ບໍລິສັດ ພູເບ້ຍ ມາຍນິງ ມອບເງິນປັນຜົນ 7.5 ລ້ານໂດລາສະຫະລັດໃຫ້ລັດຖະບານລາວ

ນັບແຕ່ເລີ້ມດໍາເນີນງານ 15 ປີຜ່ານມາ, ບໍລິສັດ ພູເບ້ຍ ມາຍນິງ ໄດ້ມອບພັນທະສະສົມໃຫ້ລັດຖະບານລາວ ລື່ນ 1 ຕື້ໂດລາສະຫະລັດ, ຊຶ່ງມີຄວາມສໍາຄັນຕໍ່ການພັດທະນາເສດຖະກິດຂອງຊາດ. ໃນໄຕມາດທໍາອິດຂອງປີ 2024, ບໍລິສັດ ພູເບ້ຍ ມາຍນິງ ສືບຕໍ່ປະຕິບັດພັນທະທາງດ້ານການເງິນດັ່ງກ່າວນີ້ ດ້ວຍການມອບເງິນປັນຜົນຈໍານວນ 7.5 ລ້ານໂດລາສະຫະລັດໃຫ້ລັດຖະບານລາວ. ເງິນປັນຜົນຈໍານວນນີ້ ແມ່ນການປະກອບສ່ວນປະຈໍາປີລ່າສຸດໃຫ້ພາກລັດ, ຊຶ່ງຖືຮຸ້ນ 10 ສ່ວນຮ້ອຍໃນບໍລິສັດ.

ປັດຈຸບັນການມອບເງິນປັນຜົນໃຫ້ພາກລັດ ມີຈໍານວນທັງໝົດ 92.5 ລ້ານໂດລາສະຫະລັດ ນັບແຕ່ປີ 2012 ເປັນຕົ້ນມາ ພາຍຫຼັງການເຊັນສັນຍາຮ່ວມຮຸ້ນ. ມາຮອດປັດຈຸບັນ, ການມອບພັນທະສະສົມຂອງບໍລິສັດ ພູເບ້ຍ ມາຍນິງໃຫ້ພາກລັດ ລວມມີອາກອນບໍລິສັດຈໍານວນ 313.3 ລ້ານໂດລາສະຫະລັດ, ຄ່າຊັບພະຍາກອນແຮ່ທາດຈໍານວນ 485.2 ລ້ານໂດລາສະຫະລັດ, ອາກອນລາຍໄດ້ສ່ວນບຸກຄົນຈໍານວນ 62.7 ລ້ານໂດລາສະຫະລັດ, ແລະ ກອງທຶນປະກັນສັງຄົມຈໍານວນ 18.7 ລ້ານໂດລາສະຫະລັດ ແລະ ການປະກອບສ່ວນອື່ນໆອີກຈໍານວນ 66.2 ລ້ານໂດລາສະຫະລັດ.

ຜູ້ອໍານວຍການ ແລະ ປະທານບໍລິຫານຂອງບໍລິສັດ ແພນອອສ໌, ທ່ານ ດາລິງ ເຊັງ ໄດ້ກ່າວວ່າ ປີ 2024 ຈະນໍາເອົາໂອກາດຕ່າງໆຫຼາຍຂຶ້ນໃຫ້ບໍລິສັດ ພູເບ້ຍ ມາຍນິງ, ຊຶ່ງເປັນບໍລິສັດໃນເຄືອຂອງແພນອອສ໌. “ປີນີ້ ເປັນຂີດໝາຍຂອງການປ່ຽນແປງ ແລະ ວິວັດທະນາການສໍາລັບໂຄງການຂອງບໍລິສັດ ພູເບ້ຍ ມາຍນິງພວກເຮົາ. ລາຄາສິນຄ້າທີ່ເຂັ້ມແຂງໃນປັດຈຸບັນ, ໂຄງການຂຸດຄົ້ນ-ປຸງແຕ່ງ ທອງ-ຄໍາ ພູຄໍາ ແລະ ໂຄງການຂຸດຄົ້ນ-ປຸງແຕ່ງ ຄໍາ-ເງິນ ບ້ານຫ້ວຍຊາຍ ສືບຕໍ່ຊອກຫາໂອກາດທີ່ຫຼາກຫຼາຍຕ່າງໆ ເພື່ອພັດທະນາບໍ່ຂຸດຄົ້ນໃໝ່ ແລະ ເຮັດໃຫ້ໂຄງການປັດຈຸບັນເຕີບໂຕ ສໍາລັບການຜະລິດທອງ ແລະ ຄໍາ ຢູ່ແຂວງໄຊສົມບູນ.”

“ພວກເຮົາມີລະບົບທີ່ມີເຕັກໂນໂລຊີສູງໃນທຸກພາກສ່ວນຂອງຂະບວນການຜະລິດພວກເຮົາ, ແລະ ເຂົ້າໃຈຄວາມສໍາພັນລະຫວ່າງການລົງທຶນພິເສດໃນເຕັກໂນໂລຊີ, ແລະ ຜົນຕ່າງໆທີ່ດີໃນວິທີການທີ່ເຕັກໂນໂລຊີດັ່ງກ່າວໄດ້ປັບປຸງຂີດຄວາມສາມາດໃນການຜະລິດຂອງພວກເຮົາ, ປັບປຸງການດໍາເນີນງານ ແລະ ຂະບວນການຕ່າງໆຂອງພວກເຮົາໃຫ້ມີປະສິດທິພາບຫຼາຍຂຶ້ນ, ແລະ ໃນທີ່ສຸດເຕັກໂນໂລຊີນີ້ ຈະພາໃຫ້ໄດ້ກໍາໄລດີຂຶ້ນ.”

“ປະທານບໍລິສັດ ພູເບ້ຍ ມາຍນິງ, ທ່ານ ຈັນເພັງ ບຸນນະຜົນ ໃຫ້ຮູ້ຕື່ມອີກວ່າ: ຂ້າພະເຈົ້າເນັ້ນຢໍ້າຄວາມໝັ້ນໃຈຂອງຕົນເອງ ນັບແຕ່ເດືອນມັງກອນ 2024, ວ່າພວກເຮົາຈະສືບຕໍ່ເຮັດວຽກຢ່າງໃກ້ຊິດກັບພາກລັດ ແລະ ຂະແໜງການຕ່າງໆທີ່ຮັບຜິດຊອບອຸດສາຫະກໍາບໍ່ແຮ່. ດັ່ງທີ່ພະນະທ່ານ ນາຍົກລັດຖະມົນຕີ ໄດ້ກ່າວໄວ້ ກ່ຽວກັບປະສິດທິຜົນຂອງໂຄງການບໍ່ແຮ່ຂອງລາວ, ໃຫ້ເປັນມາດຕະຖານໃຫ້ອຸດສາຫະກໍາດັ່ງກ່າວນີ້, ພວກເຮົາກໍ່ຕ້ອງການຊອກໂອກາດຕ່າງໆ ກັບຂະແໜງການຕ່າງໆທີ່ກ່ຽວຂ້ອງຂອງພາກລັດ ເພື່ອເຫັນໄດ້ວ່າອຸດສາຫະກໍານີ້ສາມາດໃຫ້ຜົນປະໂຫຍດສູງສຸດທາງດ້ານການເງິນແກ່ປະເທດລາວ ແລະ ປະຊາຊົນລາວ.”

ຈົບຂ່າວ

ສໍາລັບຂໍ້ມູນເພີ້ມຕື່ມ, ກະລຸນາຕິດຕໍ່:

ແກ້ວເລີດສະໄໝ ທໍາມະລັງສີ                                                           

ທີ່ປຶກສາຂັ້ນສູງຝ່າຍພົວພັນ-ສື່ສານ                                                   

ໂທ: 021 268 000                                                                               

ອີເມວ:[email protected]       

ພົມວິຫານ ທຽບພົງພັນ

ທີ່ປຶກສາຝ່າຍພົວພັນ-ສື່ສານ

ໂທ: 021 268 000

  ອີເມວ:[email protected]

แชร์