ຄູ ຄືຜູ້ພັດທະນາທີ່ສຳຄັນ

ທ່ານອາຈານ ສີໂຫ ວັນນະສີ ຫົວໜ້າໜ່ວຍງານວິຊາການພາກມັດທະຍົມ ຂອງໂຮງຮຽນວິຣະຖາວອນ ໃຫ້ສຳພາດເນື່ອງໃນໂອກາດວັນຄູແຫ່ງຊາດ ຄົບຮອບ 29ປີ ( 7 ຕຸລາ 2023) ທີ່ຈະມາເຖິງນີ້ວ່າ: ວັນຄູແມ່ນວັນໜຶ່ງທີ່ມີຄວາມສຳຄັນຫຼາຍ ເພາະອາຊີບຄູເປັນອາຊີບໜຶ່ງທີ່ມີບົດບາດຢ່າງຫຼວງຫຼາຍໃນການພັດທະນາຊັບພະຍາກອນມະນຸດ, ມີບົດບາດຕໍ່ຄຸນນະພາບຊີວິດຂອງສັງຄົມ ໂດຍສະເພາະນັກຮຽນນັກສຶກສາ ເລີ່ມຕົ້ນຈາກຄູເປັນຜູ້ສືກສາອົບຮົມ, ເມື່ອມີຄວາມສຳຄັນແນວນັ້ນດັ່ງນັ້ນໃນທຸກໆປີເພີ່ນຈຶ່ງຈັດວັນຄູຂຶ້ນໃຫ້ແຕ່ລະພາກສ່ວນເຫັນໄດ້ເຖິງຄວາມສຳຄັນຂອງຄູ ເລະເພື່ອລະນຶກເຖິງຄວາມງາມຄວາມດີຂອງຄູ.

ທ່ານອາຈານ ສີໂຫ ວັນນະສີ ກ່າວຕື່ມວ່າ: ໃນນາມເປັນຄູຜູ້ໜຶ່ງຮູ້ສຶກດີໃຈທີ່ໄດ້ເປັນສ່ວນໜຶ່ງໃນການພັດທະນານັກຮຽນ, ຮູ້ສຶກໂຊກດີທີ່ໄດ້ຢູ່ໃນອາຊີບທີ່ສາມາດຊີ້ທິດທາງສັງຄົມໄດ້ເພາະວ່າຖ້າຢາກໃຫ້ນັກຮຽນດີກໍສອນໃຫ້ດີສະນັ້ນຄູແມ່ນສຳຄັນຫຼາຍຊຶ່ງນັກຮຽນແມ່ນຢູ່ໃນມືເຮົາອະນາຄົດຈະເປັນແນວໃດສ່ວນໜຶ່ງແມ່ນຂຶ້ນກັບຄູ.

ທ່ານອາຈານ ສີໂຫ ວັນນະສີ ກ່າວອີກວ່າ: ນັບວ່າເປັນຄວາມໂຊກດີຂອງຕົນເອງທີ່ໄດ້ມາສິດສອນຢູ່ໂຮງຮຽນວິຣະຖາວອນແຫ່ງນີ້ເນື່ອງຈາກມີຜູ້ບໍລິຫານທີ່ມີວິໃສທັດເບີ່ງກວ້າງມອງໄກເຫັນຄວາມສຳຄັນໃນການພັດທະນາຄູເມື່ອເວລາພັກສົກຮຽນຄູຈະບໍ່ໄດ້ພັກເພີ່ນຊອກຫາຄູມາສອນຍົກລະດັບໃຫ້ຄູເພື່ອໃຫ້ມີວິຊາຊີບສູງຂຶ້ນເລື່ອຍໆ, ສຳລັບຢູ່ໂຮງຮຽນມັດທະຍົມວິຣະຖາວອນ ມີຄູທັງໝົດ 34ຄົນ, ຍິງ 24 ຄົນ, ມີທັງຄູຕ່າງປະເທດ, ຄູລາວ ແລະ ຄູຮັບເຊີນ, ມີນັກຮຽນແຕ່ມໍ1-ມໍ7 ຈຳນວນ 418 ຄົນ, ໂຮງຮຽນດັ່ງກ່າວ ຕັ້ງຢູ່ເມືອງສີສັດຕະນາກ ນະຄອນຫຼວງວຽງຈັນ.

แชร์