ຄະນະກອງບັນຊາການທະຫານ ຫຼວງພະບາງຕ້ອນຮັບຄະນະຜູ້ແທນກະຊວງປ້ອງກັນປະເທດ ສສ ຫວຽດນາມ

ໃນວັນທີ 14 ກໍລະກົດ 2022 ທ່ານ ພັນເອກ ພິເສດ ເລ່ ຮົງ ເຈືອງ ຮອງກົມການເງິນກະຊວງປ້ອງກັນເທດ ແຫ່ງ ສສ ຫວຽດນາມ ພ້ອມດ້ວຍຄະນະໄດ້ມາພົບປະຢ້ຽມຢາມກອງບັນຊາການທະຫານແຂວງຫຼວງພະບາງ,ໂດຍມີທ່ານ ພັນເອກ ສີວິໄຊ ເພັງສັນຕິສຸກ ກໍາມະການພັກແຂວງຫົວໜ້າການເມືອງກອງບັນຊາການທະຫານແຂວງຫຼວງພະບາງ ພ້ອມດ້ວຍຄະນະໃຫ້ການຕ້ອນຮັບຢ່າງອົບອຸ່ນ.

ໃນວາລະການພົບປະທັງສອງຝ່າຍໄດ້ລາຍສະພາບຈຸດພິເສດ, ທີ່ຕັ້ງ, ພາລະບົດບາດ, ລວມໄປເຖິງການກໍາເນີດເຕີບໃຫຍ່ຂອງອົງການຕົນຮັບຜິດຊອບໃຫ້ກັນ ແລະ ກັນຮັບຊາບໂດຍຫຍໍ້,ຊຶ່ງຕະຫຼອດໄລຍະຜ່ານມາແມ່ນໄດ້ສຸມໃສ່ຈັດຕັ້ງປະຕິບັດຜັນຂະຫຍາຍແນວທາງຂອງພັກ, ແຜນພັດທະນາເສດຖະກິດ-ສັງຄົມຂອງລັດ,ໂດຍສະເພາະແມ່ນການຈັດຕັ້ງປະຕິບັດ 4 ໜ້າທີ່ໃຫຍ່ 26 ແຜນງານທີ່ຄະນະພັກກະຊວງປ້ອງກັນປະເທດວາງອອກຢ່າງມີຜົນສໍາເລັດຫຼາຍດ້ານ, ພ້ອມທັງຕີລາຄາໝາກຜົນໃນການພົວພັນຮ່ວມມືແບບພິເສດລາວ - ຫວຽດນາມ ໃນການຮ່ວມສໍາພັນສູ້ຮົບຕ້ານຈັກກະພັດຜູ້ຮຸກຮານທັງແບບເກົ່າ ແລະແບບໃໝ່, ເຊິ່ງເຕັມໄປດ້ວຍຄວາມຮັກແພງສາມັກຄີໄມຕີຈິດມິດຕະພາບ ແລະ ຄວາມເສຍສະຫຼະອົງອາດກ້າຫານ, ສາມາດຕີເອົາຊະນະສັດຕູ ແລະ ຍາດເອົາຄວາມເປັນເອກະລາດ, ອິດສະຫຼະພາບ ແລະ ຄວາມຢູ່ເຢັນເປັນສຸກມາສູ່ປະຊາຊົນສອງຊາດລາວ - ຫວຽດນາມ ໃນປະຈຸບັນ, ເຊິ່ງກາຍເປັນເຫດການອັນສໍາຄັນທາງປະຫວັດສາດ, ເປັນມູນເຊື້ອເນື້ອໃນສຶກສາອົບຮົມການເມືອງນໍາພາແນວຄິດຂອງນາຍ ແລະພົນທະຫານທັງສອງຊາດເພື່ອສືບທອດພາລະກິດປະຕິວັດ, ເປັນແວນແຍງໃຫ້ແກ່ລູກຫຼານເພື່ອພ້ອມກັນເພີ່ມພູນຄູນສ້າງມູນເຊື້ອອັນດີງາມໄປຈົນຊົ່ວຟ້າກາລະນານ.

ໂອກາດນີ້ທັງສອງຝ່າຍຍັງໄດ້ມອບຂອງຂວັນທີ່ລະນຶກໃຫ້ກັນ ແລະ ກັນເພື່ອຢັ້ງຢືນເຖິງຄວາມສາມັກຄີຮັກແພງ ແລະ ປຽບເໝືອນອ້າຍນ້ອງທີ່ເກີດຮ່ວມທ້ອງພໍ່ແມ່ດຽວກັນ ທີ່ໄດ້ມີໂອກາດມາຢ້ຽມຢາມຖາມຂ່າວຄອບຄົວພໍ່ແມ່ອ້າຍນ້ອງ. ຈາກນັ້ນກໍໄດ້ນໍາພາຄະນະຜູ້ແທນທັດສະນະທ່ຽວຊົມຫໍມູນເຊື້ອຂອງກອງບັນຊາການທະຫານແຂວງ ແລະລົງພົບປະຢ້ຽມຢາມພະນັກງານ - ນັກຮົບກອງພັນນ້ອຍ 415 ແຂວງຫຼວງພະບາງຕື່ມອີກ ແລະໃນຕອນຄໍ່າຂອງວັນດຽວກັນນີ້ຄະນະພັກກອງບັນຊາການທະຫານແຂວງຫຼວງພະບາງຍັງໄດ້ຈັດພິທີບາສີສູ່ຂວັນຄະນະຜູ້ແທນກົມການເງິນກະຊວງປ້ອງກັນປະເທດ ແຫ່ງ ສສ ຫວຽດນາມ ຢູ່ທີ່ເຮືອນພັນຮັບແຂກກອງບັນຊາການທະຫານແຂວງເພື່ອຜູກຂໍ່ຕໍ່ແຂນອວຍພອນໄຊອັນປະເສີດໃຫ້ກັນ ແລະກັນດ້ວຍບັນຍາກາດເບີກບານມ່ວນຊື່ນ.

แชร์