ກອງປະຊຸມເຜີຍແຜ່ກ່ຽວກັບການຈັດຕັ້ງປະຕິບັດວາລະ 2030 ເພື່ອການພັດທະນາແບບຍືນຍົງຮ່ວມກັບສະພາແຫ່ງຊາດ.

ໃນວັນທີ 12 ກັນຍາຜ່ານມາທີ່ໂຮງແຮມແລນມາກ, ນະຄອນຫຼວງວຽງຈັນ, ກົມອົງການຈັດຕັ້ງສາກົນ, ກະຊວງການຕ່າງປະເທດ, ໃນນາມເປັນກອງເລຂາຄະນະຊີ້ນໍາລະດັບຊາດເພື່ອຈັດຕັ້ງປະຕິບັດເປົ້າໝາຍການພັດທະນາແບບຍືນຍົງ (ກອງເລຂາ ປພຍ ແຫ່ງຊາດ) ຮ່ວມກັບສະພາແຫ່ງຊາດ ໄດ້ຈັດກອງປະຊຸມເຜີຍແຜ່ກ່ຽວກັບການຈັດຕັ້ງປະຕິບັດວາລະ 2030 ເພື່ອການພັດທະນາແບບຍືນຍົງໂດຍການເປັນປະທານຮ່ວມຂອງທ່ານ ດຣ. ບຸນລ້ອມ ແກ້ວບົວໂຮມ, ຮອງປະທານກໍາມາທິການວັດທະນະທໍາ-ສັງຄົມ, ສະພາແຫ່ງຊາດ ແລະ ທ່ານ ໂພໄຊ ໄຂຄໍາພິທູນ, ຮອງລັດຖະມົນຕີກະຊວງການຕ່າງປະເທດ ຊຶ່ງມີຜູ້ເຂົ້າຮ່ວມຈາກບັນດາກະຊວງຂະແໜງການ ແລະບັນດາກົມກອງອ້ອມຂ້າງສະພາແຫ່ງຊາດ ຈໍານວນ 60 ທ່ານ.ກອງປະຊຸມຄັ້ງນີ້ໄດ້ຮັບການສະໜັບສະໜູນທຶນຮອນຈາກອົງການ UNICEF ປະຈໍາ ສປປ ລາວ.

ຈຸດປະສົງຫຼັກຂອງກອງປະຊຸມໃນຄັ້ງນີ້ກໍເພື່ອສືບຕໍ່ເຜີຍແຜ່ ແລະສົ່ງເສີມການມີສ່ວນຮ່ວມຂອງທຸກພາກສ່ວນໃນສັງຄົມໃນການຈັດຕັ້ງປະຕິບັດເປົ້າໝາຍການພັດທະນາແບບຍືນຍົງ (ປພຍ) ໃຫ້ແກ່ພະນັກງານ ລັດຖະກອນໃນບັນດາກົມກອງຂອງສະພາແຫ່ງຊາດ ແລະ ຂະແໜງການທີ່ກ່ຽວຂ້ອງໄດ້ຮັບຊາບ. ພ້ອມດຽວກັນນີ້, ກໍ່ເພື່ອສ້າງເຄືອຂ່າຍການປະສານງານ ແລະການຮ່ວມມືລະຫວ່າງຄະນະຈຸດປະສານງານ ປພຍ ກັບສະພາແຫ່ງຊາດພ້ອມທັງເປັນການແລກປ່ຽນບົດຮຽນແລະຂໍ້ມູນຂ່າວສານ ໃນການຈັດຕັ້ງປະຕິບັດ ປພຍ ແລະວຽກງານການພັດທະນາເສດຖະກິດ-ສັງຄົມແຫ່ງຊາດໃນຕໍ່ໜ້າ.

ໃນໂອກາດດັ່ງກ່າວນີ້, ທ່ານ ໂພໄຊ ໄຂຄໍາພິທູນ, ຮອງລັດຖະມົນຕີກະຊວງການຕ່າງປະເທດ, ປະທານຮ່ວມກອງປະຊຸມໄດ້ກ່າວວ່າເປົ້າໝາຍການພັດທະນາແບບຍືນຍົງ ຫລື ປພຍ ແມ່ນຄໍາໝາຍໝັ້ນສັນຍາຂອງວົງຄະນາຍາດສາກົນສ້າງຂຶ້ນມາໂດຍການມີສ່ວນຮ່ວມຂອງບັນດາປະເທດສະມາຊິກ ແລະ ທຸກປະເທດກໍ່ໃຫ້ການຮັບຮອງເອົາ ແລະ ໃຫ້ຄໍາໝັ້ນສັນຍາວ່າຈະພ້ອມກັນປະຕິບັດເປົ້າໝາຍດັ່ງກ່າວໂດຍແນໃສ່ການແກ້ໄຂບັນຫາຄວາມທຸກຍາກໄປພ້ອມໆກັບການພັດທະນາທາງດ້ານເສດຖະກິດ-ສັງຄົມ ແລະການປົກປັກຮັກສາສິ່ງແວດລ້ອມ. ການພັດທະນາແບບຍືນຍົງໄດ້ກາຍເປັນພື້ນຖານທີ່ສໍາຄັນຂອງທຸກປະເທດໃນໂລກ ເຊິ່ງການພັດທະນາ ໃນປະຈຸບັນຈະຕ້ອງບໍ່ໄປບັ່ນທອນໂອກາດ ແລະ ຄວາມສາມາດໃນການພັດທະນາຂອງຄົນລຸ້ນຫຼັງ ກໍ່ຄືລູກຫລານຂອງເຮົາໃນອະນາຄົດ. ນັບແຕ່ການປະກາດຮັບຮອງເອົາວາລະຂອງສາກົນດັ່ງກ່າວໃນປີ 2015, ສປປ ລາວ ມີຄວາມໝາຍໝັ້ນອັນແຮງກ້າໃນການຈັດຕັ້ງປະຕິບັດວາລະຂອງສາກົນດັ່ງກ່າວໂດຍຜ່ານການຈັດຕັ້ງປະຕິບັດແຜນພັດທະນາເສດຖະກິດສັງຄົມແຫ່ງຊາດໃນແຕ່ລະໄລຍະທີ່ມີການເຊື່ອມສານ ປພຍ ເຂົ້າໃສ່ນໍາ.

ພ້ອມດຽວກັນນີ້, ສະພາແຫ່ງຊາດກໍ່ເປັນອົງການຈັດຕັງລັດໜຶ່ງທີ່ສໍາຄັນໃນປະກອບສ່ວນເຂົ້າວຽກງານການຈັດຕັ້ງປະຕິບັດ ປພຍ ຢູ່ ສປປ ລາວ ກໍ່ຄືແຜນພັດທະນາເສດຖະກິດສັງຄົມໃນແຕ່ລະໄລຍະ ໂດຍສະເພາະ ສະພາແຫ່ງຊາດມີບົດບາດສໍາຄັນໃນຖານະອົງການນິຕິບັນຍັດໃນການສ້າງ ແລະ ຮັບຮອງເອົາບັນດານິຕິກໍາ, ໃຫ້ສັດຕະຍາບັນ ແລະນະໂຍບາຍຕ່າງໆ ທີ່ຈໍາເປັນເພື່ອນໍາເອົາວາລະຂອງສາກົນມາຈັດຕັ້ງປະຕິບັດໃຫ້ປະກົດ ຜົນເປັນຈິງ, ພ້ອມທັງເປັນຜູ້ອະນຸມັດງົບປະມານຂອງລັດເພື່ອໃຫ້ສອດຄ່ອງກັບບູລິມະສິດການພັດທະນາຂອງປະເທດ. ນອກຈາກນີ້, ກໍ່ມີບົດບາດໃນການຕິດຕາມກວດກາບັນດາແຜນງານໂຄງການ ແລະກິດຈະກໍາຕ່າງໆ ຂອງລັດຖະບານໃນແຕ່ລະໄລຍະ.

ກອງປະຊຸມໃນຄັ້ງນີ້ ໄດ້ດໍາເນີນໄປດ້ວຍຜົນສໍາເລັດຕາມຄາດໝາຍເຊິ່ງຜູ້ເຂົ້າຮ່ວມໄດ້ປະກອບຄໍາຄິດຄໍາເຫັນຢ່າງກົງໄປກົງມາ ແລະສ້າງສັນໂດຍໄດ້ນໍາເອົາບົດຮຽນຕົວຈິງຈາກການຈັດຕັ້ງປະຕິບັດວຽກງານຂອງບັນດາຄະນະຈຸດປະສານງານ ປພຍ ມາແລກປ່ຽນເຊິ່ງກັນ ແລະກັນເພື່ອໃຫ້ເຫັນໄດ້ຂໍ້ສະດວກ,ຂໍ້ຫຍຸ້ງຍາກ ແລະ ຮ່ວມກັນຊອກຊ່ອງທາງແກ້ໄຂກ່ຽວກັບສິ່ງທ້າທາຍຕໍ່ການພັດທະນາໃນຂະແໜງການຕ່າງໆໃນຕໍ່ໜ້າ.

ຂ່າວ;ພາບ: ກົມການຂ່າວ ກະຊວງການຕ່າງປະເທດ

แชร์