ຄູປຽບເໝືອນເຮືອຈ້າງລຳໜຶ່ງ ທີ່ລຳລຽນຂົນສົ່ງນັກຮຽນ ເຖິງຝັນ

ຄູເປັນອາຊີບໜຶ່ງທີ່ຄວນຍົກສູງ ຄູເປັນຜູ້ທີ່ເສຍສະຫຼະເອົາຄວາມຮູ້ທີ່ຕົນເອງມີຖ່າຍທອດໃຫ້ແກ່ນັກຮຽນຈົນປະສົບຜົນສຳເລັດ ຄູປຽບເໝືອນເຮືອຈ້າງລຳໜຶ່ງທີ່ລຳລຽງຂົນສົ່ງນັກຮຽນໃຫ້ເຖິງຝັ່ງຢ່າງປອດໄພ ແລະມີຄຸນນະພາບ ຄູຍັງປຽບສະເໝືອນພໍ່ແມ່ຜູ້ທີ່ສອງເປັນພໍ່ພິມແມ່ພິມຂອງຊາດທີ່ບົ່ມສອນນັກຮຽນໃຫ້ມີຄວາມຮູ້-ຄວາມສາມາດກ້າສະແດງອອກ ແລະມີອະນາຄົດທີ່ດີ.

ທ່ານ ນາງ ພຸດດາລົມ ເພັງນາມມະຈັກ ຜູ້ອຳນວຍການໂຮງຮຽນປັນຍາມະນີໃຫ້ສຳພາດເນື່ອງໃນໂອກາດວັນຄູແຫ່ງຊາດຄົບຮອບ 29 ປີ (ວັນທີ 7 ຕຸລາ) ທີ່ຈະມາເຖິງ ວ່າ ອາຊີບຄູ ຫຼື ຄຳວ່າ ຄູ ເປັນອາຊີບໜຶ່ງທີ່ມີຄວາມສຳຄັນໃນການພັດທະນາຊັບພະຍາກອນມະນຸດແຕ່ລະຂັ້ນໃຫ້ມີຄຸນນະພາບ ແລະ ຄູຍັງປຽບເໝືອນກັບນັກວິຈິດສິນທີ່ແຕ້ມສີລົງໄປໃນເຈ້ຍຂາວ ເຮັດໃຫ້ເຈ້ຍຂາວແຜ່ນນັ້ນມີຄວາມສວຍສົດງົດງາມດ້ວຍນໍ້າສີທີ່ມີຄຸນນະພາບກໍຄືການເບິ່ງແຍງເອົາໃຈໃສ່ຂອງຄູທີ່ມີຕໍ່ນັກຮຽນ.
ປັດຈຸບັນໂຮງຮຽນມີພະນັກງານ-ຄູທັງໝົດ 20 ຄົນ ເຊິ່ງຄູທັງໝົດລ້ວນແຕ່ມີບົດບາດສຳຄັນປະກອບສ່ວນເຂົ້າໃນການສິດສອນເປົ້າໝາຍເພື່ອສ້າງນັກຮຽນໃຫ້ກາຍເປັນໜໍ່ແໜງທີ່ສຳຄັນຂອງຊາດ ພ້ອມກັນນັ້ນໂຮງຮຽນໄດ້ມີນະໂຍບາຍຊົມເຊີຍຄູດີເດັ່ນທຸກໆໄຕມາດ ໃນ 1 ປີຈະມີ 3 ໄຕມາດ ໂດຍອີງໃສ່ຜົນງານຂອງການເຮັດວຽກ ຜົນງານຂອງຄວາມຄິດສ້າງສັນໃນການຜະລິດສື່ການສອນ ຜົນງານຂອງຄວາມດຸໝັ່ນໃນການປະຕິບັດລະບຽບໃນການໄປມາ ແລະ ຜົນງານຂອງຄວາມສະອາດປອດໄພ ໃນໄຕມາດທຳອິດທີ່ຈະມາເຖິງນີ້ມີຄູຈຳນວນ 3 ຄົນທີ່ຈະໄດ້ຮັບລາງວັນນີ້ ໃນໄລຍະເສດຖະກິດເງິນເຟີ້ທາງໂຮງຮຽນໄດ້ມີການເພີ່ມອັດຕາ ແລະ ນະໂຍບາຍຕ່າງໆເປັນຕົ້ນເງິນເດືອນຄູແຕ່ລະຄົນໃຫ້ເໝາະສົມເພີ່ມອັດຕາເງິນນໍ້າມັນປະຈຳເດືອນເພີ່ມອັດຕາຄ່າອາຫານທ່ຽງ ແລະຍັງມີທຶນການສຶກສາສຳລັບພະນັກງານທີ່ຕ້ອງການຢາກຮຽນຕໍ່ໃນອາຊີບຄູເພື່ອຍົກລະດັບຄວາມຮູ້ເປັນການສົ່ງເສີມໃຫ້ມີບຸກຄະລາກອນທີ່ມີຄຸນນະພາບເຂົ້າໃນໂຮງຮຽນ ສຳລັບພະນັກງານທີ່ມີປະສົບການໃນການລ້ຽງເດັກແຕ່ບໍ່ມີໃບວິຊາຊີບຄູ ທາງໂຮງຮຽນກໍມີນະໂຍບາຍໃຫ້ເຂົ້າຮ່ວມເຝິກອົບຮົມວິຊາຊີບຄູ 120 ຊົ່ວໂມງພ້ອມທັງນະໂຍບາຍອັດຕາອາຫານ ແລະຄ່ານໍ້າມັນໃຫ້.

ໃນສົກຮຽນ 2023-2024 ມີນັກຮຽນທັງໝົດ 117 ຄົນ ຍິງ 49 ຄົນ ການເສັງປະຈຳໄຕມາດມີນັກຮຽນເກ່ງ 1 ໃນ 5 ຄົນ (TOP 5) ຈາກນັກຮຽນທັງໝົດ 33 ຄົນ ເພື່ອສະເຫຼີມສະຫຼອງວັນຄູແຫ່ງຊາດທີ່ຈະມາເຖິງນີ້ ໂຮງຮຽນຈະໄດ້ຈັດກິດຈະກຳພາຍໃນທີ່ສອດແຊກເອົາປະເພນີຂອງຊາດລາວເຮົາໃຫ້ນັກຮຽນໄດ້ຮຽນຮູ້ເຊັ່ນ: ການອ່ານກາບກອນອວຍພອນວັນຄູ ການສົມມາຄູ ແລະຮູ້ບຸນຄຸນຄູ ການສະແດງຟ້ອນ ເຕັ້ນຂອງຄູ-ນັກຮຽນ ແລະກິດຈະກຳຮ່ວມກັນລະຫວ່າງຄູ ແລະ ນັກຮຽນ“ ເກມຍາດຕັ່ງ ຕີປຸມເປົ້າໃຫ້ແຕກ ແລະອື່ນໆ”.

แชร์