ສາລະວັນ-ກວາງບິ່ງ ຮັດແໜ້ນສາຍພົວພັນຮ່ວມມື

ພິທີພົບປະຢ້ຽມຢາມຂອງຄະນະຜູ້ແທນແຂວງສາລະວັນ ສປປ ລາວ ແລະຄະນະຜູ້ແທນແຂວງກວາງບິ່ງ ສສ ຫວຽດນາມ ໄດ້ຈັດຂຶ້ນໃນວັນທີ 30 ສິງຫານີ້ ທີ່ຫ້ອງຮັບຮອງ ສະໂມສອນໃຫຍ່ຂອງແຂວງສາລະວັນ ຊຶ່ງຝ່າຍແຂວງສາລະວັນ ໃຫ້ກຽດຕ້ອນຮັບໂດຍ ທ່ານ ໂພໄຊ ໄຊຍະສອນ ກໍາມະການສູນກາງພັກ ເລຂາພັກ ເຈົ້າແຂວງສາລະວັນ ພ້ອມດ້ວຍຄະນະ; ຝ່າຍແຂວງກວາງບິ່ງນໍາໂດຍທ່ານ ເຈິ່ນຖັງ ຮອງເລຂາພັກແຂວງປະທານຄະນະກໍາມະການປະຊາຊົນແຂວງພ້ອມດ້ວຍຄະນະເຂົ້າຮ່ວມ.

ໃນພິທີພົບປະລະຫວ່າງຄະນະຜູ້ແທນ 2 ແຂວງສາລະວັນ-ກວາງບິ່ງ ຄະນະຜູ້ແທນທັງ 2 ຝ່າຍກໍໄດ້ມີການກ່າວຄໍາຢ້ຽມຢາມຖາມຂ່າວອັນອົບອຸ່ນ, ລາຍງານສະພາບການພັດທະນາເສດຖະກິດ-ສັງຄົມ, ຂໍ້ສະດວກ-ຂໍ້ຫຍຸ້ງຍາກຂອງການພັດທະນາເສດຖະກິດ-ສັງຄົມ ໃນໄລຍະຜ່ານມາໃຫ້ກັນຊາບກ່ຽວກັບບາດກ້າວການຂະຫຍາຍຕົວຂອງເສດຖະກິດ-ສັງຄົມ ຂອງ 2 ແຂວງ ເພື່ອເປັນການຖອດຖອນ,ແລກປ່ຽນບົດຮຽນໃນການບໍລິຫານຊີ້ນໍາໆພາການພັດທະນາເສດຖະກິດ-ສັງຄົມ ໃຫ້ມີບາດກ້າວຂະຫຍາຍຕົວຂຶ້ນໄປເລື່ອຍໆ. ການພົບປະຢ້ຽມຢາມຄັ້ງນີ້ເປັນຂີດໝາຍອັນສໍາຄັນຂອງ 2 ແຂວງສາລະວັນ-ກວາງບິ່ງ ໃນການເພີ່ມພູນຄູນສ້າງ ແລະ ເສີມຂະຫຍາຍມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະການຮ່ວມມືຮອບດ້ານລະຫວ່າງ ສອງພັກ, ສອງລັດ ແລະ ປະຊາຊົນສອງຊາດລາວ-ຫວຽດນາມ ອ້າຍນ້ອງໃຫ້ຈະເລີນງອກງາມ ແລະ ເກີດດອກອອກຜົນຫຼາຍຂຶ້ນຕື່ມອີກ;ທັງເປັນການສ້າງຂະບວນການກະກຽມສະເຫຼີມສະຫຼອງປີສາມັກຄີມິດຕະພາບລາວ-ຫວຽດນາມ, ຫວຽດນາມ-ລາວ ປີ 2022 ແລະ ບົນພື້ນຖານຈິດໃຈມິດຕະພາບການຮ່ວມມືອັນບໍລິສຸດຜ່ອງໃສ ຂອງສອງພັກ-ສອງລັດ, ອ້າຍນ້ອງລາວ-ຫວຽດນາມ ທີ່ມີມາຍາວນານເວົ້າລວມ, ເວົ້າສະເພາະກໍຄືແຂວງສາລະວັນ ແລະ ແຂວງກວາງບິ່ງ.  ນອກຈາກນີ້ຄະນະຜູ້ແທນ 2 ແຂວງ ກໍໄດ້ມີການມອບຂອງຂວັນທີ່ລະນຶກທີ່ເປັນເອກະລັກສະເພາະຂອງທັງ 2 ແຂວງ ຫຼັງຈາກນັ້ນຄະນະຜູ້ແທນ ທັງ 2 ຝ່າຍກໍໄດ້ເດີນທາງທ່ຽວຊົມສະຖານທີ່ທ່ອງທ່ຽວທາງທໍາມະຊາດຕາດເລາະຊຶ່ງເປັນສະຖານທີ່ທ່ຽວທາງທໍາມະຊາດທີ່ມີຊື່ສຽງຂອງແຂວງສາລະວັນຕື່ມອີກ.

(ຂ່າວ-ພາບ: ສ.ພະຈັນ)

แชร์