ປະທານສະພາແຫ່ງຊາດ ໃຫ້ທິດຊີ້ນໍາ 12 ບັນຫາສຳຄັນຕໍ່ຄະນະພັກ, ອົງການປົກຄອງແຂວງຜົ້ງສາລີ

ໃນໂອກາດເຄື່ອນໄຫວຢ້ຽມຢາມ ແລະ ເຮັດວຽກຮ່ວມກັບ ຄະນະພັກ, ອົງການປົກຄອງ ແຂວງຜົ້ງສາລີ ລະຫວ່າງວັນທີ 14-16 ມີນາ 2023 ນີ້, ທ່ານ ໄຊສົມພອນ ພົມວິຫານ ກໍາມະການກົມການເມືອງສູນກາງພັກ, ປະທານສະພາແຫ່ງຊາດ ໄດ້ມີຄໍາເຫັນໂອ້ລົມ ແລະ ໃຫ້ທິດຊີ້ນໍາ 12 ບັນຫາສຳຄັນ ຕໍ່ຄະນະພັກ, ອົງການປົກຄອງ ແຂວງຜົ້ງສາລີ ຄື: 1. ຄະນະພັກ, ສະພາປະຊາຊົນແຂວງ, ອົງການປົກຄອງແຂວງ, ອົງການປົກຄອງທ້ອງຖິ່ນທຸກຂັ້ນ ຈະຕ້ອງໄດ້ເພີ່ມທະວີຄວາມສາມັກຄີ, ຄວາມເປັນເອກະພາບພາຍໃນ ບົນພື້ນຖານແນວທາງນະໂຍບາຍຂອງພັກ, ມະຕິ, ຄໍາສັ່ງ, ລະບຽບກົດໝາຍ ແລະລະບຽບການ, ກົນໄກວິທີການເຮັດວຽກທີ່ວາງອອກ; ເພີ່ມທະວີຄວາມຮັບຜິດຊອບການເມືອງ, ຄວາມຮັບຜິດຊອບທີ່ໄດ້ຮັບການມອບໝາຍໃຫ້ສູງຂຶ້ນ ແລະ ປັບປຸງແບບແຜນການນໍາພາ-ຊີ້ນໍາ, ແບບແຜນວິທີເຮັດວຽກ ໃຫ້ແທດຕົວຈິງ, ມີວິທະຍາສາດ; ກໍາແໜ້ນແນວທາງ, ມະຕິ, ຄໍາສັ່ງ ຂອງພັກ, ລະບຽບກົດໝາຍຂອງລັດ ແລະ ກໍາແໜ້ນພາລະບົດບາດ, ສິດ ແລະໜ້າທີ່ ຂອງຄະນະພັກ, ອໍານາດການປົກຄອງແຕ່ລະຂັ້ນ ແລະ ການເຮັດແທ້ທໍາຈິງ ເພື່ອປະເທດຊາດ, ເພື່ອປະຊາຊົນ; ເພີ່ມທະວີຄວາມອົດທົນ, ຄວາມເສຍສະຫລະເພື່ອສ່ວນລວມ; ຄວາມອົດທົນ ແລະ ຄວາມເປັນແບບຢ່າງຂອງພະນັກງານ, ສະມາຊິກພັກ ແລະນັກຮົບ ໃຫ້ແກ່ມະຫາຊົນ, ສັງຄົມ, ປະຊາຊົນ ແລະປະດິດສ້າງ, ນໍາພາປະຊາຊົນເຮັດຕົວຈິງໃຫ້ຫລາຍເພື່ອໃຫ້ປະຊາຊົນພົ້ນຈາກຄວາມທຸກຍາກ.

2. ສະເໜີໃຫ້ ຄະນະພັກ, ສະພາປະຊາຊົນແຂວງ, ອົງການປົກຄອງແຂວງ, ອົງການປົກຄອງທ້ອງຖິ່ນທຸກຂັ້ນຈົ່ງພ້ອມກັນຫັນທີ່ຕັ້ງຂອງແຂວງຈາກທີ່ຕັ້ງຍຸດທະສາດດ້ານການທະຫານ ມາເປັນທີ່ຕັ້ງຍຸດທະສາດທາງດ້ານເສດຖະກິດ ດ້ວຍການເພີ່ມທະວີການພົວພັນຮ່ວມມືກັບ ບັນດາແຂວງຂອງ ສປ ຈີນ, ສສ ຫວຽດນາມ ໃນການສະໜອງຜົນຜະລິດດ້ານກະສິກໍາ ແລະ ດ້ານອື່ນໆ ໃຫ້ແກ່ຕະຫລາດຂອງສອງປະເທດເຊິ່ງເປັນຕະຫລາດທີ່ໃຫຍ່ ແລະກວ້າງຂວາງຈະເຮັດໃຫ້ຜົນຜະລິດຂອງພໍ່ແມ່ປະຊາຊົນ ມີຕະຫລາດຮອງຮັບ,ສາມາດສ້າງອາຊີບທີ່ໝັ້ນຄົງ, ມີລາຍຮັບ ແລະປັບປຸງຊີວິດການເປັນຢູ່ຂອງພໍ່ແມ່ປະຊາຊົນໃຫ້ດີຂຶ້ນຕື່ມ; 3. ຄະນະພັກ, ສະພາປະຊາຊົນແຂວງ, ອົງການປົກຄອງແຂວງ ຈະຕ້ອງໄດ້ເພີ່ມທະວິການພົວພັນຮ່ວມມືກັບ ອົງການປົກຄອງຂອງບັນດາແຂວງ ສອງປະເທດ ທີ່ມີຊາຍແດນຕິດຈອດກັບແຂວງຜົ້ງສາລີ ເພື່ອຜູກແໜ້ນການຮ່ວມມື, ສ້າງຄວາມເຊື່ອໝັ້ນ, ຄວາມໄວ້ເນື້ອເຊື່ອໃຈ ເຊິ່ງກັນ ແລະ ກັນ ໃຫ້ຫລາຍຂຶ້ນ ເຊິ່ງຈະເປັນບ່ອນອີງໃຫ້ແກ່ການຮ່ວມມືທາງດ້ານເສດຖະກິດ ຂອງພາກລັດ ແລະ ພາກເອກະຊົນຂອງສອງຝ່າຍ ເພື່ອເລັ່ງພັດທະນາເສດຖະກິດ, ຍາດແຍ່ງເອົາທຶນຮອນ, ເຕັກນິກວິຊາການ ໂດຍສະເພາະ ດ້ານຜະລິດກະສິກໍາ, ການປູກ, ການລ້ຽງ, ແນວພັນ ແລະ ເຕັກນິກວິຊາການທີ່ດີມາພັດທະນາດ້ານກະສິກໍາຂອງເຮົາ ໃຫ້ມີປະສິດທິພາບ; 4. ຄະນະພັກ, ສະພາປະຊາຊົນແຂວງ ແລະ ອົງການປົກຄອງແຂວງຜົ້ງສາລີ ຈະຕ້ອງໄດ້ເອົາໃຈໃສ່ສຶກສາອົບຮົມ ໃຫ້ປະຊາຊົນບັນດາເຜົ່າ ມີຄວາມສາມັກຄີປອງດອງ, ມີນໍ້າໃຈຮັກຊາດ ແລະ ມີນໍ້າໃຈເສຍສະຫລະ ເພື່ອຜົນປະໂຫຍດສ່ວນລວມ, ດຸໝັ່ນຂະຫຍັນພຽນ, ສ້າງສະຕິເຄົາລົບກົດໝາຍ, ການປະຕິບັດພັນທະຂອງປະຊາຊົນ ຕາມກົດໝາຍກໍານົດ. ພ້ອມກັນນັ້ນ, ກໍສ້າງເງື່ອນໄຂໃຫ້ອົງການແນວລາວສ້າງຊາດ, ອົງການຈັດຕັ້ງມະຫາຊົນ ໄດ້ເຄື່ອນໄຫວປະຕິບັດໜ້າທີ່ວຽກງານຂອງຕົນຕາມກົດໝາຍກໍານົດ ຢ່າງມີປະສິດທິພາບ; 5. ຄະນະພັກ, ອົງການປົກຄອງແຂວງຈະຕ້ອງໄດ້ເພີ່ມທະວີການນໍາພາ, ສຶກສາອົບຮົມບົ່ມເພາະ ສອງກໍາລັງ ຢ່າງໃກ້ສິດ, ເຖິງຖອງ, ຝຶກຝົນຫລໍ່ຫລອມໃຫ້ເປັນກໍາລັງທີ່ຈົງຮັກພັກດີ,ຮັບໃຊ້ປະຊາຊົນ, ຮັບໃຊ້ປະເທດຊາດ ດ້ວຍຄວາມບໍລິສຸດຜ່ອງໃສ, ມີຄວາມຮັບຜິດຊອບສູງຕໍ່ໜ້າທີ່ວຽກງານ; ການເຄື່ອນໄຫວປະຕິບັດໜ້າທີ່ວຽກງານ ຕ້ອງຢູ່ບົນຈິດໃຈຮັບໃຊ້ ປະເທດຊາດ ແລະ ປະຊາຊົນ. ພ້ອມກັນນັ້ນ, ກໍຕ້ອງເອົາໃຈໃສ່ຈັດຕັ້ງຜັນຂະຫຍາຍ ແນວທາງປ້ອງກັນຊາດ-ປ້ອງກັນຄວາມສະຫງົບ ທົ່ວປວງຊົນຮອບດ້ານ ຢ່າງທົ່ວເຖິງ ແລະ ເລິກເຊິ່ງ; ສ້າງ ແລະ ປັບປຸງຕາໜ່າງປ້ອງກັນຊາດ-ປ້ອງກັນຄວາມສະຫງົບຢູ່ທ້ອງຖິ່ນຮາກຖານ ໃຫ້ເຂັ້ມແຂງ, ໜັກແໜ້ນ; ສະກັດກັ້ນອາຊະຍາກໍາຕ່າງໆຢ່າງທັນການ, ເດັດຂາດ ແລະ ເຂັ້ມງວດ; ເອົາໃຈໃສ່ການຄຸ້ມຄອງຄົນຕ່າງປະເທດໃຫ້ເຂັ້ມງວດຕາມກົດໝາຍ.

6. ສະເໜີໃຫ້ຄະນະພັກ, ສະພາປະຊາຊົນແຂວງ, ອົງການປົກຄອງແຂວງ ເພີ່ມທະວີການນໍາພາ-ຊີ້ນໍາອົງການປົກຄອງທ້ອງຖິ່ນແຕ່ລະຂັ້ນ ກໍຄືພໍ່ແມ່ປະຊາຊົນ ໃຫ້ມີຄວາມເຂັ້ມງວດໃນການປົກປັກຮັກສາປ່າໄມ້, ສະກັດກັ້ນການຕັດໄມ້ທໍາລາຍປ່າເຊິ່ງຈະສົ່ງຜົນກະທົບເຮັດໃຫ້ແມ່ນໍ້າ, ຫ້ວຍຮ່ອງເກີດການບົກແຫ້ງ, ສົ່ງຜົນກະທົບຕໍ່ຄວາມສົມດຸນຂອງລະບົບນິເວດ ແລະ ກະທົບຕໍ່ການຜະລິດ, ການດໍາລົງຊີວິດຂອງປະຊາຊົນ; 7. ສະເໜີໃຫ້ ຄະນະພັກ, ສະພາປະຊາຊົນແຂວງ, ອົງການປົກຄອງແຂວງ, ອົງການປົກຄອງທ້ອງຖິ່ນທຸກຂັ້ນ ຕິດຕາມ, ຊຸກຍູ້ ຂະແໜງການທີ່ກ່ຽວຂ້ອງຂອງແຂວງ ຄົ້ນຄວ້າວາງແຜນ ແລະ ຈັດແບ່ງເຂດການຜະລິດກະສິກໍາໃຫ້ເໝາະສົມ, ຄົ້ນຄວ້າກໍານົດທ່າແຮງບົ່ມຊ້ອນທາງດ້ານການຜະລິດກະສິກໍາຂອງແຂວງ ເພື່ອສຸມທຶນຮອນ, ເຕັກນິກວິຊາການ ເຂົ້າໃສ່ການຜະລິດເປັນສິນຄ້າຂອງປະຊາຊົນ ເພື່ອສ້າງອາຊີບ ແລະ ລາຍຮັບອັນໝັ້ນຄົງໃຫ້ພໍ່ແມ່ປະຊາຊົນ; ສົ່ງເສີມການຜະລິດກະສິກໍາເປັນກຸ່ມ, ເປັນຟາມ, ສະຫະກອນແບບໃໝ່ ເພື່ອຂະຫຍາຍຖານການຜະລິດໃຫ້ກວ້າງໃຫຍ່ ແລະມີຜົນຜະລິດຈໍານວນຫລາຍ, ມີທ່າແຮງໃນການເຂົ້າເຖິງແຫລ່ງທຶນ ແລະການເຂົ້າເຖິງຕະຫລາດທີ່ມີປະສິດທິພາບ; 8. ຄະນະພັກ, ສະພາປະຊາຊົນແຂວງ, ອົງການປົກຄອງແຂວງ ຈະຕ້ອງໄດ້ເອົາໃຈໃສ່ນໍາພາຊີ້ນໍາ ໃນການປົກປັກຮັກສາ, ພັດທະນາແຫລ່ງທ່ອງທ່ຽວໃຫ້ຍືນຍົງ ແລະ ພັດທະນາຄຸນຄ່າຂອງແຫລ່ງທ່ອງທ່ຽວ ໃຫ້ຄົງຢູ່ຍາວນານກັບປະເທດລາວເຮົາຕະຫລອດໄປ; 9. ຄະນະພັກ, ສະພາປະຊາຊົນແຂວງ, ອົງການປົກຄອງແຂວງ ຈະຕ້ອງໄດ້ເອົາໃຈໃສ່ ລົງເລິກຕິດຕາມ, ຊຸກຍູ້ ເພື່ອເຮັດໃຫ້ການຈັດຕັ້ງປະຕິບັດບັນດາຕົວຊີ້ວັດຕ່າງໆ ໄດ້ບັນລຸຕາມຄາດໝາຍນັບມື້ເພີ່ມຂຶ້ນ; ການພັດທະນາການສຶກສາຂອງຂະແໜງວິຊາສະເພາະດ້ານຕ່າງໆ ໃຫ້ສອດຄ່ອງກັບຄວາມຮຽກຮ້ອງຕ້ອງການຂອງການພັດທະນາເສດຖະກິດ-ສັງຄົມ, ສ້າງວຽກເຮັດງານທໍາໃຫ້ແກ່ລູກຫລານ ທີ່ຮຽນຈົບວິຊາສະເພາະຂະແໜງຕ່າງໆ ໃຫ້ມີວຽກເຮັດງານທໍາ, ແກ້ໄຂການໄປອອກແຮງານຢູ່ຕົວເມືອງໃຫຍ່ ຫລື ຢູ່ປະເທດໃກ້ຄຽງ.

10. ຄະນະພັກ, ສະພາປະຊາຊົນແຂວງ, ອົງການປົກຄອງແຂວງ ຈະຕ້ອງໄດ້ເພີ່ມທະວີຄວາມເອົາໃຈໃສ່ ວຽກງານການກໍ່ສ້າງຮາກຖານການເມືອງ, ລົງໃກ້ສິດຕິດແທດພໍ່ແມ່ປະຊາຊົນ, ຮັບຟັງຄໍາສະເໜີ, ຄວາມຂັດຂ້ອງ ໝອງໃຈຂອງປະຊາຊົນ ຢ່າງເປັນປົກກະຕິ; ສ້າງເງື່ອນໄຂໃຫ້ພໍ່ແມ່ປະຊາຊົນໄດ້ປະກອບຄໍາຄິດຄໍາເຫັນຕໍ່ການຄຸ້ມຄອງລັດ-ຄຸ້ມຄອງເສດຖະກິດ-ສັງຄົມ ເພື່ອເປັນຂໍ້ມູນໃນການປັບປຸງແກ້ໄຂ.; 11. ການຈັດຕັ້ງປະຕິບັດ ວາລະແຫ່ງຊາດວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ເປັນວຽກງານທີ່ມີຄວາມສໍາຄັນ ຈຶ່ງສະເໜີໃຫ້ບັນດາສະຫາຍ ຄະນະພັກ, ສະພາປະຊາຊົນແຂວງ, ອົງການປົກຄອງແຂວງ ເພີ່ມທະວີການນໍາພາ-ຊີ້ນໍາຈັດຕັ້ງປະຕິບັດ ແລະ ຖືເອົາ ວາລະແຫ່ງຊາດ ເປັນພາລະກິດທົ່ວປວງຊົນ ເຊິ່ງສະມາຊິກພັກ, ພະນັກງານ-ລັດຖະກອນ ກໍຄື ພໍ່ແມ່ປະຊາຊົນບັນດາເຜົ່າ ຈະຕ້ອງໄດ້ຮ່ວມແຮງຮ່ວມໃຈກັນຈັດຕັ້ງປະຕິບັດ; 12. ທຸກພາກສ່ວນໃນສັງຄົມ ຈະຕ້ອງໄດ້ພ້ອມກັນເຂົ້າຮ່ວມໃນການ ຈັດຕັ້ງປະຕິບັດວາລະແຫ່ງຊາດວ່າດ້ວຍການແກ້ໄຂບັນຫາຢາເສບຕິດ, ບໍ່ປະໃຫ້ແຕ່ສອງກໍາລັງເປັນຜູ້ຈັດຕັ້ງປະຕິບັດ; ຖືເອົາການແກ້ໄຂບັນຫາຢາເສບຕິດ ຕິດພັນກັບວຽກງານພັດທະນາຊົນນະ ບົດ ແລະ ແກ້ໄຂຄວາມທຸກຍາກ, ການສົ່ງເສີມການຜະລິດ, ສ້າງວຽກເຮັດງານທໍາ, ການສ້າງລາຍໄດ້ແກ່ປະຊາຊົນ, ປັບປຸງຊີວິດການເປັນຢູ່ຂອງປະຊາຊົນໃຫ້ນັບມື້ດີຂຶ້ນ.
ໂອກາດດັ່ງກ່າວ, ຄະນະຜູ້ແທນຈາກສະພາແຫ່ງຊາດ ຍັງໄດ້ນໍາເງິນ ຈໍານວນ 100 ລ້ານກີບ ມອບໃຫ້ອົງການປົກຄອງແຂວງຜົ້ງສາລີຕື່ມອີກ.
ຂ່າວ-ພາບ: ສພຊ

แชร์