ລາວ ສົ່ງ 16 ປະເພດ ເຂົ້າຮ່ວມແຂ່ງຂັນເອຊຽນເກມ ທີ່ ສປ ຈີນ ພ້ອມຕັ້ງເປົ້າຍາດຫລຽນຄໍາ

ສປປ ລາວ ສົ່ງ 16 ປະເພດກິລາ ເຂົ້າຮ່ວມງານມະຫະກໍາແຂ່ງຂັນກິລາ ເອຊຽນ ເກມ ຄັ້ງທີ 19 ທີ່ນະຄອນຫາງໂຈວ ສປ ຈີນ ລະຫວ່າງວັນທີ 23 ກັນຍາ ຫາ 8 ຕຸລາ 2023 ພ້ອມຕັ້ງເປົ້າສູ້ຊົນຍາດເອົາຫຼຽນຄໍາ ຈາກປະເພດກິລາກະຕໍ້ ແລະສ່ວນງານມະຫະກໍາແຂ່ງຂັນກິລາ ເອຊຽນ ພາຣາເກມ ຄັ້ງທີ 4 ທີ່ຫາງໂຈວ ສປ ຈີນ ຈະຈັດຂຶ້ນໃນວັນ ທີ 22-28 ຕຸລາ 2023 ພ້ອມຕັ້ງຄວາມຫວັງສູ້ຊົນເອົາຫຼຽນໃດຫຼຽນໜຶ່ງ ເປັນຕົ້ນກິລາຍົກນໍ້າໜັກ ແລະກິລາແລ່ນ-ລານ. ພິທີຖະແຫຼງຂ່າວໄດ້ຈັດຂຶ້ນເມື່ອບໍ່ດົນມານີ້ໂດຍໃຫ້ກຽດເຂົ້າຮ່ວມ ແລະໂອ້ລົມຂອງທ່ານ ກິແກ້ວ ໄຂຄຳພິທູນ ຮອງນາຍົກລັດຖະມົນຕີ ຊຶ່ງມີ ທ່ານ ພຸດ ສິມມາລາວົງ ລັດຖະມົນຕີກະຊວງສຶກສາທິການ ແລະກິລາ ປະທານຄະນະກຳມະການໂອແລັມປິກແຫ່ງຊາດລາວພ້ອມດ້ວຍຄະນະຮັບຜິດຊອບ ຄູຝຶກ ແລະນັກກິລາເຂົ້າຮ່ວມ.

ສຳລັບປະເພດກິລາທີ່ ສປປ ລາວ ສົ່ງເຂົ້າຮ່ວມການແຂ່ງຂັນ ປະກອບມີ: ກິລາທີ່ສະເໜີຂໍໃຊ້ງົບປະມານຂອງລັດ ມີ 11 ປະເພດ ຄື: ວູຊູ, ກະຕໍ້, ລົດຖີບ, ເທຄວັນໂດ, ມວຍສາກົນ, ຢູໂດ, ແລ່ນ-ລານ, ລອຍນໍ້າ, ກາຣາເຕໂດ, ມວຍປໍ້າ ແລະ ຈຸຈິດຊູ ສ່ວນປະເພດກິລາທີ່ມອບໃຫ້ກຸ້ມຕົນເອງດ້ານງົບປະມານຮັບໃຊ້ ມີ 5 ປະເພດ ຄື: ກັອຟ, ອີສະປອດ, ຢິມນາສຕິກ, ເບສະບອນ ແລະຍິງປືນ ມີນັກກິລາເຂົ້າຮ່ວມທັງໝົດ 152 ຄົນ.

ສຳລັບງານກິລາ ເອຊຽນ ພາຣາເກມ ຊຶ່ງມີບັນດາປະເທດໃນຂົງເຂດທະວີບອາຊີເຂົ້າຮ່ວມ ທັງໝົດ 45 ປະເທດ ການແຂ່ງຂັນຄັ້ງນີ້ເຈົ້າພາບໄດ້ກໍານົດເອົາປະເພດກິລາແຂ່ງຂັນ ທັງໝົດ 22 ປະເພດ ສໍາລັບ ສປປ ລາວ ໄດ້ມີການຄັດເລືອກ ແລະ ກຳນົດເອົາປະເພດກິລາທີ່ໄດ້ຜ່ານການເຂົ້າຮ່ວມ ແຂ່ງຂັນຄັດເລືອກສະສົມຄະແນນ ໃນລາຍການແຂ່ງຂັນຊີງແຊັມໂລກ, ຊີງແຊັມທະວີບ ມີ 5 ປະເພດ ຄື: ແລ່ນ-ລານ, ລອຍນໍ້າ, ຍົກນໍ້າໜັກ, ລົດຖີບ ແລະ ບານບ້ວງລໍ້ເລື່ອນ (ທີມຍິງ) ໂດຍມີຄະນະນໍາກອງເລຂາ, ແພດ, ຄູຝຶກ, ຜູ້ຊ່ວຍຄູຝຶກ ຜູ້ເບິ່ງແຍງນັກກິລາ ແລະນັກກິລາ ເຂົ້າຮ່ວມທັງໝົດ ມີ 41 ທ່ານ ຍິງ 28 ທ່ານ (ຄູຝຶກ ແລະນັກກິລາ ລວມທັງໝົດ 26 ທ່ານ ຍິງ 13 ທ່ານ ແນວໃດກໍຕາມເນື່ອງຈາກບັນດາປະເທດທີ່ເຂົ້າຮ່ວມແຂ່ງຂັນມີນັກກິລາທີ່ມີຄວາມສາມາດໃນລະດັບສູງກວ່າຄັ້ງທີ່ຜ່ານມາແຕ່ຄະນະນັກກິລາພວກເຮົາກໍມີຄວາມພ້ອມທີ່ຈະຍາດເອົາຫຼຽນໃດຫຼຽນໜຶ່ງເປັນຕົ້ນກິລາຍົກນໍ້າໜັກ ແລະກິລາແລ່ນ-ລານ.
ທີ່ມາ: ປະຊາຊົນ

แชร์