ນັກຂ່າວລາວ ກຽມໂຄສະນາວຽກປະຊາກອນ

ວັນທີ 4 ຕຸລານີ້, ກະຊວງແຜນການ ແລະການລົງ ທຶນຮ່ວມກັບອົງການສະຫະປະຊາຊາດກອງທຶນສຳລັບປະຊາກອນ (UNFPA) ໄດ້ຈັດການຝຶກອົບຮົມໃຫ້ສື່ມວນຊົນ ຈາກສຳນັກຂ່າວຕ່າງໆອ້ອມຂ້າງສູນກາງກ່ຽວກັບການກະກຽມການເຂົ້າ ຮ່ວມຂອງ ສປປ ລາວ ສູ່ກອງປະຊຸມອາຊີ-ປາຊີຟິກ ວ່າດ້ວຍປະຊາກອນ ຄັ້ງທີ 7 (7th APPC) ແລະການທີ່ ສປປ ລາວ ຈະດຳ ເນີນກອງປະຊຸມແຫ່ງຊາດ ວ່າດ້ວຍປະຊາກອນ ແລະການພັດທະນາ (NPDP) ປະຈໍາປີ 2023.

ໃນການຝຶກອົບຮົມຄັ້ງນີ້, ມີບັນດາວິທະຍາກອນຈາກຄະນະປະສານດ້ານສື່ມວນຊົນຂອງ UNFPA ຊຶ່ງມີບັນດາສື່ຫຼັກຂອງ ສປປ ລາວ ພ້ອມດ້ວຍບັນດາສື່ຈາກກະຊວງ/ອົງການກ່ຽວຂ້ອງເຂົ້າ ຮ່ວມເປັນສຳມະນາກອນ.

ຈຸດປະສົງຂອງການຈັດຝຶກອົບຮົມແມ່ນເພື່ອສ້າງຄວາມເຂົ້າໃຈຮ່ວມກັນກ່ຽວກັບກອງປະຊຸມສາກົນກ່ຽວກັບປະຊາກອນ ແລະ ການພັດທະນາ (ICPD) ຊຶ່ງໃນປີ 2024 ທີ່ຈະມາເຖິງ ICPD ຈະຄົບຮອບ 30 ປີ; ພ້ອມກັນນີ້, ກໍໄດ້ນໍາສະເໜີກ່ຽວກັບ 7th APPC ຊຶ່ງຕາມແຜນເບື້ອງຕົ້ນຈະຈັດຂຶ້ນທີ່ປະເທດໄທໃນລະຫວ່າງວັນທີ 15-17 ພະຈິກ ທີ່ຈະມາເຖິງນີ້. ນອກນີ້, ກໍໄດ້ນໍາສະເໜີກ່ຽວ ກັບ NPDP ຊຶ່ງຕາມແຜນຈະຈັດຂຶ້ນໃນລະຫວ່າງວັນທີ 23-24 ຕຸລານີ້ ທີ່ນະຄອນຫຼວງວຽງຈັນ ໂດຍກອງປະຊຸມນີ້ມີກະຊວງແຜນການ ແລະການລົງທຶນ ຮ່ວມກັບ UNFPA ເປັນເຈົ້າພາບ ແລະໝາກຜົນຂອງກອງປະຊຸມ NPDP ຈະນໍາເຂົ້າສູ່ຖະ ແຫຼງການແຫ່ງຊາດຂອງຄະນະຜູ້ແທນລາວທີ່ຈະໄປຮ່ວມ 7th APPC.

ທ່ານ ພຸດທະວັນ ສີສະຫວັດ ໜຶ່ງໃນຄະນະປະສານດ້ານດ້ານສື່ມວນຊົນຂອງ UNFPA ກ່າວວ່າ: ສື່ມວນຊົນມີບົດບາດສຳຄັນໃນການເຜີຍແຜ່ ແລະສະໜັບສະໜູນສົ່ງເສີມຄໍາໝັ້ນສັນຍາຂອງ ICPD ແລະ ຜົນສຳເລັດການດຳເນີນວຽກງານດ້ານດັ່ງກ່າວໃນ ສປປ ລາວ ເປັນຕົ້ນໄດ້ມີສ່ວນຮ່ວມໃນການປູກຈິດສຳນຶກໃຫ້ປະຊາຊົນ ເຂົ້າໃຈກ່ຽວກັບແຜນການປະຕິບັດງານ ICPD ໂດຍສະເພາະຄໍາໝັ້ນສັນຍາແຫ່ງຊາດຕໍ່ກັບ ICPD25 (ກອງປະຊຸມທີ່ທົບທວນການຈັດຕັ້ງປະຕິບັດ ICPD ຄົບຮອບ 25 ປີ), ຖະແຫຼງການລັດຖະມົນຕີ ປີ 2013 ແລະ ປະ ຊາກອນແຫ່ງຊາດຂອງລາວ.

ຕອນທ້າຍຂອງການຝຶກອົບຮົບ, UNFPA ແລະສື່ມວນຊົນທີ່ເຂົ້າຮ່ວມກໍໄດ້ພ້ອມກັນຫາລືກ່ຽວກັບບັນດາຫົວຂໍ້ຕ່າງໆທີ່ສົນໃຈພ້ອມທັງສ້າງກຸ່ມເຊື່ອມຕໍ່ທາງອອນລາຍ ເພື່ອຮ່ວມກັນໃນການໂຄສະນາບັນດາຜົນງານຂອງພັກ-ລັດຖະບານລາວ ໃນການຈັດຕັ້ງປະຕິບັດຄໍາໝັ້ນສັນຍາແຫ່ງຊາດຕໍ່ສາກົນກ່ຽວກັບວຽກງານດັ່ງກ່າວ ແລະ ບັນດາຂໍ້ມູນສຳຄັນອື່ນໆທີ່ກ່ຽວຂ້ອງ.

ຂ່າວ: ຣັດສະໝີ ດວງສັດຈະ.

แชร์