄດ້ 1.222,17 ລ້ານໂດລາ, ທຽບໃສ່ແຜນປີປະຕິບັດໄດ້ 166%, ນອກນີ້ ຍັງໄດ້ຍົກໃຫ້ເຫັນບັນຫາຂໍ້ສະດວກ, ຂໍ້ຫຍຸ້ງຍາກ ແລະ ທິດທາງແຜນການທີ່ຈະສືບຕໍ່ຈັດຕັ້ງປະຕິບັດໃນຕໍ່ໜ້າ.

ໂອກາດນີ້ ທ່ານ ເຈົ້າແຂວງຄໍາມ່ວນ ກໍ່ໄດ້ມີຄໍາເຫັນ ແລະ ສະແດງຄວາມຊົມເຊີຍຕໍ່ຜົນງານ, ຜົນສໍາເລັດທີ່ພາກລັດກໍ່ຄືພາກທຸລະກິດຍາດໄດ້ໃນໄລຍະຜ່ານມາ, ພ້ອມນັ້ນພາກລັດໃຫ້ເອົາໃຈໃສ່ສືບຕໍ່ຈັດຕັ້ງຜັນຂະຫຍາຍບັນດາເນື້ອໃນມະຕິຄໍາສັ່ງຂອງລັດຖະບານ ໂດຍສະເພາະແມ່ນຕິດພັນກັບວຽກງານການຄ້າ-ການລົງທຶນໃຫ້ແຂງແຮງກວ່າເກົ່າ, ສືບຕໍ່ເພີ່ມທະວີດຶງດູດການລົງທຶນທັງພາຍໃນ ແລະ ຕ່າງປະເທດເຂົ້າມາລົງທຶນໃຫ້ຫລາຍຂຶ້ນ, ສ້າງເງື່ອນໄຂອໍານວຍຄວາມສະດວກການລົງທຶນໃນດ້ານຕ່າງໆ ໃຫ້ມີຄວາມວ່ອງໄວ, ໂປ່ງໃສ, ບົນພື້ນຖານຖຶກຕ້ອງຕາມລະບຽບກົດໝາຍ, ກວດກາຄືນບັນດາວິສາຫະກິດ ຫລື ການລົງທຶນທີ່ໄດ້ເຊັນ MOU ແລ້ວແຕ່ຍັງບໍ່ທັນໄດ້ຈັດຕັ້ງປະຕິບັດ, ບໍ່ສອດຄ່ອງ, ບັນດາຄ່າເຊົ່າ, ຄ່າສໍາປະທານທີ່ເມິດສັນຍາເຮັດໃຫ້ເສຍຜົນປະໂຫຍດໃຫ້ຄົ້ນຄວ້າກວດກາຄືນ. ເພີ່ມທະວີຊຸກກຍູ້ສົ່ງເສີມບັນດາຫົວໜ່ວຍ SME ທີ່ມີໃນປະຈຸບັນໃຫ້ເຂັ້ມແຂງ, ເປັນເຈົ້າການສົ່ງເສີມຜະລິດຕະພັນພາຍໃນ, ພາຍຫຼັງສໍາເລັດກອງປະຊຸມສະພາການຄ້າໃນຖານະເປັນຂົວຕໍ່ໃຫ້ສັງລວມ ນໍາເອົາຄວາມຄິດເຫັນ ແລະ ຂໍ້ສະເໜີຕ່າງໆ ທີ່ພາກທຸລະກິດສະເໜີມາຍັງພາກລັດ ໄປຄົ້ນຄວ້າປຶກສາຫາລື ແລະ ຫາທາງແກ້ໄຂ, ເອົາໃຈໃສ່ໃນການໂຄສະນາປຸກລະດົມພາກສ່ວນທຸລະກິດທີ່ດໍາເນີນທຸລະກິດພາຍໃນແຂວງເຂົ້າມາເປັນສະຊິກໃຫ້ຫລາຍຂຶ້ນ, ຄຽງຄູ່ກັນນັ້ນບັນດາຜູ້ປະກອບການໃຫ້ສືບຕໍ່ພັດທະນາທຸລະກິດຂອງຕົນ, ເຂັ້ມງວດໃນການປະຕິບັດສັນຍາຂອງການດໍາເນີນທຸລະກິດ ແລະ ມີການຊຸກຍູ້ຊ່ວຍເຫລືອເຊີ່ງກັນ ແລະ ກັນ.

ກອງປະຊຸມຄັ້ງນີ້ ຍັງໄດ້ມີພິທີມອບໃບຍ້ອງຍໍ ໃຫ້ກົມກອງລວມໝູ່ທີ່ມີຜົນງານດີເດັ່ນໃນການປະກອບສ່ວນພັດທະນາເສດຖະກິດ-ສັງຄົມຂອງແຂວງ ປະຈໍາປີ 2023 ຈໍານວນ 98 ກົມກອງ, ໃນນີ້ພາກທຸລະກິດພາຍໃນ 87 ກົມກອງ, ພາກທຸລະກິດຕ່າງປະເທດ 11 ກົມກອງ.

แชร์