ຈຳປາສັກ ທາບທາມບຸກຄະລາກອນເຂົ້າແຜນກໍານົດພະນັກງານ ນຳພາ-ຄຸ້ມຄອງ

ແຂວງຈຳປາສັກ ໄດ້ຈັດກອງປະຊຸມ ທາບທາມບຸກຄະລາກອນເຂົ້າໃສ່ແຜນກໍານົດພະນັກງານ ນຳພາ-ຄຸ້ມຄອງຕຳແໜ່ງຫົວໜ້າ ແລະ ຮອງຫົວໜ້າພະແນກການ ແລະ ທຽບເທົ່າຂັ້ນແຂວງ ຮອບທີ III ໃນວັນທີ 11 ກໍລະກົດ ຜ່ານມາ, ທີ່ຫ້ອງວ່າການແຂວງ ຈຳປາສັກ. ໂດຍການເປັນປະທານຂອງ ທ່ານ ວິໄລວົງ ບຸດດາຄຳ ກຳມະການສູນກາງພັກ ເລຂາພັກແຂວງ ເຈົ້າແຂວງຈຳປາສັກ, ມີບັນດາ ຮອງເລຂາພັກແຂວງ, ຄະນະປະຈຳພັກແຂວງ; ກຳມະການພັກແຂວງ ແລະ ພາກສ່ວນທີ່ກ່ຽວຂ້ອງ ເຂົ້າຮ່ວມ.

ທ່ານ ສະນັ່ນ ສີພາພົມມະຈັນ ຮອງເລຂາພັກແຂວງ, ຫົວໜ້າຄະນະຈັດຕັ້ງແຂວງ, ຜູ້ປະຈຳການ ຄະນະຮັບຜິດຊອບສ້າງແຜນກຳນົດພະນັກງານນຳພາ-ຄຸ້ມຄອງຂັ້ນແຂວງ ໄດ້ລາຍງານກ່ຽວກັບຜົນສໍາເລັດໃນການທາບທາມບຸກຄະລາກອນ ເຂົ້າໃສ່ແຜນກຳນົດພະນັກງານນຳພາ-ຄຸ້ມຄອງ ຕຳແໜ່ງຫົວໜ້າພະແນກ,ຮອງຫົວໜ້າພະແນກການ ແລະ ທຽບເທົ່າຂັ້ນແຂວງ ໃນຮອບທີ I-II. ຜ່ານການຈັດຕັ້ງປະຕິບັດ ໃນ 2 ຮອບຜ່ານມາ ມີຈຳນວນ 27 ພາກສ່ວນ ທີ່ຂຶ້ນກັບສິດຄຸ້ມຄອງ ຂອງຄະນະບໍລິຫານງານພັກແຂວງ ມີເປົ້າໝາຍບຸກຄະລາກອນທີ່ຈະເຂົ້າທາບທາມ ຮອບທີ 3 ທັງໝົດ: 235 ສະຫາຍ, ຍິງ 58 ສະຫາຍ. ໃນນັ້ນ, ຕຳແໜ່ງ ຫົວໜ້າພະແນກ ແລະ ທຽບເທົ່າ 100 ສະຫາຍ, ຍິງ 21 ສະຫາຍ, ຮອງຫົວໜ້າພະແນກ ແລະ ທຽບເທົ່າ 135 ສະຫາຍ, ຍິງ 37 ສະຫາຍ. ພ້ອມນັ້ນ ຄະນະຮັບຜິດຊອບສ້າງແຜນກຳນົດພະນັກງານນຳພາ-ຄຸ້ມຄອງຂັ້ນແຂວງ ໄດ້ສະເໜີ ແລະ ແນະນຳອະທິຍາຍເພີ່ມເຕີມຢ່າງເປັນລະບົບກ່ຽວກັບມາດຖານ, ເງື່ອນໄຂຂອງພະນັກງານນໍາພາ-ຄຸ້ມຄອງ ທີ່ໄດ້ກຳນົດໄວ້ໃນມະຕິເລກທີ 030 ຂອງກົມການເມືອງສູນກາງພັກ ແລະ ມາດຖານສະເພາະຂອງລັດຖະກອນແຫ່ງ ສປປ ລາວ ທີ່ກຳນົດໄວ້ໃນດໍາລັດຂອງລັດຖະບານເລກທີ 461 ເພື່ອເປັນບ່ອນອີງໃຫ້ແກ່ບັນດາສະຫາຍຜູ້ແທນກອງປະຊຸມ ໃນການຄົ້ນ ຄວ້າພິຈາລະນາເລືອກເຟັ້ນເອົາບຸກຄະລາກອນ ເຂົ້າໃສ່ແຜນກຳນົດພະນັກງານນຳພາ-ຄຸ້ມຄອງ ຮອບທີ III ໃນຄັ້ງນີ້.

ໂອກາດນີ້, ທ່ານ ວິໄລວົງ ບຸດດາຄຳ ໄດ້ຮຽກຮ້ອງມາຍັງບັນດາສະຫາຍ ຈົ່ງຍົກສູງຄວາມຮັບຜິດ ຊອບການເມືອງຂອງຕົນ ໃນການພິຈາລະນາບຸກຄະລາກອນທີ່ຈະເຂົ້າໃສ່ແຜນກຳນົດພະນັກງານນຳ ພາ-ຄຸ້ມຄອງ ຮອບທີ III ໃນຄັ້ງນີ້ ຢ່າງເລິກເຊິ່ງ, ພາວະວິໄສ ຮັບປະກັນໃຫ້ຖືກຕ້ອງຕາມມາດຖານ, ເງື່ອນ ໄຂທີ່ໄດ້ກໍານົດໄວ້; ຮັກສາໄດ້ຄວາມສາມັກຄີ, ຄວາມເປັນເອກະພາບ ເພື່ອຄົ້ນຄວ້າພິຈາລະນາເລືອກເຟັ້ນໃຫ້ໄດ້ບຸກຄະລາກອນທີ່ມີຜົນງານດີເດັ່ນ, ຜູ້ເຮັດແທ້ທໍາຈິງເຂົ້າໃນແຜນກໍານົດດັ່ງກ່າວ ໃຫ້ຮັບປະກັນເລືອກເຟັ້ນໄດ້ບຸກຄົນທີ່ດີ, ທີ່ເກັ່ງ, ໜຸ່ມແໜ້ນ ແລະ ມີມາດຖານ, ເງື່ອນໄຂຄົບຖ້ວນຕາມທີ່ໄດ້ກໍານົດໄວ້ໃນມາດຖານລວມ ແລະ ມາດຖານສະເພາະ ເພື່ອກໍ່ສ້າງ, ບຳລຸງ ຕາມຫລັກການຂອງການຄຸ້ມຄອງພະ ນັກງານຢ່າງເປັນລະບົບ ເພື່ອເປັນເປົ້າໝາຍສືບທອດທົດແທນໃນສະເພາະໜ້າ ແລະ ຍາວນານ.

ຂ່າວ: ທັດຊະນະ

แชร์