ລາວ-ຈີນ ຮ່ວມສົ່ງເສີມການລົງທຶນ, ການຮ່ວມມືດ້ານເສດຖະກິດການຄ້າ

ກອງປະຊຸມສົ່ງເສີມການລົງທຶນ, ການຮ່ວມມືດ້ານເສດຖະກິດການຄ້າ ລະຫວ່າງ ແຂວງບໍ່ເເກ້ວ ສປປ ລາວ ແລະ ກິ່ງເເຂວງຫຼຽນຊານ ສປ ຈີນ ໄດ້ຈັດຂື້ນໃນວັນທີ 23 ພຶດສະພາ 2023 ນີ້ ທີ່ຫ້ອງປະຊຸມໂຮງແຮມດາວດອກງິ້ວຄຳ ເຂດເສດຖະກິດພິເສດ ສາມຫຼ່ຽນຄຳ, ມີທ່ານ ເຄື່ອນເພັດ ວົງຈັນ ຮອງເຈົ້າແຂວງບໍ່ແກ້ວ ຜູ້ຊີ້ນຳເຂດເສດຖະກິດພິເສດ ສາມຫຼ່ຽນຄຳ, ທ່ານ ມ່າຫຸຍ ຄະນະປະຈໍາພັກກິ່ງເເຂວງຫຼ່ຽນຊານ, ເລຂາພັກນະຄອນຊີຊ່າງ, ທ່ານ ຈ້າວເຫວີຍ ປະທານ ສະພາບໍລິຫານເຂດເສດຖະກິດສາມຫຼ່ຽມຄໍາ, ມີຂະແໜງການທີ່ກ່ຽວຂ້ອງຂອງ ສອງແຂວງ, ມີບັນດານັກທຸລະກິດຈາກກິ່ງເເຂວງຫຼຽນຊານ ແລະພາຍໃນເຂດເສດຖະກິດສາມຫຼ່ຽມຄໍາເຂົ້າຮ່ວມ.

ກອງປະຊຸມໄດ້ນຳສະເໝີຈຸດພິເສດ, ທີ່ຕັ້ງ, ທ່າແຮງ, ຍຸດທະສາດໃນການພັດທະນາເສດຖະກິດ-ສັງຄົມ,ສະພານການລົງທຶນ, ການພັດທະນາດ້ານເສດຖະກິດຂອງແຂວງບໍ່ແກ້ວ ແລະ ສະພາບຂອງການຄຸ້ມຄອງຈັດຕັ້ງປະຕິບັດວຽກງານຕ່າງໆ, ການພັດທະນາດ້ານພື້ນຖານໂຄງລ່າງ, ການຂະຫຍາຍຕົວຂອງການລົງທຶນເຂົ້າໃນໂຄງການຕ່າງໆເປັນຕົ້ນໂຮງແຮມ, ສູນບັນເທີງ, ເຂດການຄ້າ, ໂຄງການກະສິກໍາ ແລະ ໂຄງການອື່ນໆຂອງເຂດເສດຖະກິດສາມຫຼ່ຽມຄໍາ ແລະ ນຳສະເໝີສະພາບການພັດທະນາໃນດ້ານຕ່າງໆຂອງກິ່ງເເຂວງຫຼຽນຊານ ໃຫ້ກັນ ແລະກັນ ທັງສອງຝ່າຍໄດ້ຮັບຊາບ ເພື່ອເປີດໂອກາດໃຫ້ນັກທຸລະກິດ, ຜູ້ປະກອບການໄດ້ຮັບຮູ້ເຖິງທ່າແຮງໃນການລົງທຶນ ແລະ ການຊຸກຍູ້ສົ່ງເສີມການລົງທຶນ, ຄວາມມຸ່ງໜັ້ນ ແລະ ພະຍາຍາມຂອງສອງພັກສອງລັດໃນການຮ່ວມມືດ້ານເສດຖະກິດ, ຈຸດປະສົງກໍ່ເພື່ອດຶງດູດນັກທຸລະກິດ, ຜູ້ປະກອບການເຂົ້າມາລົງທຶນຢູ່ກິ່ງເເຂວງຫຼຽງຊານ ແລະແຂວງບໍ່ແກ້ວ ແລະພາຍໃນເຂດເສດຖະກິດສາມຫຼ່ຽມຄໍາໃຫ້ນັບມື້ບັນເພີ້ມຂື້ນເປັນການເພີ້ມທະວີມິດຕະພາບ, ການຮ່ວມມືໃຫ້ເລິກເຊິ່ງເພື່ອພ້ອມກັນພັດທະນາເສດຖະກິດຕ່າງຝ່າຍຕ່າງໄດ້ຮັບຜົນປະໂຫຍດ.

ນອກນີ້ບັນດານັກທຸລະກິດໄດ້ນຳສະເໜີຜົນງານ ແລະການເຕີບໃຫຍ່ຂະຫຍາຍຕົວໃນການດຳເນີນທຸລະກິດຂອງຕົນເພື່ອເປັນການແລກປ່ຽນ ແລະເປັນບົດຮຽນທີ່ດີໃຫ້ເຊິ່ງກັນ ແລະກັນ ໃນການຂະຫຍາຍກິດຈະການ, ທຸລະກິດໃຫ້ມີຄວາມກ້າວໜ້າ ແລະເປີດກວ້າງໃຫ້ການຮ່ວມມືໃນທຸກດ້ານເປັນຕົ້ນກະສິກໍາ, ການທ່ອງທ່ຽວ, ການຄ້າ, ການສຶກສາ ແລະອື່ນໆ ເພື່ອນຳເອົາຜົນປະໂຫຍດ ແລະຄວາມຈະເລີນຮຸ່ງເຮື່ອງມາສູ່ທັງສອງຝ່າຍ.

ກອງປະຊຸມໄດ້ມີພິທີສັນຍາການຮ່ວມມືດ້ານການຊື້-ຂາຍຜັກ ແລະໝາກໄມ້ ມູນຄາຈຳນວນ 120 ລ້ານຢວນ ລະຫວ່າງ ທ່ານ ຕູ້ເຈຍ ປະທານ ບໍລິສັດ ລາວຈົງຊິນ ການຄ້າສາກົນ ນຳເຂົ້າ-ສົ່ງອອກ ຈຳກັດ ກັບ ທ່ານ ນາງ ຢາງຈິ້ງ ປະທານ ກຸ່ມບໍລິສັດ ຫຼຽນຊານຄັງລີ ກະສິກຳ ຈຳກັດ ຖືວ່າເປັນບາດກ້າວໃໝ່ຂອງຜົນສຳເລັດໃນການສົ່ງເສີມການລົງທຶນ, ການຮ່ວມມືດ້ານເສດຖະກິດການຄ້າຂອງສອງແຂວງແຂວງບໍ່ເເກ້ວ ສປປ ລາວ ແລະກິ່ງເເຂວງຫຼຽງຊານ ສປ ຈີນ.

ຂ່າວ: ສາຍສະໝອນ ແກ້ວວິສິດ

แชร์