ນະຄອນຫລວງວຽງຈັນ ເລັ່ງລະບາຍນ້ຳອອກ ຍ້ອນນໍ້າຖ້ວມຫຼາຍບ້ານ

ຈາກສະພາບຝົນຕົກຕິດຕໍ່ກັນເປັນເວລາຫລາຍວັນເຮັດໃຫ້ນ້ຳຖ້ວມບ້ານເຮືອນທີ່ຢູອາໄສ ແລະ ພື້ນທີ່ທຳການຜະລິດຂອງພໍ່ແມ່ປະຊາຊົນ. ດັ່ງນັ້ນ, ດ້ວຍຄວາມເປັນຫ່ວງເປັນໃຍຈາກການນຳນະຄອນຫລວງວຽງຈັນ(ນວ) ໃນວັນທີ 28-29 ສິງຫາ 2024 ນີ້, ການນຳນະຄອນ ຫລວງວຽງຈັນ ນຳໂດຍ ທ່ານ ສິລິລາດທົງສິນ ທອງເພັງ ຮອງເຈົ້າຄອງນະຄອນຫລວງວຽງຈັນ ພ້ອມດ້ວຍຄະນະ ໄດ້ລົງພື້ນທີ່ຕິດຕາມ ແລະ ໃຫ້ທິດຊີ້ນຳໃນການປ້ອງກັນນໍ້າຖ້ວມເຂດທີ່ມີຄວາມສ່ຽງ ຢູ່ເມືອງປາກງື່ມ, ເມືອງສີໂຄດຕະບອງ ແລະ ເມືອງຫາດຊາຍຟອງ.

ການລົງເຄື່ອນໄຫວຕິດຕາມສະພາບນ້ຳຖ້ວມໃນວັນທີ 28 ສິງຫາ , ທ່ານ ທະວີໄຊ ເໝົາຊົມພູ ເຈົ້າເມືອງສີໂຄດ​ຕະ ບອງ ໄດ້ລາຍງານສະພາບນໍ້າຖ້ວມຢູ່ພາຍໃນເມືອງ ປັດຈຸບັນ, ໄດ້ຮັບຜົນກະທົບຈາກໄພທຳມະຊາດນ້ຳໄຫລຊຸເຂົ້າຖ້ວມເຮືອນປະຊາຊົນ ເຂດບ້ານຕາດທອງ ຈຳນວນໜຶ່ງ ແລະ ຢູ່ບ້ານໜອງດາ ທັງໝົດ 7 ຈຸດ, ມີເຮືອນປະຊາຊົນ ທີ່ໄດ້ຮັບຜົນກະທົບປະມານ 44 ຫລັງ ແລະ ພື້ນທີ່ທຳການຜະລິດກະສິກຳຈຳນວນໜຶ່ງ ຖືກນ້ຳຖ້ວມໜັກ ເຊິ່ງ ຈຸດທີ່ຖ້ວມໜັກກວ່າໝູ່ ແມ່ນຢູ່ບ້ານໜອງດາ ທີ່ໄດ້ເຝົ້າລະວັງເປັນພິເສດ.

ຫລັງຈາກນັ້ນ, ທ່ານ ຮອງເຈົ້າຄອງ ນວ ພ້ອມຄະນະກໍໄດ້ຮ່ວມກັນລົງເບິ່ງສະຖານທີ່ສູບນ້ຳ ແລະ ຢ້ຽມຢາມພໍ່ແມ່ປະຊາຊົນ ທີ່ຖືກນໍ້າຖ້ວມ ຢູ່ໃນບ້ານໜອງດາ.
ສຳລັບ ການປ້ອງກັນນໍ້າຖ້ວມຢູ່ເມືອງຫາດຊາຍຟອງ, ທ່ານ ສຸລິນ ອິນທາ​ທິລາດ ຫົວໜ້າກະສິກໍາ​ປ່າ​ໄມ້​ເມືອງ​ ​ໃຫ້​ຮູ້​ໃນວັນທີ 29 ສິງຫາ ນີ້ວ່າ: ປັດຈຸບັນ, ໄດ້​ແຈ້ງ​ໃຫ້​​​ພໍ່​ແມ່​ປະຊາຊົນ​ທີ່ອາໄສຢູ່ນອກເຂດຄູກັນນໍ້າ ກຽມ​ພ້ອມ​ໃນ​ການ​ຍົກຍ້າຍ, ພ້ອມທັງເຝົ້າລະວັງທໍ່​ລະບາຍນໍ້າຫ້ວຍຕ່າງໆອອກນໍ້າຂອງ​ ເພື່ອ​ບໍ່ໃຫ້​ນໍ້າຂອງ​​ໄຫລ​ເຂົ້າ​ສູ່​ຕົວເມືອງນະຄອນຫລວງວຽງຈັນ ໂດຍຈັດ​ກໍາລັງ​ທະຫານ​ປ້ອງ​ກັນເວັນຍາມຕະຫລອດ 24 ຊົ່ວໂມງ​. ຂະນະ​ດຽວກັນ​, ກໍໄດ້ຕິດຕັ້ງຈັກສູບ​ນໍ້າ ເພື່ອລະບາຍນໍ້າຕາມຫ້ວຍຕ່າງໆທີ່ມີຄວາມສ່ຽງ ເປັນ​ຕົ້ນ ຢູ່ຫ້ວຍໝາກ​ຮ​ຽວ, ຫ້ວຍເດື່ອ ແລະ ຫ້ວຍວາດ​ ເພື່ອ​ກຽມພ້ອມ​ເຝົ້າ​ລະວັງ​ນໍ້າ​ຕະຫລອດ​ເວລາ.

ໂອກາດນີ້, ທ່ານ ສິລິລາດທົງສິນ ທອງເພັງ ໃນນາມຄະນະກຳມະການປ້ອງກັນ ແລະ ຄຸ້ມຄອງໄພພິບັດຂັ້ນ ນວ ໄດ້ຮຽກຮ້ອງໃຫ້ຄະນະຮັບຜິດຊອບຂະແໜງການທີ່ກ່ຽວຂ້ອງເອົາໃຈໃສ່ ສົມທົບກັບຄະນະນຳບ້ານ ແລະ ພໍ່ແມ່ປະຊາ ຊົນ ເພື່ອເກັບກໍາຂໍ້ມູນຜົນເສຍຫາຍລະອຽດ ແລ້ວສະຫລຸບລາຍງານໃຫ້ຖືກຕ້ອງ ແລະ ວ່ອງໄວ, ພ້ອມທັງໃຫ້ການຊ່ວຍເຫລືອປະຊາຊົນໃນທຸກດ້ານ ໂດຍໃຫ້ທຸກພາກສ່ວນລະດົມກຳລັງມາຊ່ວຍເຫລືອເຄື່ອນຍ້າຍເຄື່ອງຂອງ, ຊັບສິນ ແລະ ປະຊາຊົນອອກຈາກຈຸດນ້ຳຖ້ວມ ເພື່ອຍົກຍ້າຍໄປໄວ້ພື້ນທີ່ສູງ ແລະ ເຂດທີ່ປອດໄພ; ເລັ່ງສູບນ້ຳອອກໄປສູ່ນ້ຳຂອງໃຫ້ຫລຸດລົງໂດຍໄວ. ພ້ອມນີ້, ທ່ານ ຮອງ​ເຈົ້າຄອງ ນວ ພ້ອມຄະນະຍັງໄດ້ມອບເງິນຊ່ວຍເຫລືອນໍ້າຖ້ວມໃຫ້ແກ່ບ້ານ ໜອງດາ ຈຳນວນ 30 ລ້ານກີບ, ໃຫ້ເມືອງສີໂຄດຕະບອງ 100 ລ້ານກີບ , ເມືອງຫາດຊາຍຟອງ 30 ລ້ານກີບ, ເມືອງປາກງື່ມ 30 ລ້ານກີບ ແລະ ບ້ານໝາກຮຽວ 10 ລ້ານກີບ ເພື່ອນໍາໄປຊື້ອຸປະກອນນຳມາປະກອບເຂົ້າໃນວຽກງານຕ້ານໄພທຳມະຊາດ ແລະ ຊ່ວຍເຫລືອພໍ່ແມ່ປະຊາຊົນທີ່ໄດ້ຮັບຜົນກະທົບຈາກໄພນໍ້າຖ້ວມໃນຄັ້ງນີ້.
ທີ່ມາ: ຂປລ

แชร์